أهلا بيكم في الحلقة رقم ٦ من برنامج أفكار أسلوب

وحلقة بعنوان: تعويم الوقت

أفكار أساسية وهامة جدا لتنظيم وإدارة الوقت… الجزء الثاني

ياهوووووووووو!

الحلقة التانية من برنامج أفكار أسلوب كانت بعنوان: مقدمة عن تنظيم وإدارة الوقت… ودي كانت أول حلقة من حلقات أسلوب تحقق أكتر من ٢ مليون مشاهدة على فايسبوك في أول أسبوع من نزول الحلقة… وده أكيد لأهمية الموضوع الشديدة…

علشان كده, رجعنا بأفكار أكتر عن تنظيم وإدارة الوقت

وقتك ده عامل زي الفلوس بالظبط… إنت اللي بتتحكم في سعر بيع كل لحظة من عمرك

ممكن تبيعها ببلاش

وممكن تعومها

وممكن تستثمرها في بناء نفسك

وممكن تكسب منها ملايين

تعامل مع كل لحظة في عمرك من دلوقتي على إنها فلوس .. يا إما بتصرفها في مقابل حاجة بترجعلك وتفضل معاك طول العمر… يا إما بترمي الفلوس دي على الأرض

وبما إننا في عصر تعويم الفلوس والعملاات…  … يبقى تعالى نشوف إزاي ممكن نسيطر على سعر كل لحظة في وقتنا

إحنا فاهمين كويس أوي إن وقتك مش بيضيع منك علشان إنت عاوز تضيعه… هو بيضيع منك علشان إنت بس مش حاطط الموضوع في دماغك أوي…. وإنت موجود معانا هنا النهاردة علشان توقف نزيف الوقت اللي بيروح من عمرك ومش بيرجع تاني أبدا ده

تنظيم وإدارة الوقت دي من أجمل الحاجات الممتعة في الحياة… محتاج بس شوية أدوات بسيطة … وإبتسامة جميلة على خدودك المقلبظين الملظلظين دول… ياختي ياختيييييي على الخدود

هاتلاقي بعض الخطوات اللي في حلقة النهاردة متكررة قبل كده… وده لأنها هي العلاج الفعال والمجرب لتنظيم وإدارة الوقت

لكن الخطوات المتكررة دي, هانشرحها بتوضيح أكتر… علشان خاطرك إنت بس… هو إحنا عندنا حد أهم من الخدود الجميلة الملظلظة دي… ياختي على الخدووود

للتأكيد تاني: حلقة النهاردة الهدف منها مش إنها تزود اليوم بتاعك وتخليه أكتر من ٢٤ ساعة

الهدف منها إنها تخليك قيمة ال ٢٤ ساعة في اليوم بتاعك أعلى بكتييير أوي… وتنتج فيهم أكبر بكتير أوي.

يالا بينا على الخطوات

الخطوة الأولى

١- راقب وقتك.. وراقب سعر صرف وقتك

…. أيوة… بالظبط… هي دي نفس أول خطوة من الحلقة اللي فاتت من تنظيم وإدارة الوقت

والخطوة دي كافية بجد إنها تغيرلك حياتك كلها

وهانفضل نقولها ونعيد فيها طول العمر

لازم تبدأ تراقب وقتك… وتشوف إنت بتصرف ال ٢٤ ساعة بتوع يومك في إيه بالظبط

علشان تيجي تاني يوم… وتعيد حساباتك في كل لحظة بتصرفها

الخطوة دي بتحتاج تعملها ضروري جدا يوم أو إتنين كل فترة في حياتك

كل ما تلاقي نفسك بتيجي آخر اليوم وماأنجزتش أي حاجة في الدنيا… ساعتها تعرف إنك لازم تنفز الخطوة دي

هات ورقة وقلم… وسطرها

الوقت من… الوقت حتى… وكنت بتعمل إيه في كل لحظة

تعالى نتخيل إنك هاتبدأ من الساعة ١٢ منتصف الليل مثلا

تكتب في كل لحظة بتعمل إيه… وإكتب ملاحظاتك على كل وقت

من ١٢:٠٠ ل ١٢:٣٠ … بسطر الورقة الجميلة دي… نص ساعة تسطير… دا أنا لو بسفلت الورقة كنت خلصتها أسرع من كده

من ١٢:٣٠ ل ١:١٥ …. بستريح شوية وبستعد علشان أعمل الشغل اللي ورايا وقاعد بأجله من إمبارح

من ١:١٥ …. هادخل أنام ساعة بالظبط… وأقوم علشان أشتغل بتركيز وطاقة

صحيت طبعا الساع ٨:٣٠ بمعجزة حربية… عدل بقى الجدول وإكتب

من ١:١٥ ل ٨:٣٠ نوم الهنا… صباحية مباركة يا عريس… لولولييييييييييي

من ٨:٣٠ ل ٩:١٥ بجهز علشان أروح شغلي أو كليتي

أو لو إنت شخص مش بتنزل الصبح

غالبا هاتكمل نوم لغاية الساعة ١٢ الظهر

ماعلينا… إكتب برضه كل لحظة

وراقب كل لحظة من وقتك

إنت مش محتاج تنتظر لتاني يوم علشان تشوف النتايج المذهلة

إنت بس مجرد إنك بتراقب نفسك إنت بتعمل إيه… من نفسك هاتلغي الحاجات اللي بتتعمل لواحدها بدون وعي منك

زي مثلا لما بتمسك موبايلك وبتفتحه على حاجة مش عارف هاتلاقي فيها إيه… زي إنستجرام والألعاب و يوتيوب وفايسبوك … أيوة أيوة… ما إنت غالبا وصلت هنا علشان إنت فتحت بدون وعي وبتهرب (إلا طبعا إذا كنت من عائلة أسلوب وفاتح أبليكيشن أسلوب للأيفون والأندرويد على موبايلك… أو موقع أسلوب دوت كوم).

أنا الخطوة دي بالذات, ومن أول مرة جربتها في حياتي وأنا في الكلية… وهي أكتر خطوة بتضاعف إنتاجي أضعاف كتيرة جدا ومن أول يوم ببدأ أطبقها…

أنا فعلا بشجعك إن إنت ترجع للخطوة دي تاني وتالت ورابع

جربها تاني بنفسك… وشوف إنتاجيتك هاتتضاعف أد إيه

تمام كده؟… لايك بقى جميل على الفيديو… عشان نكمل اللعب … على كبير

الخطوة الثانية:

حط خطة لليوم بتاعك قبل ما اليوم يبدأ… اللي هي تودو ليست يعني

…. عارفين والله إنها نفس الخطوة التانية من الحلقة اللي فاتت

لأن وقتك لسه بيضيع لأنك مش بتنفذ الخطوة دي… وهانفضل برضه نقولك عليها طول العمر

مش إنت كل ما بيجيلك برد… بتاخد نفس نوع المضاض الحيوية ونفس الأدوية… و بتتعالج؟؟؟

تنظيم وإدارة الوقت برضه نفس الحكاية

كل ما وقتك يضيع

هانديلك نفس الدواء… بس لازم تاخده… ولازم تكرره

شركة البرمجة اللي أنا بشتغل فيها عاملين تطبيق تودو للموبايلات الأندرويد والويندوز فون…. هاتلاقي الروابط في الديسكريبشن – صندوق الوصف تحت الحلقة.

لكن إنت مش محتاج أبليكيشن بالضرورة على الموبايل علشان تنفذ الوقت

الخطوة التالتة: إستخدم مبدأ باريتو كل يوم في كل أعمالك : مبدأ ال ٢٠\٨٠

من الآخر… عندك مليون حاجة تعملها كل يوم

أعمال وأحلام وطموحات

مستحيل تخلصهم

لكن… ٢٠٪ بس من الحاجات دي, بتحقق ٨٠٪ من نجاحك في حياتك

يعني لو عندك ١٠ أعمال المفروض تعملهم النهاردة

هايكون فيه حاجتين بس من ال ١٠ حاجات دول, هما المسئولين عن ٨٠٪ من نجاحك في الحياة

المفروض تخصص أكبر جزء ممكن من وقتك وتركيزك في اليوم للحاجتين دول… وباقي الوقت تقسمه على الأعمال الأقل أهمية

تعالى ناخد مثال

لو كتبت التودو ليست بتاعتك النهاردة وكانت زي كده:

١- شغل أو مذاكرة

٢- ترفيه وقت محدد

٣- تخليص ورق مهم في مصلحة حكومية لذيذة

٤- شراء هدوم علشان مناسبة مهمة

٥- ممارسة رياضة

٠٠٠٠٠

ال ٥ أعمال اللي وراك دول… فيه ٢٠٪ منهم (اللي هو عمل واحد)

هو اللي هايساهم في نجاحك بنسبة ٨٠ في المية

ممكن يكون العمل ده هو: الشغل أو المذاكرة (الموضوع طبعا بيختلف من شخص لآخر)

لما تحدد بقى أهم ٢٠٪ من أعمالك… إديهم أكبر نسبة من وقتك وتركيزك في اليوم… وخلي باقي الوقت الصغير لباقي الأعمال.

———

مثال تاني لأهمية الموضوع الشديدة أوي

لو إنت بتبيع حاجة أو منتج… محل ملابس مثلا

هايكون عندك أعمال كتيرة جدا جدا جدا طول اليوم تعملها

ترتيب وتظبيط وإعلانات وكلام مع موردين … حاجات كتيرة جدا

لكن… ٨٠٪ من نجاحك هايرجعوا من أعمال قليلة جدا… اللي هما:

لما يكون عندك عميل… تركز معاه جدا, وتساعده جدا إنه يختار الحاجة المناسبة له, لأن هو اللي في الآخر اللي هايشتري المنتج وهاينجح لك المشروع بتاعك

ماينفعش بقى تكون ضيعت كل وقتك ومجهودك في كل الحاجات المهمة التانية… ولما يجيلك عميل, ما يكونش عندك طاقة إنك تساعده وإنت كلك حماس وطاقة وإبتسامة

…. مبدأ باريتو ده, هايرفع سعر وقتك جدا جدا, لأنك هاتكون بتصرفه في أكبر إستثمار بأعلى مكسب وعائد.

الخطوة الرابعة: تقنين وقت إستخدام السوشيال ميديا

لازم إستخدام السوشيال ميديا والألعاب يكون متقننن بجد وبدون أي تهاون

زي مثلا… إنك تقول من أول ٧ مساءا, مفيش أي سوشيال ميديا أو شات أو جيمز أبدا لغاية الساعة ٧ صباحا

لازم لازم لازم تنفذها

بس أول يوم هاتعمل كده مش هاتقدر

مفيش مشكلة أبدا

كل ما تكسر القاعدة دي… تقوم وتتوضى وتصلي ركعتين

ولو كنت جربت الموضوع ده من نصيحة قولناها قبل كده… هاتعرف عن تجربة إنها مرة واحدة بس

ومستحيل تفتح السوشيال ميديا بعد الساعة ٧ مساء أبدا… لأن الشيطان هو اللي هايقولك…. إخذي الشيطان يا إسراء… ملوش لازمة الفايسبوك … مش طالباكي هي عالصبح

المهم إيه؟؟؟

أيووة… شاطر وحبوب وخدودك مقلبظين التنين

المهم … التنفيذ

——

الأربع خطوات الجميلة دول مهمين جدا جدا جدا

لازم تكتبهم في كراستك بتاعة أسلوب

وتبدأ تنفذهم من دلوقتي حالا

هاتحس بسعادة حقيقية في قلبك لما تنفذ الخطوات دي في يوم واحد

وهاتساعد نفسك جدا في إنك تعلي سعر صرف وقتك

وقتك… هو حياتك

وقتك… هو عمرك

وقتك… تقدر تستمتع بيه وتبني بيه نجاح بجد

وإنت بعد لما وصلت لآخر الحلقة دي, بقى معاك أدوات تعلي قيمة وقتك وقيمة حياتك جدا

إوعى تضيع الأدوات دي

… هانفكرك مرة تانية

كل مرة هاتشوف فيها الحلقة دي, هاتلاقي نفسك بتسمع معلومات لأول مرة

وهاتتشجع ونفسك هاتتفتح على الإنتاجية كأنك بتسمعها أول مرة

إرجع شوف الحلقة دي تاني وتالت ورابع ومليون كل ما وقتك يبدأ يضيع منك

وإشترك في قناة أسلوب على يوتيوب

و وصل الحلقة دي لكل الناس اللي بتحبهم… علشان يستفيدوا …

ولكل الناس اللي مش بتحبهم… علشان إنت جميل وحبوب وخدودك طعمين

خليك كريم… خليك حبوب

إعمل متابعة\سابسكرايب لقناة أسلوب على يوتيوب, علشان توصلك حلقاتنا أول لما تنزل
http://bit.ly/osloop-sub
وكمان نزل برامج أسلوب للأيفون والأندرويد… علشان توصلك جميع حلقات أسلوب بالترتيب الصحيح
نزل أسلوب على #موبايلك #الأندرويد من هنا:
http://bit.ly/osloop-android
وأسلوب #أيفون من هنا:
http://bit.ly/osloop-iOS-eg
وده, #موقع أسلوب:
http://www.osloop.com
وده أسلوب على فايسبوك:
https://www.facebook.com/osloop.life/
وده أسلوب على انستاجرام:
https://www.instagram.com/osloop.life/
وأكيد أسلوب على تويتر:
https://twitter.com/OsloopLife