الخطوة الأولى:

إعرف إن عمل الجدول ده بياخد شوية وقت حلو أوي…. مش بيتعمل في ١٠ دقايق أو حتى ربع ساعة… ده ممكن ياخد ساعتين كاملين أول مرة تعمله… بس ده مش بيكون وقت ضايع أبدا

بالعكس… دا إنت هاتجمع الدنيا كلها في دماغك و في لوحة كاملة تخليك ما تضيعش وقت أبدا

يعني هاتستثمر ساعة أو ساعتين في أول الأسبوع تعمل فيهم الجدول

ولما تمشي على الجدول ده, هاتوفر لنفسك كل الساعات والساعات والساعات الي كانت بتطير منك من غير تخطيط على الفايسبوك وعلى اليوتيوب وعلى جميع أنواع الهبل كلها

خلاص… فهمت الإستثمار بتاع وقت عمل الجدول ده؟

لو مناسب لك إنك تستثمر ساعة أو ساعتين في عمل الجدول وتوفرهم باقي الأسبوع… يبقى روح للخطوة التانية

الخطوة الثانية:

إكتب ليسته ب كل الحاجات اللي المفروض تعملها الاسبوع ده

كل الحاجات, سواء لها علاقة بالدراسة أو ب غير الدراسة

مثلا:

  • لو إنت لسه بتروح المدرسة – إكتب إنك هاتروح المدرسة مثلا من ٧ الصبح ل ٤ العصر
  • إكتب مواعيد الدروس الخصوصية بتاعتك … وحط كمان الوقت اللي إنت بتاخده في المواصلات أو مشوار الذهاب والرجوع من الدروس
  • إكتب أسماء المواد اللي المفروض تذاكرها الاسبوع ده
  • إكتب الجزء من المنهج اللي المفروض تخلصه الأسبوع ده

كل اللي فوق ده, المفروض تكون كتبته في ورقة طويييييلة أوي

….

طبعا إحنا متفقين إنك بتكتب ورايا الكلام ده دلوقتي… مش بتتفرج بس

بس إنت غلبا مش بس مش بتكتب… دا إنت شكلك كده بقيت في حتة تانية خالص و مش فاكر أصلا إحنا وصلنا ل نقطة رقم كام

ولا بنتكلم عن حلقة إيه أصلا!

تعالى تعالى… هافكرك

إحنا قناة أسلوب

وإنت المفروض يعني بتتفرج على الفيديو ده علشان تتعلم تعمل جدول للمذاكرة والشغل اللي وراك

وإنت كمان المفروض تكون جايب ورقة وقلم وبتكتب ورايا… بس يا عيني إنت توهت مني

بس على مين… أنا ركنت على جانب أهو يا عم… وركبتك معانا تاني

خليك حلو بقى وإكتب عالصبح!

الخطوة الثالثة:

تسطير الجدول

إنت ممكن تعمل الجدول الفعلي ده على إكسل شيت أو جوجل سبريد شيتس أو أي برنامج جداول في الكوكب ده… لو ده كان أسهلك طبعا… بس أنا عن نفسي بحب من وقت للتاني إني أعمل الجدول على لوحة حقيقية…… بس إنت و مزاجك طبعا

لو هاتعمل الجدول على لوحة ورق حقيقية زيي, يبقى إنت هاتحتاج تجيب أكبر ورقة ممكنة … ممكن لوحة عريضة من اللي بيترسم عليها لوح ومعلقات… أو ورق وتلزقه جنب بعضه بالعرض… مش هاتفرق والله حتى لو كتبت على ورق حلاوة… المهم تكتب

حاول بقى تسطر اللوحة أو الورقة بتاعتك بالطريقة اللي إنت شايفها أدامك دي

أيام الأسبوع من السبت للجمعة على اليمين فوق بعض

و الساعات من ٧ صباحا مثلا ل ٧ صباح اليوم التاني (٢٤ خانة)

أنا بحب أحط كل ساعة في ٣ أو ٤ سم … علشان الساعات هاقسمها بعد كده

تمام… شايف التسطير ده… دوس في الخطوة الرابعة

الخطوة الرابعة

نملى بقى المربعات الجميلة دي … بالحاجات اللي عندنا واللي المفروض نعملها

تعالى نجرب بأمثلة جميلة كده

لو إنت مش أيام الإمتحانات, ولسه بتروح المدرسة

يبقى هاتحط أوقات المدرسة كلها وتعلم عليها زي كده مثلا

(صورة الجدول بيتملئ في الساعات بتاعة المدرسة… من ٧ صباحا وحتى ٤ عصرا)

بعد كده على طول, نملئ الجدول بالمواعيد اللي مش بمزاجنا

زي… مواعيد الدروس مثلا… وطبعا دي بتختلف من واحد للتاني

أنا هاحط أمثلة من مواعيد الدروس بتاعتي أيام لما كنت في ثانوي

زي كده… الدنيا بدأت تتملى أهوا

الخطوة الخامسة

إنت لغاية دلوقتي… حطيت المواعيد في الجدول اللي مفيش لك أي إختيارات فيها أبدا

الكلام الكبير بقى, في المواعيد اللي لك إختيارات فيها

مواعيد المدارس والدروس دي ثابتة مش بتتغير … ياريت تكون كتبتها بقلم جاف أو قلم مش بيتمسح وخلاص

والفراغات بقى تبدأ تخطتها بقلم رصاص… لأنك هاتحتاج تعدل الجدول كل كام يوم كده… خصوصا في الأوائل

إبدأ بقى شوف الفراغات اللي قبل مواعيد الدروس… وشوف هاتحط فيها مذاكرة المادة اللي عندك فيها دروس… ولا نوم قيلولة ولا إيه بالظبط

سيب فراغات عقلانية بين المواعيد

يعني مثلا مش يبقى عندك درس الساعة ٦ … وتكتب إنك هاتذاكر قبله من ٥:٣٠ للساعة ٦

لأن أكيد لو عندك درس الساعة ٦ مثلا… أكيد أكيد أكيد هاتحتاج وقت علشان تلبس وتنزل تروح درسك… ممكن يكون الوقت ده ١٥ دقيقة وممكن يكون أكتر من ساعة… حسب الوقت اللي بتاخده علشان تروح درسك

الخطوة السادسة

والخطوة دي فعلا مهمة جدا جدا جدا

ألا و هي… التعديلات على الجدول

جداول المذاكرة, هي جزء مهم جدا من إنك تتعلم التخطيط في الحياة

الإستفادة منه, مش مجرد إستفادة إنك هاتعمل جدول تذاكر عليها

لأه خالص… ده هايعلمك إزاي في المستقبل إن شاء الله تعمل جداول دراسة جدوى للمشاريع, وجداول تخطيط للمشاريع… وجداول وخطط كتيرة أوي

المهم… الخطوة الخامسة… هي التعديلات على الجدول

أول مرة هاتعمل الجدول, التخمينات بتاعتك بتاعة الوقت هاتكون أكيد بايظة جدا

ممكن تحط مثلا ساعة ونصف مذاكرة مادة محددة… بس الساعة و نصف دي ماتخلصش فيها غير مثلا ١٠ أو ٢٠ في المية من اللي كنت ناني تخلصه

مش مشكلة خالص… دي حاجة لازم هاتحصل

المرة اللي جاية وإنت بتعدي على نفس المادة, هاتعرف تحط وقت مناسب أكتر أد إيه… وكمان هاتحاول تشد أوي علشان تخلص في الوقت المتاح

مرة تانية… الجدول هايجبرك إنك تحط الحاجة اللي المفروض كنت تعملها في الجدول نفسه

في النهاية بقى… أكيد إنت شوفت إن الجدول ده هايختلف مليون في المية حسب مواعيدك وخطتك

ومفيش جدول واحد ممكن نعمله أبدا ونبعتهولك تمشي عليه

لكن بنوعدك بجد, إن أي جدول هاتعمله, هايكون أفضل من عدم وجود جدول خالص

ولما تعمل جدول… إلتزم بالأعمال اللي فيه

و لو عملت جدول و مامشيتش عليه بالظبط, مفيش أي مشكلة أبدا…. إبدأ عدله تاني وإبدأ من الأول تاني

وغالبا هاتحتاج تبدأ من الأول تاني كل يوم … ماتقلقش يعني وما تشتكيش إنك عملت جدول وما مشيتش عليه من أول كام مرة

لأن ده طبيعي جدا… وهو ده اللي إحنا قولنالك عليه في الخطوة رقم ٦

سيب بقى موبايلك الجميل ده… وروح إعمل الجدول بتاعك وشجع نفسك على تنظيم وقتك وعلى المذاكرة

وإبقى إرجع للحلقة دي مرة قبل ما تبدأ تعدل جدولك تاني

لأن مرة واحدة مستحيل تستوعب فيها كل المعلومات اللي في الحلقة دي

لايكك الجميل على الفيديو

وإبعت لينك الفيديو ده لكل جروبس الفايسبوك والواتس آب اللي عندك اللي ممكن يكون فيها ناس عندها مذاكرة من أي نوع

وماتنساناش في دعوة جميلة كده وإنت قايم

سلاااااام