أهلا بكم فى حلقة جديدة من أستديو أسلوب و حلقة جديدة عن الأمهات و المذاكرة مع الأولاد

يا رب تكونوا استفدتوا من أول حلقة عن المذاكرة للأولاد اللى عملناها فى برنامج " أستديو أسلوب" قبل كده و لو مكنتوش شفتوا الحلقة ممكن تشوفوها من خلال اللينك اللي ظهر دلوقتي فى الفيديو

حلقة مفيدة وان شاء الله تفيدكم كتير وتفرق معاكم كأمهات فى المذاكرة مع  اولادكم.

اما حلقة النهاردة برده هتكون عن موضوع المذاكرة مع الأولاد بس من منظور مختلف و لو طبقنا الاربع النقط اللي هقول لكم عليها دلوقتي هتحسوا بفرق كبيرو ملحوظ.

المذاكرة مع أولادنا و المشاكل و المجهود الكبير الللى بيقابلنا واحنا بنذاكر معاهم مش بس محصور على (ازاى نحفظهم دروسهم أو نقعدهم يعملوا الهوم ورك) فى جوانب تانية مهمة جدا حوالين الموضوع ده، حاجات ممكن نغفل عنها و لكن لو ركزنا و بقى عندنا الوعى أننا نعملها، هتفرق معانا كتيرر.

احنا كأمهات معندناش الوقت الكافي واكتر من الوقت معندناش الخلق الكبير اللى يسمح لينا اننا نستمر بأعلى كفاءتنا و على مدار الأيام واحنا بنذاكر لأولادنا، حياتنا فيها تحديات كبيرة و كل يوم أحداث مختلفة ممكن تأثر علينا و على أدائنا و خلقنا فى تربية أولادنا عموما

و انا كأم الموضوع ده شغلنى على طول زى ما أنا عارفة و متأكدة أنه شاغل أمهات كتيرة زى، الاستمرار على اننا نذاكر مع أولادنا بنفس الكفاءة العالية و بنفس الجهد و الحماس بتاع اول السنة صعب مش سهل، و خاصة فى وجود اطفال تانيين صغيرين، و مسئوليات بيت و كمان شغل للأمهات اللى بتشتغل

موضوعنا النهاردة ببساطة عن أهمية إدراكنا كأمهات بمناهج أولادنا فى كل المواد اللى بياخدوها ( هلخص موضوعنا النهاردة ببساطة فى نقط )

النقطة الأولى: المعرفة و الدراية الكاملة بمناهج أولادنا

  • لازم كل أم تبقى عارفة منهج و دروس  كل مادة ابنها أو بنتها بتاخدها
  • فى أول السنة مهم جدا انك اعملى زيارة لمدرسة بنتك أو ابنك و اتكلمى مع مدرس كل مادة، اعرفى منه أسامى الدروس اللى هيدرسها و المصادر اللى المدرس بيدرس منها، و مصادر الأسئلة اللى بيديها للأولاد علشان يحلوها هم homework  فى البيت

النقطة التانية: المتابعة الأسبوعية للتأكد من نسبة تحصيل الدروس اللي اتخدت خلال الاسبوع اللي فات

فى الاجازة الاسبوعية للمدرسة خليكى حريصة انك تعرفى ايه اللى اتاخد خلال الأسبوع فى المدرسة لكل مادة و طلعى أسئلة عشوائية من أي درس أو مسألة عشوائية من المسائل اللى اتخذت خلال الأسبوع و اسأليها لابنك او بنتك، و شوفى ابنك هيعرف الاجابة أو الحلول و لا لأ ( اختبار سريع حتى لو كان شفوى علشان تعرفى ابنك حصل من المدرسة قد ايه )

النقطة الثالثة: الزن على المدرس

لو لقيتى ابنك مش بيعرف يجاوب و يحل الهوم ورك م

ا تتوتريش عادى جدا، حتى لو كان اللى بتقوليه ده ( هيروغليفى وطلاسم  بالنسبة له) أو حتى لو عمل نفسه من كوكب تانى خالص، الحل ساعتها أنك تتواصلي

مع المدرس  (مشهد مضحك للام و هى بتكلم المدرس )

و تعرفيه أن ابنك مش حافظ أو مش عارف يحل، المتابعة مهمة جدا بالنسبة ليكى و للمدرس، وأكيد المدرس هياخد رد فعل و يقعد مع ابنك حصة اضاقية يتاكد فيها أنه فهم و عرف يحل أسئلة الدرس

زنك و اهتمامك أنك تتواصلى كل شوية مع المدرس، هيخلى المدرس أكيد يتواصل و يهتم، و يكون حريص على أن ابنك يكون مركز و طالع من الحصة محصل منها أكبر قدر، علشان يخلص من زنك عليه

النقطة الرابعة:

من ضمن المشاكل اللي بتقابلنا مع اولادنا كمان مشكلة انهم يكونوا حافظين و فاهمين كويس اوي المنهج بس ما يحلوش كويس فى الامتحان و يجيبوا درجات وحشة و يجننونا…..ده لان جو امتحان نفسه و الست اب بيكون مختلف. مهم جدا اننا  نحضر اولادنا علي جو الامتحان و ندربهم عليه…...نخليهم يحلوا امتحانات فى الزمن المخضض لكل مادة بدون التدخل بمساعدتهم فى الحل زي المتحان بالضبط

علي قد ما نقدر بحل امتحانات كتيرة اوي و تهيأنهم للامتحان..

ملخص سريع للحلقة:

النقطة الاولي: المعرفة و الدراية الكاملة بمناهج أولادنا ….اسامي الدروس والمصادر اللي  كل مدرس بيشتغل منها

النقطة الثانية: انتهزي فرصة الاجازة الاسبوعية لمعرفة نسبة تحصيل ابنك لدروسه اللي اخدها فى مدرسته خلال الاسبوع اللي فات

النقطة التالتة: الزن علي المدرس…..ما تبطليش الزيارات المدرسية للمدرسين و التواصل معاهم لمتابعة ابنك و مدي استيعابه للحصص

النقطة الرابعة: لازم نهيأ أولادنا لجو او ست اب الامتحان عن طريق تدريب اولادنا علي زمن و جو الامتحان من غير اي تدخل مننا للمساعدة.

جربوا انكم تطبقوا الاربع نقط دول هيساهموا بشكل ملحوظ اوي فى دراسة و تعليم اولادكم…...و اعملوا شير لكل الامهات اللي تعرفوهم علشان يستفادوا هما كمان و متنسوش تعملوا لايك و تكتبوا لنا رأيكم فى الحلقة او اي وسيلة ناجحة بتستخدموها مع اولادكم و جابت نتيجة معاكم.

لايك , شيرو ما تنسوش الكومنت