اهلا بيكم في حلقة جديدة من سلسلة حلقات مفاتيح النجاح و المفتاح جديد يفتح لك باب من ابواب النجاح

مفتاح انهارده اسمه : إكسر الملل!!

فى طريقك للنجاح، حاول أنك تجرب حاجات جديدة، جرب طرق جديدة تكون ممتعة و مسلية تكسر بيها الروتين و الملل!!

حط اكثر من  خطة للوصول لهدفك و لنجاحك و اسعى أنك تجرب كل فترة خطة جديدة و فكرة جديدة ، خلي الموضوع ممتع و مشوق !!

لما تجرب كل فترة خطة جديدة انت كده بتجدد الحماس من جديد لانك بتكون متشوق انك تشوف نتايج جديدة لكل طريقة او خطة جديدة بتطبيقها.

.يعنى مثلا لو عايز تنجح فى خسارة وزنك، خلى الموضوع ظريف لان الدايت فى حد ذاته يزهق !!

و امشي علي طرق متنوعة و انظمة مختلفة للدايت….زي نظام الكيتو وال نظام الكيميائي و الصيام المتقطع و نظام المهلبية باللبن و لسه يا ما هانشوف…ها تخسر ايه لو قراءت  و طبقت…متخليش الموضوع يبقى ممل، خليه ممتع و مسلى على قد ما تقدر.

لو أنت عايز تذاكر، مش هانسي ادعيلك زي كل مرة  “يارب اللي بيتفرجوا علينا يقوموا يذاكروا بعد الحلقة علي طول يا رب و مايتتضيعوش وتتقتهم علي الفايس بوك يارب “

لو شايف أن المذاكرة مملة و ده طبعا بالتأكيد -هو انت ممكن تقول غير كده – ما انا عارفاك يا بتاع كومنت ” انا مش طايق اذاكر و مضيع “، يبقى ما لكش حل غيرانك تخلى المذاكرة ممتعة و مسلية…جرب طرق جديدة للمذاكرة، واتفرج على فيديوهات وناس مختلفة بيتكلموا عن خطط و طرق للمذاكرة……عندنا فى قناة اسلوب فيديوهات كتييررررة عن الموضوع ده و فيديوهات عن تنظيم الوقت و محاربة الكسل ….شوف كل الافكار اللي فيها واكتب بقلمك الجميل الملحوظات المهمة فى كل فيديوو طبقها.

لما تكون فى الشغل، اخلق أفكار جديدة لشركتك  و اشتغل عليها لحد ما تبقى حقيقة… ما تكتفيش بأنك تعمل شغلك و بس، اتحدى نفسك و اتعلم كل يوم حاجة  جديدة تميزك عن زمايلك فى الشغل.

حتي لما تيجي تتفسح اختار اماكن جديدة تتفسح فيها…..

حاولي تقراي كتب عن طرق تجددي بيها علاقاتك  الاسرية و الزوجية… واكتشفي طرق مختلفة تتعاملي بيها مع اولادك خصوصا فى المواقف المتكررة علي طول اللي بتخليكي تتعصبي عليهم . خلي عندك كذا طريقة جديدة و مختلفة تدخلي بيها البهجة علي اولادك و زوجك.

فى حياتك عموما حاول اسعي دايما للتجديد و التغيير علشان تتحدي الملل و خصوصا فى الحاجات الروتينية فى حياتك… الموضوع ده هايسهل عليك انك تكمل طريق نجاحك و انت مستمتع و مستني كل يوم نتايج جديدة.

ده كان المفتاح السابع من مفاتيح النجاح.

اكتب لنا فى كومنت ايه أكتر حاجة انت استفدتها من الحلقة؟

و طبعا متنساش تعمل لايك و شير للحلقة.