الغضب!

كلنا بنواجه صعوبات في الحياة، و كلنا بنشعر بالغضب، بس المهم اننا ازاى نتعامل معاه بطريقة ايجابية؟، ازاى نخلى الغضب ميأثرش على صحتنا و لا على علاقتنا مع الآخرين؟

الغضب شعور طبيعى و صحى، بس للأسف معظم الوقت بنعبر عن غضبنا بطرق مش صح أو بأسلوب غلط، وممكن كمان يتحول لعادة و يظهر عليك كل فترة و من غير داعى و بطريقة لا إرادية.

خلال حياتنا اليومي بنتهرض لمواقف كثيرة ممكن تنرفزنا و تخرجنا عن شعورنا زي مثلا:

  • واحد أخد دورك فى الطابور وأنت واقف في عز الحر.
  • عندك شغل كتير على الكمبيوتر و مرة واحدة الجهاز بقى بطئ او قرر انه يقفل فى  وشك فجأة و انت مش عامل save لشغلك.
  • واحد معاك فى الشغل وعندكم مشروع لازم يتسلم و هو مبيعملش اى حاجة والشغل عمال يتراكم عليكم و أنت خايف أن الشغل ميخلصش.
  • حد يسخر منك او يستهزأ بيك.
  • مديرك يكلمك بلهجة مش كويسة.

  

ممكن كمان الغضب يكون نتيجة اننا مش بنلاقى الاهتمام الكافى من ناس معينة احنا بنحبهم، او أنهم يفهمونا أو يسمعونا، فى الحالة ده لازم تقف مع نفسك و تقول عن قناعة " أنا الوحيد المسؤول عن تلبية احتياجاتى  مش الاخرين "

طيب يعنى فيه حل لمشكلة الغضب دي و لا بترغي و مضيعة وقتنا علي الفاضي؟

ورقة و قلم و اكتب ورايا الخطوات دي:

١ - اعترف و خليك صريح مع نفسك أنك بتعانى من مشكلة الغضب…..الاعتراف و مواجهة نفسك بالحقيقة دي مرحلة مهمة اوي..

٢ -  حدد ايه الحاجات اللى بتضايقك و اكتبها لانها غالبا حاجات متكررة فى حياتك…..بعد ما تكتبها اوجد لها حلول…..و اول حل لأي حاجة بتضايقك و بتتكرر انك تقرر انك ما تضايقش منها تاني ابدا ابدا …...و تستقبلها استقبال الحافلين اول لما تحصل تانى فى حياتك….وتقف لها وقفة رجالة كده و تقولها مش هسمح لك تعكري مزاجي كل شوية….

٣ - حاول السيطرة على الغضب فى بدايته عن طريق انك تعمل بنصيحة الرسول صلي الله عليه و سلم و تقوم تتوضأ، قال الرسول صلى الله عليه وسلم "إن الغضب من الشيطان وإن الشيطان خلق من النار وإنما تطفأ النار بالماء، فإذا غضب أحدكم فليتوضأ"

٤-  غير من الهيئة اللي انت عليها…..عن الباقر عليه السلام: "أيما رجل غضب وهو قائم فليجلس، فإنه سيذهب عنه رجز الشيطان، وإن كان جالساً فليقم..."

٥ - التجاهل عادة بجد تستاهل أننا نبنيها هتريحنا كتير أوى …..لو حصلت مشكلة و قدرت تتجاهلها، تجاهلها متوفر علي نفسك يوم يبوز علي الفاضي..

٦  - حل المشكلات اللى بتواجهك كل واحدة على حدى...بلاش تكوم مشاكل الدنيا كلها فوق دماغك مرة واحدة.  

خليك صبور على الناس فى حالة الغضب، و حط فى اعتبارك أنك ممكن تكون انت الغلطان، أو انتوا الاتنين صح بس كل واحد بيبص للمشكلة من وجهة نظره

متسمحش لحد أنه يحسسك بعدم الارتياح، و لو حد غلط فى حقك خليك كريم النفس ومتسامح، متهتمش بتصرفات الناس اللى بتضايقك . خليك قدوة لغيرك فى الصبر وكظم الغيظ و الأخلاق …..عايزة شوية تمارين و ما تقلقش المواقف المزعجة فى الحياة كتيرة عندك الفرصة انك تتمرن. و هاتنتصر علي الغضب مرة و هايغلبك مرتين تلاتة فى الاول….بس صدقني هتوصل فى الاخر لمرحلة متقدمة و هتقدر تتحكم فى الغضب حبة حبة و الناس القريبة منك هتشهد لك بده و هتلاحظ ده. افهم غضبك واتعلم منه و صاحبه لأنك لو اهملته او كبته هيكون عدوك اللدود.