غير حياتك: ٣ خطوات لإصلاح “يوم باين من أوله” – الموسم الأول – الحلقة الثالثة – أستوديو أسلوب osloop

 

أهلا بيكم في أستديو أسلوب… والحلقة التالتة من برنامج أسلوب حياة

مش ساعات بيعدي عليك يوم, بعد لما تبدأ بشوية تلاقي نفسك حصلك مشاكل كتير أوي وفجأه وقفت وقولت… يوووه
ماهو يوم باين من أوله

– لو يوم راحت عليك نومة وقايم تجري علشان تلحق شغلك … لأن مديرك بايخ… ونزلت لقيت عربيتك واحد راكن صف تاني وقافل عليك

– أو تنزل تلاقي عربيتك مخبوطة وهي واقفة مكانها

– أو تفتكر إن إنت ماعندكش عربية أصلا… وعمرك ماهاتشتري عربية grin emoticon grin emoticon

– أو رحت الشغل… لقيت مدريك مراته ضرباه على الصبح… وبيطلع عقده عليك

– أو تروح من الشغل تعبان ومبهدل… وتلاقي مراتك ضاربالك البوز

– أو تكوني مروحة مهدودة من الشغل والمواصلات… وتلاقي “الأستاذ ربنا يخليهولك” بيقولك… فين الأكل… إنتي مابتعمليش حاجة طول اليوم

****كل الأوقات الصعبة دي, ممكن بتغيير بسيط في تفكيرنا نتعامل معاها بسهولة
ونعدي اليوم بسلام, ومن غير ما نبوظ اليوم خالص

إحنا عندنا ٣ خطوات مهمة … علشان نغير يومنا من يوم صعب… ليوم جميل
لأن لو إحنا إتعلمنا وإتعودنا على ال٣خطوات دول… حياتنا هاتبقى أبسط وأسهل… والأيام الصعبة هاتقل أوي أوي …. وبإختيارنا

الخطوة الأولى:
—-
في حقيقة مهمة جدا في الحياة لازم كلنا نعرفها
ونستوعبها كويس

وهي إن اللحظات الصعبة اللي بتقابلنا
أو المواقف الغلسة اللي بتحصلنا دي, جزء من قوانين الحياة

كل إنسان فينا بيكون ليه نصيب منها

يعني بتحصل ليك… وكمان بتحصل لغيرك

المواقف الصعبة دي بتكون خارجة عن إرادتنا ومش ممكن نتجنبها من حياتنا

بس اللي ممكن أكيد نغيره… هي ردود أفعالنا تجاه المشاكل دي

وإزاي نقدر نقوي قوة التحكم في نفسنا … في أي موقف غلس/بايخ بنقابله في اليوم

الموضوع ده مش هانقدر نخلقه فينا مرة واحدة

دا محتاج منا تمرين كتير جدا

علشان كده …إنتهز الفرصة لما يجيلك أو يعدي عليك لحظات صعبة

دي المفروض تكون فرصة إنك تمرن نفسك وقدرتك في التحكم في نفسك وفي ردود أفعالك

الخطوة التانية
———
إعتبر أي موقف صعب يعدي عليك … كأنه تحدي جديد بالنسبة ليك

تحدي بتكتسب منه خبرات جديدة في الحياة

بتزود من نضجوك الفكري

بالظبط زي الجيمز اللي بتلعبها

كل ما تعدي مرحلة… وتكسبها… اللي بعدها هاتكون أصعب… بس لو رجعت لأي مرحلة قبل كده… هاتبقى سهلة جدا مقارنة بأول مرة لعبتها

الخطوة التالتة
——
(إشحن نفسك… سعادة)
حاول دايما تبقى سعيد… ومتنتظرش السعادة تجيلك
أو تسمح لشخص إنه يكون مسؤول إنك تكون سعيد

ماتنتظرش إن موقف يحصل علشان إنت تكون سعيد… روح بنفسك وإعمل اللي يخليك سعيد وإشحن نفسك سعادة

تخيل كده لو إنت حاسس بالسعادة… هاتلاقي نفسك بتتعامل مع أي مشكلة بحكمة وبسلاسة

يعني مثلا… لو سايق العربية وإنت سعيد… وحد خبط عربيتك

ياترى هاتعمل إيه؟؟

لو إنت سعيد…. هاتلاقي نفسك بتقوله: روح ياعم ربنا يسامحك
أو حتى ترفع إيدك وإبتسامة… وتعدي بسلام

تخيل لو حصل معاك نفس الموقف ده وإنت متضايق ومش سعيد

هاتلاقي نفسك في ثانية إتعصبت و إستخدمت ألفاظ مش كويسة

علشان كده بطاريتك لازم تكون مشحونة سعادة كل يوم

أصل بطاريتك دي بتفضى مع الإستهلاك, بالظبط زي بطارية الموبايل

إشحن بطارية السعادة بتاعتك… وإعمل حاجة في اليوم لنفسك بتحس بعدها بالسعادة

زي مثلا:
1- تتمشى كل يوم نص ساعة وإنت بتسمع محاضرة أو درس أو أوديو بوك

2- تتوضى وتصلي ركعتين بتأني وخشوع

3- تقرأ قرآن… وتحس بإنك بتقرأ كلام ربنا… اللي يقدر يحل مشاكلك كلها

4- تقرأ كتاب شيق مع كوباية قهوة في البلكونة

5- هاتي شيكولاتة بتحبيها… بس إلعبي رياضة بعدها

6- إطبخي طبق حلو ووزعيه على الجيران… ماتخافيش … هايرجعوا الطبق تاني… وإحتمال يكون مليان كمان

7- … أو روحي للكوافيرة و إعملي شوبينج…. ربنا يخليلك الأوستاز

8- … إتصل بمامتك في التليفون… وإتكلم معاها شوية… والله هاتدعيلك

9- حتى إلعب عشر دقايق لعبة مسلية على موبايلك… بس عشر دقايق بس… ماتضيعش يومك

اللي فاتوا دول هما ٣ خطوات مهمين لتحويل “يوم مش باين من أوله” … ليوم فعلا سعيد… مهما كانت الظروف

الخطوات دول هايشتغلوا معاك في معظم الأيام الصعبة… في أيام هاتبقى أصعب من ال ٣ خطوات دول… ودول حلولهم في حلقة جاية إن شاء الله

إكتبولنا في كومنت… إقتراحتكم للحلقات اللي جاية…

وكمان إعملوا شير للحلقة… علشان نوصل أفكارنا الإيجابية لكل الناس
وأكيد إعملوا سابسكرايب للقناة… وشير كمان مرة …

برنامج أستوديو أسلوب - الحلقة الثالثة - ٣ خطوات للتغلب على يوم باين من أوله

برنامج أستوديو أسلوب – الحلقة الثالثة – ٣ خطوات للتغلب على يوم باين من أوله