تحدي ال ٢٤ ساعة من أسلوب: أهلا بيكم في الحلقة رقم ٢٥ من برنامج أسلوب في دقيقة

اللي بنجاوب فيها على الأسئلة اللي بتوصلنا في كومنتس

واللي عمرها ما بتكون دقيقة أبدا أبدا أبد

حلقة النهاردة من أسلوب في دقيقة هي: تحدي ال ٢٤ ساعة من أسلوب

هانتحداك ونتحدى نفسنا لمدة ٢٤ ساعة فقط… كل المطلوب منك إنك تكتب في كومنت: قبلت التحدي ولما يعدي ٢٤ ساعة… ترجع تكتب إنك: كملت التحدي بنجاح

التحدي هو: إنك تقعد ٢٤ ساعة من غير ما تشتكي ولا شكوى واحدة

ولا … شكوى … واحدة

من غير ما تشتكي إن عندك صداع… حتى لو عندك صداع

و من غير ما تشتكي إن الجو حر … مع إن الجو حر

ومن غير ما تشتكي من مشكلة إنقراض طائر الباندا الأحمر… مع إن مفيش إسمه طائر الباندا الأحمر

بس كده… الموضوع بسيط… هاتقعد ٢٤ ساعة فقط من غير ما تشتكي ولا شكوى… وبعدين بعد ال ٢٤ ساعة إبقى إخربها تاني يا سيدي زي ما تحب

ها؟؟؟ قبلت التحدي؟ إكتب بقى في كومنت إن إنت بدأت التحدي دلوقتي… وتعالى نكمل بعدها الكلام الجد

بس لازم تكتب إنك قبلت التحدي علشان ترجع تكتب لنا النتيجة تاني بعد التحدي

الكلام الجد هو: إنت في نعم ربنا

الكلام الجد هو: إن إنت في خير كتير أوي

الكلام الجد هو إن إنت إبن محظوظة أصلا… بس إنت مش عارف

الكلام الجد… إنك عندك موبايل أو كمبيوتر بتشوف عليه الحلقة دي… ودي حاجة المفروض تقدر أد إيه إنها نعمة

الكلام الجد هو إن إنت شايف الرسم ده بعينك

وإن إنت سامع بودنك

وممكن كمان أوي تكون في صحة وعافية

ممكن يكون كمان ليك أب أو أم عايشين و وبياخدوا بالهم منك…

أو ممكن يكون ليك زوجة بتهتم بيك

أو ممكن يكون ليكي زوج جميل وبكرش و بفانلة حملاات

ممكن يكون لك أصدقاء

ممكن تكون دلوقي مش في المستشفى بتتألم

ممكن أوي تكون لسه من شوية كنت بتضيع وقت وبتشحن نفسك طاقة سلبية… وربنا بعتلك حد يفكرك بإنك ترجع تحافظ على طاقتك الإيجابية

ممكن أوي تكوني واحدة عندها أولاد زي العفاريت ومجننين اللي جابوها… لكن هما أغلى عندها من الحياة نفسها وما تقدرش تعيش لحظة لو حد فيهم تعبان أو بيتألم ولو حاجة بسيطة

ممكن أوي تكون في نعم كتييييييرة أوي أوي أوي من ربنا

أكيد طبعا مليون في المية عندك تحديات في حياتك

أكيد عندك حاجات مصعبة عليك الحياة

أكيد عندك مسؤليات و أشغال و تحديات و آلام في الحياة

أكيد طبعا محتاج تقلق على حاجات كتيرة في المستقبل

أكيد طبعا… ده جزء من الحياة

لكن…

إنت …

محتاج….

توقف شكوى لمدة ٢٤ ساعة فقط لا غير… ٢٤ ساعة فقط… تكتبلنا في كومنت إنك قبلت التحدي

وترجع بعد ٢٤ ساعة بالظبط تكتبلنا النتيجة

ما تشتكيش ولا شكوى واحدة

ما تشتكيش لحد

ما تشتكيش جوه نفسك

ما تشتكيش إنك مش عارف تشتكي

إبتسم… إرسم بسمة على وشك المطبق الجميل ده اللي شكل الحلة التيفال مقاس ٥٢ بوصة

إضحك وحس بسعادة لمدة ٢٤ ساعة فقط…

طيب… لما تيجي بعد ١٠ دقايق وتنسى التحدي ده؟  وتلاقي مخك الجميل ده بدأ يطلع لستة الشكاوي الجميلة بتاعته… ها؟؟؟ تعمل إيه؟

أنا هاخمن إنك جميل وشوفت حلقة رقم ٤ من برنامج مكتبة أسلوب… اللي إتكلمنا فيها عن قاعدة ال ٥ ثواني

تروح بقى تطبق قاعدة ال ٥ ثواني دول وتعد بصوت مسموع

خمسة

أربعة

تلاتة

إتنين

واحد

إنطلاق… وتتحرق وتوقف الشكوى و… تحمد ربنا على حاجة واحدة من الخير اللي إنت فيه

تمام؟؟؟ مستعد تبدأ التحدي؟ مستعد ترجع تكتبلنا عملت إيه في ال ٢٤ ساعة اللي فاتوا؟

ولو ما كنتش شوفت حلقة برنامج مكتبة أسلوب “ قاعدة الخمس ثواني”… هاتلاقي اللينك بتاعها في الديسكريبشن تحت الفيديو

و لو عاوز حلقات تانية من برنامج “أسلوب في دقيقة”… يبقى أكيد محتاجين إنك تكتبلنا شوية أسئلة حلوة كده في كومنت

يالا نجرب قاعدة الخمس ثواني مرة تانية؟

قول معايا بصوت عالي كده:

خمسة

أربعة

تلاتة

إتنين

واحد

إنطلاق… إضغط لايك… إضغط سابسكرايب… إبدأ التحدي

سلااااااام

رابط حلقة: قاعدة ال ٥ ثواني

 

طبق بقى قاعدة ال ٥ ثواني لما تجيلك أي أفكار سلبية أو تحاول تشتكي تعد بصوت مسموع 5 4 3 2 1 وتوقف الشكوى وتفكر في نعمة من نعم ربنا عليك يا أمووووور