آه لو تعرف!
إن الموضوع بسيييييييييط موووووت
إن إنت مهما كان وضعك ومهما كانت الضغوط عليك… تقدر تبقى سعيد ومتحمس وتقوم تعيش الحياة وإنت وشك وقلبك فرحانين!
ومهما كان عندك خير وسعة من ربنا, ممكن تعيش نفسك في عدم سعادة
السر…. عندك إنت
ربنا سبحانه وتعالى خلى كل واحد فينا يقدر “يختار”
الإختيار ده أجمل نعمة من ربنا
الإختيار ده عندنا وعندك وعند أغنى شخص في العالم وكمان عند أفقر شخص في العالم
إختيار إنك تقوم تعمل الشغل اللي وراك
وإختيار إنك تبتسم أو حتى ترسم إبتسامة ولو مصطنعة على وشك وتحاول تحس بيها في قلبك
إختيار إن إنت تبطل حاجة غلط … إختيار… مجرد إختيار!
إختيار إنك تسيب الزفت ده وتقوم تعمل الشغل اللي وراك وترسم إبتسامة حتى لو مصطنعة على وشك وإنت بتعمل الشغل اللي وراك.
إختيار إنك تكلم مامتك أو باباك كلمة حلوة دلوقتي حالا… حتى من غير مناسبة
إختيار إنك تفرح زوجتك برسالة ولو بسيطة ….. إختيار إنك تفرحي زوجك برسالة ولو بسيطة… مهما كان هو رخم :) إنتي بنوتة برضه :)
إختيار إنك تقول: “#شكرا” لشخص يستحق… أو ياسيدي حتى يستحق نص نص يعني… إختار إنت بس إنك تقول #شكرا لحد.
إختيار إنك تفرح شخص واحد حواليك.
إختيار إنك تقف مع نفسك وقفة وتوقف الحاجات اللي إنت ولا فرحان بيها… ولا بتستفيد منها حاجة… الحاجات اللي إنت عارفها عن نفسك أكتر من أي حد تاني… ونفسك توقفها وتبطلها… إختيار بسيط إنك تقف مع نفسك واقفة جامدة وقوية وتقوي قلبك وعزيمتك وتشد أوي
مهما كنت حاولت قبل كده ووقعت… كلنا بلا استثناء بنحاول وبنقع وهانقع… بس النجاح في الحياة بيتعد بعدد المرات اللي بتقوم تقف فيها على رجلك وتبدأ من جديد بعد لما بتقع
مفيش حد مش بيعمل حاجات غلط يندم عليها… ومفيش حد مش بيضيع وقت… ومفيش حد مش بيضيع منه فرص… حتى أنجح وأسعد وأشطر الناس اللي في العالم
بس الناس الناجحة السعيدة بتقف تاني على رجليها وترجع تبدأ من الصفر تاني أول لما تقع
إنت كمان… إبدأ تاني من جديد دلوقتي
بإبتسامة على قلبك
بإبتسامة فعلا على وشك
يا بختك والله العظيم إن إنت قرأت الكلام ده دلوقتي وعندك الفرصة إنك تمسح كل اللي فات بأستيكة وتبدأ من جديد
إمسح اللي حصل من أول اليوم النهاردة …. وإبدأ من جديد
وللبدايات الجديدة حلاوة ولذة جميلة في القلب
#مبروك  ❤️