إبدأ يومك مع مبادئ أسلوب, والمبدأ رقم ١٢ من سلسلة ال ٢١ مبدأ لحياة أكثر إيجابية

إبدأ يومك مع مبادئ أسلوب, والمبدأ رقم ١٢ من سلسلة ال ٢١ مبدأ لحياة أكثر إيجابية

إزاي تقدر تاكل فيل

في فزورة أغلبنا يعرفها بتقول:

إزاي تاكل فيل؟

والجواب طبعا: لو قطعنا الفيل ده لقطع صغيرة, ويتاكل بعدها قطمة بقطمة.

بس ماتخفش, إحنا مش عاوزينك تاكل فيل ولا حاجة

المثل ده بيتقال دايما علشان نعرف إزي نقدر نخلص شغل كبيييير أوي ورانا ومأجلينه لأننا خايفين منه من كتر ما هو شغل كتير و كبير

وبنقعد نأجل ونأجل فيه وبيكون عبئ علينا كبير أوي

ممكن بسهولة نكتب الشغل اللي ورانا ده بكل تفصيله فيه

وبعدها نبدأ إننا نجزأه أجزاء صغيرة

ونخلص كل جزء لواحده

لحد ما نقدر نخلص كل الشغل على بعضه

كلنا وقتنا ضيق

وعاوزين نخلص شغلنا في أسرع وقت وبأقل مجهود

فا طريقة تقسيم الأعمال والأشغال الكبيرة لأجزاء صغيرة, تعتبر أنسب طريقة لتحقيقي ده

هانقدر نخلص الشغل اللي ورانا من غير ضغط

(هو إيه اللي بيجري ورايا ده؟؟؟)

لأن سيكولوچيا, هانحس بالحماس والسعادة, بعد لما ننتهي من إنجاز كل جزء صغير لواحده

هانشعر بالسعادة ونحس إننا أنجزنا ونتشجع إننا نخلص باقي الشغل كله

انت لو بتخلص ولو جزء صغير من الشغل اللي وراك, هاتكون خطوة للأمام بتساعدك إنك تخلص الشغل الكبير واللي كان عبئ عليك

نبدأ بالأمهات

مطبخك مثلا, بقالك فترة نفسك تفضي الدواليب اللي فيه, وتروقيها وتنظميها

بس من كتر الكركبة, عمالة تأجلي الموضوع ده كل يوم

ممكن ساعتها تكتبي تفاصيل الشغل اللي المفروض تعمليه كلها في مطبخك

وبعدين تقسمي كل الشغل ده لأجزاء

خدي بقى شوية أفكار

إكتبي في المطبخ عندي

أفضي الدواليب

أنضف الدواليب

أرجع الحاجات تاني بنظام جواها

أنضف الأسطح

أنضف التلاجة

أنضف الأجهزة الكهربائية كلها

دي مثلا تفاصيل متقسمة للشغل كله اللي محتاجاه علشان مطبخك ينظف ويكون منظم

إختاري كل يوم جزء وإعمليه

إبدأي بالدواليب مثلا

واليوم التاني تنظيف الثلاجة

وهكذا

صوت أسلوبي: (خد هنا يا فلافيلوا ماتخفش… أنا جاي أشرب بس)

مثال تاني, للطلبة حبايبنا اللي داخلين المدارس والكليات قريب

لو عندك مادة كبيرة جدا

زي المواد اللي فيها حفظ مثلا

التاريخ, الفلسفة ,اللغة العربية

قسم المنهج لأجزاء صغيرة, وخلص مذاكرة كل جزء لواحده

وكافئ نفسك, في كل مرة تخلص جزء المذاكرة الصغير اللي عليك

وأدينا بنقولك أهو قبل السنة الدراسية ما تبدأ

إنك تذاكر من أول السنة, وماتكومش المذاكرة عليك

وبكده هاتلاقي نفسك بتطبق طريقة تقسيم المنهج لأجزاء من غير ما تحس

لأنك هاتذاكر المناهج أول بأول… وهاتاكل المناهج … قطمة قطمة

ولو إنت بتشوف الحلقة دي بعد الدراسة ما بدأت, مهما كان فاضل أد إيه على الإمتحانات

قسم الشغل اللي وراك برضه, وإبدأ من دلوقتي حالا

وشوف حلقة مذكرات طالبة مثالية, علشان تعرف إزاي تقسم المناهج بطرق مختلفة

صوت مهندسة بانسيه: أسلوبي…يا أسلوبي… هو إنت بتجري كده ليه؟؟؟

مثال ثالث:

الناس اللي بتبدأ أي مشروع جديد……المشروع بيتجزء اجزاء صغيرة

تبدأ تدرس السوق ومدى إحتياجه لمشروعك

وده يعتبر جزء

جزء تاني إنك تبدأ تدرس المنافسين اللي بيشتغلوا في نفس مجالك

وكمان جزء مهم, إنك تدرس الأماكن اللي هايتم فيها المشروع

وبعديها عملية التسويق وتحديد التكلفة والميزانية

وبعد كده مرحلة التجربة والبدأ في العمل

وهكذا

لحد ما هيكل المشروع يتبنى ككل

زي العمارة لما بتتبنى

بتتبنى مرحلة مرحلة ودور دور

لغاية لما السكان يسكونوا فيها, بعد ما كانت لسه حتة أرض فاضية

المهم إننا نبدأ أي بداية, تمشينا خطوة للأمام

صوت مهندسة بانسيه: إيه يا أسلوبي, بتعمل إيه عندك عند فلافيلو, وإيه الشوكة والسكينة والطبق دول… إنت جعان؟؟؟

أسلوبي: مش حضرتك بتقولي: ناكل فيل ونقطعه حتت صغيرة

وأنا جعان وقولت أقوم أقطعلي حتة

و أديني بأسمع الكلام أهو,

مهندسة بانسيه: إشمعنى دي يعني يا أسلوبي اللي سمعت الكلام فيها

تعالى هنا بدل ما يعملك بادچ يا أسلوبي ومانعرفش نطلعك معانا في الحلقات بعد كده

تعالى تعالى, هاخليك تقول الخاتمة بتاعة الحلقة علشان ماتعيطش

أسلوبي: بيضحك زي طفل شرير

بصوا يا كل شاب وفتاة

أنا إتنبح صوتي أنا والفيل الغلبان ده (صوت فيل)

وكل شوية نيجي نقول نفس الكلمتين

شير الحلقة, وإعمل منشن لكل أصحابك

وإضرب بزلومتك الجميلة دي….آآآآ قصدي بصوباعك الجميل اللي شبه الزلومة ده على زرار اللايك

و إكتبلنا برشاقة الفيل بتاعتك: إيه أكبر فيل عندك المفروض تقطعه

ماتخفش يا فلافيلو… انا بس اللي هاقطعك

(فلافيلو يضرب بزلومته أسلوبي يخليه يلزق في الكاميرا)

إعمل متابعة\سابسكرايب لقناة أسلوب على يوتيوب, علشان توصلك حلقاتنا أول لما تنزل
http://bit.ly/osloop-sub
وكمان نزل برامج أسلوب للأيفون والأندرويد… علشان توصلك جميع حلقات أسلوب بالترتيب الصحيح
نزل أسلوب على ‫#موبايلك ‫#الأندرويد من هنا:
http://bit.ly/osloop-android
وأسلوب ‫#أيفون من هنا:
http://bit.ly/osloop-iOS-eg
وده, ‫#موقع أسلوب:
http://www.osloop.com
وده أسلوب على فايسبوك:
https://www.facebook.com/osloop.life/
وده أسلوب على انستاجرام:
https://www.instagram.com/osloop.life/
وأكيد أسلوب على تويتر:
https://twitter.com/OsloopLife