ده عهد مننا أمام ربنا إننا إن شاء الله مانستخدمش الصفحة دي أبدا غير في الخير إن شاء الله
السلام عليكم يا أجمل أسلوبيين
بعد ٢٩ يوم من سرقة صفحة أسلوب على الفايسبوك, تم استرداد الصفحة الحمد لله … وجاري تنظيف الصفحة من البوستات العجيبة اللي الأخ الجميل اللي كان سارق الصفحة بيحطها … وألعن من البوستات… ترجمة جوجل العربي اللي تموت من الضحك.
في الأول… بنعتذر إن بوستات أسلوب مملة شويتين عن الفيديوهات المسلية أو المضحكة اللي الأخ الجميل سارق الصفحة كان بيحطها … لكن مكتوب عليكم ملل أسلوبي كمان شوية الحمد لله.
في ال ٢٩ يوم اللي فاتوا … ربنا يعلم إحنا إجتهدنا أد إيه, و المعارك و السجال مع فايسبوك و مع مصلحة الشهر العقاري والتوثيق و الغرفة التجارية و السجلات التجارية … وحتى كشوفات البنوك اللي بتثبت الإعلانات اللي كنا بندفعها للصفحة من ٤ سنين كاملين
الجميل في الرحلة بتاعة ال ٢٩ يوم دول, إننا الحمد لله ما كناش لواحدنا … في ناس كتير جدا جدا جدا من متابعين أسلوب كان نفسها تساعد بأي طريقة … حتى الكومنتس اللي بعض المتابعين كانت بتكتبها … والله العظيم إن في كومنتس بعض المتابعين كانوا بيكتبوها … والله أبكتنا حقيقية
و شكر خاص جدا لأصحاب القنوات على يوتيوب و صفحات الفايسبوك اللي كانو بيتواصلوا معانا يوميا بالهاتف و الرسائل بتوجيهات لكيفية إسترجاع الصفحة … مجهود كبير و الله ومساعدة كبيرة من قنوات كتيرة … بدون ترتيب محدد … شكرا خاص جدا للناس اللي ساعدتنا دي… ياريت تشكروهم معانا لإنهم فعلا أخدوا من وقتهم ومجهودم لمساعدتنا في إسترجاع الصفحة
Karim Shindy – ذاكرلى عربى
Matrix219
Ahmed Sheta
Kareem Esmail
احمد الجرنوسي – Ahmed ElGarnosy
عشاق السيارات مع عصام غنايم > البيدج
Dudy Lifestyle
جوري اسيا
Hazem El Seddiq
Mostafa makram
El Zatoona – الزتونة
الناس اللي ساعدتنا فوق دول (بدون ترتيب محدد للأسماء) .. منهم اللي صورلنا فيديوهات و بعتها لطرق هما استعادوا بيها الصفحات, ومنهم اللي وصلنا بناس شخصيا علشان تساعدنا على استعادة الصفحة … ومنهم ناس بعتولنا إيميلاات وحسابات أشخاص يعرفوهم شخصيا بيشتغلوا في فايسبوك علشان يسرعوا عملية إسترجاع الصفحة … و منهم ناس كانت متابعة معانا الموضوع و بتسأل تطمئن وصلنا لإيه كل شوية
لمدة ٢٩ يوم … إجتهاد كبير جدا الحمد لله … الفايسبوك مابدأش يتعاون معنا أي تعاون له معنى غير بعد أكتر من ١٦ يوم تقريبا … لكن الحمد لله الحمد لله الحمد لله
دين علينا, إننا نساعد أي حد ممكن يحصل معاه اللي حصل معانا … وإن شاء الله نساعد أي شخص له صفحة كبيرة تم سرقتها .. .أو على الأقل نوفر عليه المسافة و الوقت
لو حد صفحته اتسرقت و محتاج الخطوات اللي إحنا أخدناها بالتفصيل … ياريت يبعتلنا إيميل و إحنا نرد عليه بالتفاصيل كاملة إن شاء الله: media.production@OsLoop.com
بوست طويل شوية … لكن الحمد لله و الله … وشكرا جدا على كل واحد ساعدنا