تطبيق تفاحة في اليوم أندرويد:
http://bit.ly/osloop-nweave-apple-android
تطبيق تفاحة في اليوم أي فون:
http://bit.ly/osloop-nweave-apple-ios

شرح استخدام التطبيق

 تفاحة في اليوم

أفكار أسلوب – حلقة رقم ٧

وحلقة مخصوص عن التفاح

الحلقة دي مهمة لينا كلنا

لك واحد بيبدأ حاجة ومش بيكملها

لكل واحد نفسه يروح الچيم وينتظم على الرياضة… بس عمره ما بيروح ولا ينتظم

لكل واحد بيحلم إنه يبدأ يقرأ كتاب ويخلصه… مش بس يشتريه ويتحنط عنده على الرف

لكل واحد عاوز يتعلم لغة أجنبية وبيحلم إنه يوصل إنه يتكلم زي الاجانب, بس مش بيبدأ, ولو بدأ مش بيكمل

في مثل أجنبي مشهور أوي بيقول:

An Apple A Day, Keeps the doctor away

والمثل ده معناه بكل بساطة

إنك لو إلتزمت بأكل تفاحة    واحدة كل يوم

صحتك هاتكون كويسة جدا ومش هاتحتاج تروح للطبيب  – ده بسبب الفيتامينات اللي في التفاح طبعا… وأعتقد إنهم ماكانوش يقصدوا الشيشة التفاحة بالمثل بتاعهم خالص (ده مجرد إعتقاد طبعا من عندي… إجتهاااااد يعني)

المهم, طبعا… أنا ماعنديش معلومات طبية تؤكد أو تنفي الكلام ده

لكن المثل ده فيه وصفة سحرية تقدر تغير حياتنا كلها

تعالوا نفترض إن إنت لو أكلت تفاحة واحدة في اليوم, وكل يوم لمدة ٣٦٥ يوم, صحتك هاتكون كويسة جدا بعد سنة

طيب… إيه رأيك لو بدل ما تاكل تفاحة واحدة كل يوم, تاكل ٣٠ تفاحة في آخر يوم من كل شهر… إنت برضه هاتكون أكلت ٣٦٥ تفاحة في السنة

ال ١٢ شهر اللي جايين, إنت تيجي آخر يوم من كل شهر وتاكل ٣٠ تفاحة… يعني مطلوب منك تاكل حوالي ٦ كيلو تفاح في يوم واحد

المهم … هيا هياه… سواء تفاحة واحدة في اليوم أو ٣٠ تفاحة آخر الشهر, هاتاكل نفس الكمية آخر السنة:

عارف إنك هاتقولي:

أولا: مستحيل تقدر تاكل ٣٠ تفاحة في يوم

ثانيا: حتى لو لسبب خارق في حد قدر ياكل ٣٠ تفاحة في يوم واحد, جسمه مش هايستفيد من التفاح والفيتامينات اللي فيه

بالعكس

إيه يا عم اللي إنت راسمه ده!!!!

أنا بقول بالعكس… مش بالعدس…

عدس إيه… إنت عارف العدس بقى بكام دلوقتي…

يادي النيلة… هو أنا كنت بقول إيه… آه صح

بالعكس, دا الواحد هايجيله مغص وتعب

هاقولك: طيب ما إنت شاطر وجميل وحبوب أهو… دا إنت حتى مش محتاج الحلقة دي يا راجل

معاك حق

إنت جسمك محتاج جرعة صغيرة من الفيتامينات اللي في تفاحة… لكن, الجرعة دي لازم تكون يومية

لو غيرت الجرعة دي ب ٣٠ ضعف الجرعة يوم واحد في الشهر, هاتضر نفسك بدل ما تنفع نفسك

يبقى إنت محتاج إيه يا كبيييير؟

محتاج تفاحة واحدة بس يوميا, وتستمر عليها يوميا

وماينفعش أبدا تبدلها بأكل ٣٠ تفاحة في يوم واحد آخر الشهر

بالمناسبة: سهل جدا جدا إنك تاكل تفاحة واحدة يوميا علشان مصلحتك

حتى لو مش بتحب التفاح, دي تفاحة واحدة… وهاتعدي في ثواني

لكن في مشكلة مهمة, إنك ممكن تبدأ وتلتزم لمدة يومين, وبعدين تنسى أصلا إنك إتفرجت على حلقة تفاحة في اليوم

… نعمل إيه فيك بس… ما إنت بتنسى وبتزهق وبتمل

بس ماتخافش, إحنا جايين النهاردة بحل مشكلة عدم الإلتزام على تفاحة في اليوم دي

بس في الأول: محتاجين ندخل في الحلقة نفسها الأول… لأن بكل صراحة

بصراحة يعني

أنا مكسوف أقول والله    

بصراحة يعني كده…. الكلام اللي فات ده… كان كله هري… الحلقة لسه هاتبدأ دلوقتي

 

خد نفس بقى كده علشان نبدأ بقوة

وإضغط لايك على الفيديو الجميل ده, علشان إنت جميل وحبوب, وصديق صدوق لأسلوب

إنت محتاج إيه؟؟؟

محتاج تفاحة واحدة في اليوم: مش ٣٠ تفاحة آخر كل شهر

بس كده؟؟؟؟

لأ يا كبير… إنت محتاج تبني جسم رياضي وقوي وتمارس رياضة, بدل ماتعيش بربع إمكانياتك الجسمانية… وبدل ما تتحول لمرتبة بشرية متحركة

وإنتي كمان… محتاجة تمارسي رياضة يومية وتلتزمي بيها على طول

طيب… نمارس رياضة ونلتزم عليها أد إيه

تعالوا نفترض إن كل واحد فينا محتاج ٢٠ دقيقة رياضة كل يوم

أو ممكن يبدلهم بممارسة رياضة ٤٠ دقيقة كل يومين

أو بالكتير أوي… ٦٠ دقيقة رياضة بإنتظام كل ٣ أيام

بس مش أكتر من كده

يعني ماينفعش أقول: أنا بدل ما أتمرن ٢٠ دقيقة كل يوم, هاجمعهم مع بعض وأتمرن مرة واحدة ٨ ساعات كاملين آخر كل شهر

عارف إنك هاتقولي

أولا: مستحيل حد يقدر يتمرن ٨ ساعات في يوم واحد… وهو مش بيتمرن يوميا

ثانيا: حتى لو لسبب خارق في شخص قدر يتمرن ٨ ساعات في يوم واحد, … غالبا الضرر اللي هايحصل هايكون أكبر بكتير أوي من كل نفع

هاقولك…. والله أنا كنت عارف … إنك شاطر وهاتعرف الكلام ده لواحدك… وإنك أصلاا مش محتاج الحلقة دي… بس إنت منور والله طبعا

معاك حق

إنت محتاج تلتزم بجرعة صغيرة من الرياضة كل يوم أو يومين مثلاا… بس المهم تواظب عليها طول الشهر

الإلتزام ب ٢٠ دقيقة رياضة يوميا فعلا حاجة بسيطة جدا, وكل الناس ممكن تعملها مهما كانت مشغولة أو حتى في الإمتحانات

وكمان هاتغير لينا حياتنا وتخلي عندنا طاقة نعمل كل حاجة بقوة وفعالية ونشاط أكبر بكتير

لكن…. المشكلة البسيطة… هي إنك هاتلتزم يوم أو يومين… وهاتنسى إنك شوفتنا أصلا

بس ماتخافش… إحنا جايين النهاردة ومعانا حل يفكرك بالتمرين كل يوم أو كل يومين… بس لسه شوية

إحنا دلوقتي بس بصراحة, محتاجين منك إنك تتأكد إن مفعل إشعارات الحلقات الجديدة من أسلوب على يوتيوب

الموضوع بسيط… عندك زرار جرس جميل كده جنب زرار السابسكرايب

إتأكد إنك مفعل النوتيفيكشنز من الجرس ده… بس طبعا لازم تكون عامل سابسكرايب الأول

إيه ده يا جماعة… بصراحة… أنا بقيت متشجع أوي إني أقوم وأعمل الشغل اللي ورايا

مين هنا تاني زيي؟؟؟

إحنا الحمد لله أكلنا تفاح

ولعبنا رياضة

يبقى ناقص إييييه؟

   أيوووووة بقى!

المذاكرة… ياتااااااا

دي بقى أكتر حاجة تقدر تلاقي فيها مبدأ “تفاحة في اليوم” واضح وصريح جدا

عندك جرعة يومية أيام الدراسة إنك تذاكر مثلا ٤ ساعات … طبعا الرقم ده بيختلف بإختلاف السنة الدراسية بتاعتك

لكن فرضا… عندك ٤ ساعات مذاكرة بتركيز وإجتهاد يوميا… هي دي الجرعة اليومية اللي إنت محتاجها

يبقى أكيد ماينفعش تضيع جرعة المذاكرة اليومية دي, وتيجي آخر الشهر تحاول تذاكر ١٢٠ ساعة في يوم واحد

أنا في إعتقادي المتواضع, إن صعب شوية تقدر تقعد ١٢٠ ساعة في يوم واحد تذاكر

وحتى يا سيدي جدلا لو قدرت تقعد ١٢٠ ساعة ورا بعض في نفس اليوم علشان تذاكر

مستحيل هاتتعلم حاجة, وهاتكره التعليم وتكره المذاكرة

وهاتفضل تشتم في نظام التعليم الفاشل اللي معتمد على الحفظ مش الفاهم

… يا سلااااام…. ماعرفتكش أنا كده

عمر ما في واحد من اللي بيأجلوا مذاكرة السنة كلها لآخر يوم ما هاياخد باله إن غلطان

لأه… الغلطة غلطتهم هما

التعليم هو الي بايظ, وأنا حلو وأموور

…. حتى لو التعليم بايظ, وحتى لو إنت حلو وأموور… مصلحتك إنك تتعلم وتنجح في وسط التعليم البايظ يا أمووور

أحسن مليار مرة مما تضيع مجهودك وعمرك على الفاضي

ما علينا…

عندك جرعة يومية… لازم تاخدها

———

إنت محتاج تستوعب أوي قاعدة: تفاحة في اليوم دي

وتطبقها على حاجات كتيرة أوي في حياتك

خصوصا الحاجات اللي لازم تتعمل بجرعة صغيرة على فترات طويلة أوي

محتاج تطبقها على الرياضة اليومية

وعلى الكتاب ال ٥٠٠ صفحة اللي بتحلم إنك تقرأه… لازم تقسمه ل صفحة أو صفحتين كل يوم أو يومين

ولازم تطبق مبدأ تفاحة في اليوم ده على إنك تاخد جرعة فيتامينات يومية

وعلى المذاكرة

وعلى حاجات كتيييرة أوي إنت عارفها عن نفسك أكتر مني

——

طيب… فهمنا موضوع الجرعة اليومية

وفهمنا موضوع تفاحة في اليوم

نفتكر إزاي بقى؟

من ٣ سنين بالظبط, أنا وزمايلي في شركة البرمجة اللي بشتغل فيها, عملنا أبليكيشن إسمه Apple A Day

الأبليكيشن ده المطلوب منه بالظبط هو إنه يفكرني بالحاجات اللي المفروض أعملها

أنا عن نفسي, بحتاج أفتكر إني:

١- أنزل على السلم مرة في اليوم (أنا ساكن في الدور ال ١١ على فكرة)

٢- أطلع على السلم مرة في اليوم

٣- أغسل سناني مرة في اليوم

٤- أخد فيتامين مرة في اليوم

٥- أروح التمرين مرة كل يومين

٦- أقرأ وردي اليومي من القرآن كل يوم

٧ـ أتفرج على فيديو تعليمي كل أسبوع

وبقالي ٣ سنين كاملين منتظم على إستخدام أبليكيشن أبل آ داي ده علشان يفكرني

بحط فيه الحاجة اللي محتاج أفتكر إني أعملها

وبحط أنا المفروض أعمل الحاجة دي كل أد إيه

والأبلكيشن بيفكرني بالميعاد اللي المفروض أعمل فيه الحاجة دي

وكمان, بيسجل المرات اللي عملت فيها الحاجة دي… ولو عاوز أعرف أنا إتمرنت كام مرة السنة دي… هاعرف بالظبط

هاتلاقي روابط الأبليكيشن ده في الديسكريبشن تحت الحلقة

وأنا كمان عامل فيديو شرح بالتفصيل إستخدام برنامج أبل أ داي على قناتي الخاصة على يوتيوب

هاتلاقي رابط الفيديو كمان في الديسكريبشن تحت الفيديو ده.

إحنا عارفين إن معظم الناس مش هاتكون متحمسة إنها تبدأ بجرعة صغيرة وتستمر عليها… إيه الإكسيتنينج (المثير للإهتمام) في كده

بس صدقني, دي طريقة مضمونة أوي تقدر تبني بيها كل التغيييرات طويلة المدى اللي إنت محتاجها

هي دي الطريقة اللي هاتقدر تخلص بيها قراءة أول كتاب

وهي دي الطريقة اللي لو أستمريت عليها لشهر, هاتلاقي نفسك بقيت ملتزم بالرياضة وكمان بدأت تشوف نتايج

وهي دي الطريقة اللي هاتخليك تخلص حاجات كتيرة أوي مع بعضها في نفس الوقت

—————————

أنا جربت الطريقة دي لسنين طويلة أوي من عمري

وحققت بيها حاجات كتيرة أوي في حياتي

كنت بتعلم درس إنجليزي واحد كل أسبوع… وبعد سنة مستوايا في الإنجليزي إختلف تماما

كنت بحفظ صفحتين قرآن في الإسبوع… وبعد سنة واحدة كنت حافظ سورة البقرة وآل عمران والنساء

أول أسبوع نفذت فيه الموضوع ده… سمعت لنفسي بعد أسبوع سورة الفاتحة وأول صفحة من سورة البقرة

اللي أنا حافظهم أصلا طبعا

بس… أنا كنت عارف إني محتاج أبني نظام أمشي عليه… مش إني أحفظ ١٠ صفحات أول أسبوع… وأقف بعد كده

———————————

طيب إيه يحصل لو فوووت مرة؟ لو فوووت جرعة

لو عامل مثلا إنك تتمرن كل يومين… وجيت في مرة وفوت ميعاد التمرين؟

مفيش مشكلة أبدا أبدا, لأن ده هايحصل أكيد

لكن… لو فوت مرة… إوعى إوعى إوعى تفوت مرتين أبدا

هايحصل إنك تفوت مرة كل كام يوم مثلا… لكن لو فوت يوم, إوعى تحت أي ظرف تفوت اليوم اللي بعده

إرجع تاني وإنتظم عادي خالص من اليوم اللي بعده كأنك مافوتش حاجة

وإنتظم على إستخدام برنامج An Apple A Day

علشان إنت لما تيجي بعد فترة وتلاقي نفسك إتمرنت ٣٠ مرة… هاتتشجع إنك تكمل

مرة تانية… شوف شرح إستخدام أبليكيشن An Apple A Day من على قناتي الشخصية على يوتيوب

هاتلاقي لينك الشرح في الديسكريبشن تحت الفيديو

وأكيد طبعا نزل أبليكيشن أبل آ داي على موبايلك الأيفون أو الأندرويد من الروابط اللي تحت الحلقة

وياسلام بقى لو إنت بقيت جميل وحبوب وحطيت رايتنج للأبليكيشن على الماركت بعد لما تنزله

ياااااااه…. والله فيك الخير… إنت وصلت معنا لغاية هنا…. دا إحنا كنا بنفكر نلغي آخر نص ساعة من الحلقة وقولنا مافيش حد هاياخد باله

إكتبلنا في كومنت تحب نناقش إيه في مواضيعنا اللي جاية

وماتنساش تكتب في كومنت إن إنت بتحب برنامج أفكار أسلوب حب التنين… لأني بفكر أطلب منهم يزودولي المرتب (تفتكر هايوافقوا؟؟؟)

خليك كريم…. خليك حبوووووب

إعمل متابعة\سابسكرايب لقناة أسلوب على يوتيوب, علشان توصلك حلقاتنا أول لما تنزل
http://bit.ly/osloop-sub
وكمان نزل برامج أسلوب للأيفون والأندرويد… علشان توصلك جميع حلقات أسلوب بالترتيب الصحيح
نزل أسلوب على #موبايلك #الأندرويد من هنا:
http://bit.ly/osloop-android
وأسلوب #أيفون من هنا:
http://bit.ly/osloop-iOS-eg
وده, #موقع أسلوب:
http://www.osloop.com
وده أسلوب على فايسبوك:
https://www.facebook.com/osloop.life/
وده أسلوب على انستاجرام:
https://www.instagram.com/osloop.life/
وأكيد أسلوب على تويتر:
https://twitter.com/OsloopLife