أهلا بيكم في الحلقة رقم ٧ من برنامج: أسلوب في رمضان

وحلقة بعنوان: إشكرني شكرا

سؤال ليك: هل ليك صاحب أو قريب أو إنسان بتحبه بجد, وحاسس إن ربنا بيحبك إنه بعت الإنسان ده في حياتك؟

الإجابة هاتختلف من واحد لواحد… لأن في ناس مننا بتعرف تلاحظ الناس الجميلة اللي حواليها

وناس مننا, مابتكونش مقدرة أد إيه هما محظوظين بوجود ناس فعلا نادرة في حياتهم… ناس جميلة بجد

لكن اللي إحنا متأكدين منه:… إن إنت محتاج تدور على شخص جميل يكون صاحب ليك

إنت فعلا محتاج شخص يكون قلبه طيب, مش بتاع مصلحته… بيعامل الناس بقلبه

إنت بجد… محتاج تدور على شخص يكون الإبتسامة على وشه دايما

يشجعك لما الدنيا تقفل

يبتسم في وشك ويديك أمل ويخرجك من أي موقف صعب

إنت أكيد محتاج صفات كتيرة جدا في صديق يكون جانبك دايما

صفات عكس الصفات اللي في الناس اللي حواليك ومش بتحبهم

إنت محتاج بني آدم بجد, يكون معاك في رحلتك في الحياة

وأهم حاجة… إنه يكمل معاك الحياة وعمره ما يسيبك ويمشي أبدا

لو لقيت الصديق الجميل ده… تأكد إنه هايغير حياتك كلها للأحسن

هايغيرك إنت نفسك للأحسن… وهاتكون لصديقك ده… أجمل صديق

هاتحافظ عليه بجد… وإنت كمان هاتتمنى إنك تعمل كل اللي تقدر عليه علشان ترد له الخير والحب اللي بيوصله لك

لو الشخص ده لسه صعب إنك تلاقيه لغاية دلوقتي… يبقى إنت اللي لازم تكون الشخص ده

لأنك إنت الشخص الوحيد اللي مش هايسيبك أبدا

إنت الشخص الوحيد اللي هايكون معاك طول العمر

إنت ممكن تبتسم لنفسك كل يوم الصبح, وتدي لنفسك أمل في الحياة

إنت ممكن تشجع نفسك على عمل الخير… وتقول لنفسك… يالا نقوم ونعمل خير

إنت ممكن تتحرك وتشوف إنت كنت تتمنى صديقك يعمل لك خير إيه بدون مقابل

وتقوم إنت تعمل الخير ده في شخص غيرك بدون مقابل

زي ما إنت بالظبط محتاج الشخص الجميل ده يكون صديق لك… ويكمل الحياة معاك

كل الناس اللي حواليك محتاجين الشخص ده هما كمان

والناس اللي حواليك هما كمان: هايتغيروا جدا جدا لما تكون إنت الشخص الإستثنائي اللي حواليهم

هما كمان هايتمنوا إنهم يردوا لك الخير والسعادة

زي بالظبط ما إنت لو عندك صديق بالمواصفات دي… هاتتمنى ترد له الخير… وهاترد له الخير أضعاف لما يكون في إستطاعتك

كل الناس اللي حواليك برضه هايعملوا نفس الشيء معاك لما تكون إنت الصديق الخير ليهم

مبروك وظيفتك الجديدة في الحياة دلوقتي حالا

مبروك بجد إنك هاتكون دلوقتي حالا أفضل صديق لنفسك

وأفضل صديق للناس اللي حواليك

إنسان راقي

إنسان نقي

إنسان متعلم

إنسان بتنشر الخير والسعادة والتفاؤل والعلم والخير

إنسان تنشر الخير… وتكف الشر عنك وعن الناس

#مبروك #بجد

# تعالى بقى نحط خطة مع بعض… إزاي نكون فعلا أفضل صديق لنفسنا

ونخلي أي إنسان فعلا محظوظ إنه يكون في محيط حياتنا

هات كراسة: أسلوب في رمضان بتاعتك, وإكتب معايا الكلام المهم جدا ده

وفقرة بعنوان: إشكرني شكرا

——> في كتاب مشهور جدا, أكيد معظمنا يعرفه إسمه: كيف تكسب الأصدقاء وتؤثر في الناس

How to win friends and influence people

في الكتاب ده بيتكلم عن قوة شكر الناس على كل حاجة بسيطة بيعملوها 

وبيقول: إن في واحدة بتقول: أنا أي مرة عملت حاجة مش كويسة في أي شخص… حتى لو مش بقصدي… الشخص ده بيعرفني كذا مرة إني عملت فيه حاجة مش كويسة… بنية منه إني ما أكررش الموضوع ده معاه تاني

لكن كتيييييير جدا جدا, لما بعمل الحاجات الكويسة مع حد… نادرا لما حد بياخد باله ويشكرها فعلا … حتى ولو كان بنية إنها تكرر عمل الحاجة الكويسة دي معاه مرة تانية

القصة دي وضحت للكاتب أد إيه إن كل واحد فينا عنده فرصة كبيرة جدا إنه يكون إنسان مميز جدا ومؤثر في كل الناس اللي حواليه, لمجرد إنه يختار إنه يشكر الناس على كل حاجة بيعملوها كويسة…

لأن: لما إنت اللي تختار إنك دائما تقول شكرا لأصدقائك على الحاجات الكويسة اللي بيعملوها معاك… أولا هاتدخل السعادة عليهم وهايحبوك فعلا وتكون صديق نادر

ثانيا…. هايكرروا الموضوع ده معاك علشان إنت صديق جميل وحبوب

والجميل إنك دائما هاتكون بترد الخير للناس… على عملهم الطيب معاك… أو حتى محاولتهم إنهم يعملوا حاجة كويسة… حتى لو مانجحوش

طيب… تعمل إيه بالظبط؟

إختار حد عمل معاك حاجة كويسة, وروح قول له شكر دلوقتي

روح لمامتك دلوقتي وشوف إيه آخر حاجة جميلة عملتها لك, وقولها: شكرا يا أمي على تعبك معنا برغم كل تحديات الحياة

قريب أوي إن شاء الله هايجي اليوم اللي هاتفرحي بتعبك ده معانا

شوف آخر حاجة باباك عملها لك جميلة, وروح إشكره عليها وحسسه إنك فرحان ومحظوظ على وجود آب بيحفر في الصخر علشان يسعد أسرته, برغم الظروف وتحديات الحياة

الأب والأم بيفنوا حياتهم علشان يشوفوك ناجح وسعيد

آقل كلمة شكر ليهم إنك تعرفهم إنك سعيد بسببهم… وإن شاء الله هاتكون ناجح

روح لكل صديق عمل معاك حاجة كويسة أو حاول يعمل حاجة كويسة, مهما كانت بسيطة… 

وإبعتله رسالة غريبة دلوقتي حالا على الواتس آب ولا اي بطيخ وقوله:

شكرا يا أسطى على إنك صاحب تنين بجد… شكر على آجرة المواصلاات اللي دفعتها ليا

او لأنك جيبتيلي ورق أذاكر منه

وأشكره على أخلاقه الطيبة وعمله للخير … وعرفه إن مش كل الناس عندها صاحب بيعمل الخير

حتى لو حد من أصدقائك بيعمل حاجة كويسة من غير مايكون بيعملها لك… إشكره عليها لأنه قدوة للخير

إشكر صديقك اللي مش بيدخن… وقوله: الحمد لله إن إنت فعلا إنسان راقي ومش بتدخن… وإلا كنت هاتكون سبب في تدخيني أنا كمان

إشكري صاحبتك اللي بتروحي تحكي لها مشاكلك وهمومك وخناقاتك, وبتسمعك وتهديكي… وسعات تسخنك… نادر لما تلاقي صديقة كده

إنت كده هاتكون صديق وفي جدا ليهم

وهما هايكونوا محظوظين جدا بصديقهم الجديد اللي فاهم إزاي يكون صديق كويس لأصدقائه

وكمان بيدخل السعادة على قلوبهم

مستني إيه… قوم خليك صديق خير لنفسك ولكل اللي حواليك… ووصل الحلقة دي لكل أصدقائك ولكل معارفك… إعمل منشن لكل واحد مهم في حياتك… وشير الحلقة دي في الخير …. وأكيد ماتنساش قبل ماتعمل أي عمل كويس… إنك تجدد نيتك وتفتكر إنك بتعمل الخير ده عبادة وطاعة لله.

ورمضان كريم