صرخة رقم ٤ من أسلوب… الفجوة

الفجوة!

أيوة… فجوة

حفرة

فراغ

فجوة بين اللي إنت عارف إنك المفروض تعمله

وبين إنك تقوم تعمله

فجوة بين اللي إنت شايف إنه هو الصح اللي لازم يتعمل

وبين القرارات اللي إنت بتاخدها

فجوة بين الحلم اللي إنت عاوز توصله

وبين اللي إنت بتعمله كل يوم

في فجوة

في حفرة

في فراااااغ

مش هي دي بس المشكلة

مش المشكلة بس هي إن إنت عارف بالظبط إيه اللي المفروض تكون بتعمله دلوقتي حالا… وسايبه ومش بتعمله

مش المشكلة بس هي إن إنت عارف بالظبط إيه الحاجات الزفت اللي إنت المفروض تبطل إنك تعملها… ولسه بتعملها لغاية دلوقتي ولسه بتندم بعد لما بتعملها

مش هي دي المشكلة بس

المشكلة… إن الفجوة بتكبر

إن الحفرة بتكبر وإنت بتقع فيها أكتر يوم بعد يوم

وبتصعب على نفسك إنك تخرج من الحفرة

بتحفر لنفسك حفرة وإنت جوة الحفرة بتغوص معاها

بتصعب على نفسك كل فرص النجاة

بس فيه أخبار كويسة

فيه أخبار كويسة أوي أوي

هي إنك مهما كنت في حفرة عميقة

تقدر تخرج منها

وتقدر تبدأ في إنك تردم الحفرة

وتقدر تبدأ إنك تقفل الفجوة

وتقدر تشوف إيه اللي إنت المفروض تقوم تعمله

وتكتبه في ورقة

وتقوم فعلا تعمله

وتقوم وتتحرك فعلا

وتقوم وتاخد خطوة وإنت كلك طاقة وحماس

وتقوم وتعمل اللي عليك كله… وبعد لما تعمل اللي عليك… تعمل أكتر وتكمل وتحط وقت ومجهود وطاقة وعرق ودم زيادة

تقدر أوي دلوقتي حالا إنك توقف الحاجات الغلط اللي إنت بتعملها ومش بتضر حد غيرك

الحاجات اللي إنت كل ما تعملها بتكره نفسك

كل حاجة بتخالف مبادئك … وكل حاجة لو شوفت حد تاني بيعملها هايسقط من نظرك

حاجات كبيرة وحاجات بسيطة

تضييع وقت وتضييع شغل وتضييع أمانة وتضييع مستقبل وتضييع تعب ومجهود إنت وأهلك بتحاوله تبنوه لنفسك ولشخصيتك

كل لحظة إنت لسه واقف فيها تتفرج على الفجوة وهي بتكبر… هي لحظة خيانة منك لنفسك

هي لحظة خيانة منك لمستقبلك

هي لحظة خيانة منك لسعادة أكبر في المستقبل

هي لحظة … مش هاترجع تاني أبدا طول العمر

سواء تعبت فيها وحطيت مجهود هاتشكر عليه نفسك في المستقبل

أو سواء قعدت فيها تضييع وقت

أو قعدت تعمل فيها حاجات غلط

هي لحظة هاتعدي… ومش هاترجع تاني

حتى اللحظة اللي عدت من عمرك دلوقتي وإنت بتسمعني… هي لحظة عدت خلاص من حياتك

بس ممكن تكون لحظة هاتشكر نفسك عليها في المستقبل

لأنك هاتقف مع نفسك وقفة

وهاتشوف بعينك الفجوة

وهاتشوف بعينك الحفرة

وهاتشوف بعينك إن الحفرة دي مجرد فخ ساذج

فخ تقدر تطلع منه بسهولة…. بس كنت محتاج بس تشوف بعينك وتاخد بالك … إن إنت جوه الحفرة… والحفرة بتكبر

إنت دلوقتي تقدر تطلع برة الفجوة…

تقدر تصرخ

تقدر تقول لأه وألف لأه لأي فجوة ساذجة هاندم عليها طول عمري

تقدر تقول لأه لكل لحظة مش هاشكر عليها نفسي في المستقبل

ماتستناش ولا لحظة

هات ورق دلوقتي حالا وإكتب إنت المفروض تعمل إيه… ولسه مش بتعمله

عبادتك ومبادئك وتمرينك وشغلك والأمانة اللي رقبتك ومذاكرتك وحقوق أهلك وناسك … وحقوق نفسك

لما تشوف الفجوة بعينك… هاتقدر تعدي من عليها

هاتقدر تقوم تعمل اللي إنت بتأجله وبتأخره وبينك وبينه حفرة… ممكن تقوم وتوصل لكن إنت لسه ماقومتش

شوف بنفسك إيه اللي المفروض تبطل تعمله…. و وقفه مرة واحدة

مرة واحدة

وقفه…. مرررررة… واحدة

ماتستناش

ماتنتظرش

ماتتحركش خطوة خطوة

وقف دلوقتي حالا

سواء تضييع وقتك

سواء علاقة غلط بتضيع وقتك

سواء أصحاب سوء لسه بيشدوك لتحت

سواء تدخين أو أي حاجة مقززة بتعملها

وقفها مرة واحدة ماتخفش إنك ترجع تاني

حتى لو رجعت تاني… هايجي عليك وتوقف تاني

ولو رجعت تالت… تشوف الفجوة مرة كمان وتوقف رابع وخامس … وطول العمر

الحياة مش بتقف والفجوات مش بتنتهي

لكن إنت عارف دلوقتي إنك إنت اللي تقدر تقوم وتبدأ الحياة… أو إنك تفضل تحفر لنفسك الحفرة اللي هاتعيش فيها طول عمرك

الحياة جميلة أوي لما تعدي من الحفر

الحياة جميلة أوي لما تقوم وتعمل الشغل اللي وراك

الحياة ممتعة أوي لما تلتزم بعبادتك صح أوي

الحياة جميلة أوي لما أهلك يفرحوا بيك

الحياة جميلة أوي وإنت مش بتضيع وقت

نفسسسسسسس عميييييق

يا بختك والله

يا بختك والله… لأنك هاتقوم دلوقتي… وتردم الفجوة

شاهد حلقات صرخة مجمعة هنا:

 

إعمل متابعة\سابسكرايب لقناة أسلوب على يوتيوب, علشان توصلك حلقاتنا أول لما تنزل http://bit.ly/osloop-sub وكمان نزل برامج أسلوب للأيفون والأندرويد… علشان توصلك جميع حلقات أسلوب بالترتيب الصحيح نزل أسلوب على ‫#‏موبايلك‬ ‫#‏الأندرويد‬ من هنا: http://bit.ly/osloop-android وأسلوب ‫#‏أيفون‬ من هنا: http://bit.ly/osloop-iOS-eg وده, ‫#‏موقع‬ أسلوب: http://www.osloop.com وده أسلوب على فايسبوك: https://www.facebook.com/osloop.life/ وده أسلوب على انستاجرام: https://www.instagram.com/osloop.life/ وأكيد أسلوب على تويتر: https://twitter.com/OsloopLife