أبدأ يومك مع مبادئ أسلوب

والمبدأ رقم 16 من سلسلة ال 21 مبدأ لحياة أكثر إيجابية

خليك كسلان… بس بذكاء

كده ولا كده لازم يكون عندنا وقت بنكسل فيه إننا نعمل شوية حاجات

خليك ذكى وكسل انك تضيع وقتك على الحاجات التافهة

زي الفايسبوك و تويتر وانستجرام وسناب-تشات وقرابيهم (أقرباءهم)

ركز وقتك و مجهودك في الحاجات اللى هاتفيدك فعلا في نجاحك

كسل مثلا إنك تروح تقعد على القهوة

وكسلي إنك تتفرجي على التليفزيون

لكن ما تكسلش إنك تتابع معلومة تفيدك

وما تكسلش إنك تتعلم حاجات جديدة من على اليوتيوب

وما تكسليش إنك تلعبى رياضة أو تقرأي كتاب

مافيش حد بينجح من كتر القعدة على الفايسبوك مثلا

انت لما بتفتح الفايسبوك, فيه طاقة كبيرة أوي بتتسرب منك

وكل ماتفتحه بيفضل يسحب منك طاقة ووقت أنت محتاجة فى يومك.

الفايس بوك ده فعلا بيعرضك لكمية تغيير فى المشاعر فى وقت صغير جدا,

بتشوفي صورة لصاحبتك فى فرحها …فاتفرحي,

و تشوفي بوست بعدها علي طول لخبر وحش او حادث اتعرض ليه حد من معارفك …فتزعلي اوي و تحزني,

و بعدها تشوفي شنطة حلوة معروضة فى جروب فتبقي نفسك تشتريها

——

كمية لخبطة فى المشاعر و تلف للأعصاب

وبتخلينا نبعد كل البعد عن اننا يكون عندنا هدوء نفسي وذهن صافي.

اوعوا تقعوا في فخ الفايسبوك والإنستجرام والتويتر وخلافهم

أكيد إنتوا عارفين إن الأبليكيشنز دي, سلاح ذو حدين

خصص وقت محدد في اليوم, ومدته تكون قصيرة

علشان تفتح مواقع التواصل الإجتماعي

غير كده, إستغل باقي اليوم الإستغلا الصح, اللي يعود عليك بأحسن نفع

وأحسن شعور

زي الشعور بإنك أنجزت الشغل اللي وراك

و واحدة واحدة درب نفسك, إنك تنعزل عن البرامج دي طول اليوم, ماعدا الوقت اللي هاتخصصه بمزاجك إنت

وعلشان برضه تبقى متابع الدنيا بيحصل فيها إيه

جرب وإبدأ من النهاردة

إنك ماتدخلش على الفايسبوك, أو تويتر أو انستجرام وغيرهم غير وقت محدد تحدده في اليوم

هاتلاقي بجد أعصابك هديت

وهاتبدأ تحس بسلام نفسي, دا غير إن إنتاجيتك بكل تأكيد هاتزيد

لو إنت مش بتقدر تقعد ساعة على بعض من غير ما تفتح موبايلك

علشان تضيع وقتك على الجيمز والفايسبوك

يبقى مرحبا بك في فريق المدمنين

جه الوقت اللي ندخلك مصحة العلاج من الإدمان

والنهاردة اليوم الأول ليك في العلاج

واللي هاتقرر فيه بنفسك إنك تقاوم أي حاجة بتضيع وقتك وتستنفذ طاقتك, خلي وقتك له قيمة, تخليك تنام بالليل فرحان وفخور بنفسك

مش هايجرى حاجة والله لما تقفل الفايسبوك وتقوم تشتغل أو تقومي تذاكري

الدنيا مش هاتتهد لو ماروحتش تقعد على القهوة وتضيع وقتك

سعر الدولار مش هايقل لما تفوتك حلقة من مسلسل العشق البنفسجي

ماتخافيش, هايتجوزها في الآخر

(أسلوبي بيلعب بالأيباد)

أسلوببيييييي… إنت لسه قاعد بتلعب جيمز من ساعتها

(صوت أسلوبي: ثواني بس هاشوط آخر شوطة… الماتش بدأ يسخن)

يا أسلوبييي… ريح دماغك شوية, دا أنا بقالك أكتر من ساعة بتتغلب, كفاية تضييع وقت

(صوت أسلوبي… خلاص قفلت اللعب أهو… برضه … سنظل أوفياء)

وأمال ليه لسه باصص في موبايلك يا أسلوبي

(صوت أسلوبي: ما هو أنا ببص بصة واحدة على الفايسبوك

وبعدها هارد على صاحبي على الواتس آب)

مفيش فايدة فيك يا أسلوبي

تعمل لايك وشير للحلقة لكل أصحابك المدمنين

وتقفل بعدها الموبايل على طوووول, وتقوم تخلص الحاجات اللي وراك

إعمل متابعة\سابسكرايب لقناة أسلوب على يوتيوب, علشان توصلك حلقاتنا أول لما تنزل
http://bit.ly/osloop-sub
وكمان نزل برامج أسلوب للأيفون والأندرويد… علشان توصلك جميع حلقات أسلوب بالترتيب الصحيح
نزل أسلوب على #موبايلك #الأندرويد من هنا:
http://bit.ly/osloop-android
وأسلوب #أيفون من هنا:
http://bit.ly/osloop-iOS-eg
وده, #موقع أسلوب:
http://www.osloop.com
وده أسلوب على فايسبوك:
https://www.facebook.com/osloop.life/
وده أسلوب على انستاجرام:
https://www.instagram.com/osloop.life/
وأكيد أسلوب على تويتر:
https://twitter.com/OsloopLife