اهلا بيكم فى حلقة جديدة من استوديو اسلوب…

هبدأ الحلقة بسؤال..

انت عايز تنجح و لا مش عايز تنجح ؟ النجاح فى حياتك شىء إجباري و لا إختياري؟

كلنا عايزين ننجح طبعا ونوصل  لاعلي قمم النجاح كمان ، كلنا بنحلم  بتحقيق النجاح الاستثنائي اللي يميزنا عن غيرنا، كل واحد فينا بيجيلوا اوقات بيغمض عينه فيها و يتخيل نفسه ناجح فى حاجة، لو لسة طالب مثلا، بتتخيل نفسك انك نجحت بأعلى الدرجات و دخلت الكليىة اللي نفسك تخشها.

لو عندك مشروع لسه بدأوا  بتحلم أنه نجح و كسر الدنيا و حقق أرباح خيالية، لو بتلعب رياضة بتغمض عنيك و تحلم أنك بطل فيها و بلدك بقت فخورة  بيك و بتتخيل لحظات و لذة و متعة الفوز..

كلنا نفسنا ننجح  بس فينا ناس بنقول ان  النجاح ده بس للمحظوظين و لكن الحقيقة ان النجاح هو اللي بيجيب لنا الحظ و كل ما ننجح اكتر و نجاحنا يزيد كل ما هيزيد حظنا و الفرص اللي بتتعرض علينا لنجاحات اكبر و اكبر…..

لو جيت تسأل نفسك سؤال واحد فى صلب و صميم الموضوع، بتعمل ايه علشان توصل للنجاح؟ طيب أنت عايز تنجح نجاح عادى و لا نجاح استثنائى؟

اسأل نفسك… هل بتموت نفسك تمرين كل يوم علشان تبقى بطل و لا بتتمرن فى مواعيد تمارينك و بس، و متوقع يا بطل أنك تبقى بطل؟ هل بتموت نفسك كل يوم مذاكرة صبح و ليل وفى سكتك وانت رايح و جي من مدرستك وأنتِ رايحة و جاية من الكلية، و أنت رايح و جى من درسك؟ و لا بتذاكر بس لما بيبقى عندك وقت تذاكر فيه.

هقولك على حاجة، ما هو كل الطلبة بتذاكر على فكرة، و كل اللي بيلعب رياضة بيتمرن برده على فكرة، على فكرة كله بيفكر  يبدأ يعمل مشروع يحقق له ربح مادي و اجتماعي برده على فكرة.

بس أنت هتتميز عن الناس دي ازاى؟ هتكون متميز إزاى؟ هتنجح نجاح مش عادى ازاى؟  هتكون بطل عليهم ازاى؟

مش قدامك غير حل واحد ما فيش غيره إنك تشتغل على نفسك عشر أضعاف ما اللى حواليك بيشتغل، خلى الموضوع هوس فى دماغك،و قول لنفسك  هنجح و أوصل و أبقى بطل، هنجح و أوصل و أبقى الأول على الدفعة، سيب النجاح العادي للشخص العادى، لكن أنت شخص استثنائي شخص مش عادى، شخص "جعان نجاح" بينام ويصحى يحلم بالنجاح، بيشتغل من نار علشان ينجح و يبقى قدوة….مهوووسسسس

هتبص تحت رجليك و تقولى بعمل اللى عليا و أكثر ومش بوصل لحاجة، مش بحقق اللى أنا عايزه، مش بجيب الدرجات اللى أنا عايزاها، هقولك "Trust the process"، ثق "بالعملية" او سير العملية بمعني أصح …...هو انت متعرفش؟… أصل النجاح ده عبارة عن عملية "Process" متكاملة ،درست لscience قبل كده, دخلت اعدادي قبل كده؟  و تعريف الProcess أنها خطوات بتمشي عليها لغرض تحقيق هدف او تحقيق غرض ما……... تشتغل كل يوم و ما توقفش لحد ما توصل للهدف،من ضمن خطوات عملية النجاح " the process' انك يوم تيأس و تقول مش مكمل, يوم تفشل فى كل محاولات النجاح اللي بتعملها للمشروع وتقول هقفله، يوم تيأسي من المذاكرة و تقولى أنا كده كده ضايعة، و ميبقاش عندك صبر أنك تكمل للنهاية.

زى كده الدعاء، ربنا وعدنا بالاستجابة و بالرغم من كده ساعات كتير بنيأس و نقول دعائنا مش بيستجاب.

طب نسيت الدعوة اللى دعتها قبل كده واتحققت فى ساعتها من غير ما تاخد وقت، نسيت الدعوة اللي دعتها و لقيت ربنا استجبها فى الحال من غير أى مجهود؟ ربنا سميع  للدعاء، فى دعوات كتير بتتحقق بسرعة و ده أكبر دليل على أن الله سميع للدعاء، و دعوات تانية هتدعيها و تدعيها و بعدين تيأس، و تنساها و بعد سنين تلاقيها اتحققت، و لما تتحقق هتفتكرها و تقول يااه أنا دعيت الدعوة دى فعلا و أنا صغير، و اتحققت بعد عمر، اتحققت لما ربنا أراد وأن ربنا له حكمة.

من هنا ورايح لما تدعى خلى عندك يقين دعوتك هتستجاب ما فيش شك ، متوقفش و متيأس… من هنا ورايح لما تيأس فى نص طريقك  لهدفك، فكر نفسك بال Process و كمل للنهاية، النهاية حلوة أوعى تفوتها، و طعم النجاح حلو و لذيذ اوى ما ترضاش بأى نجاح، انجح نجاح مش عادي  خليك جعان نجاح!

لو عجبتك الحلقة اعمل لها شير مع اصحابك علشان تشجعهم و تحمسهم انهم ينجحوا نجاح استثنائي ….. و اكتب لنا فى كومنت نفشك تنجح فى ايه؟ و ايه الخطوات اللي هتاخدها علشان توصل للنجاح ده….كتبتك للخطوات دي هتفيدك جدا و هتحمسك انك تبدأ بالتنفيذ. يارب الحلقة تكون عجبتكم و تكونوا فعلا استفدتم منها.