شهادة ميلاد

 

أهلا بيكم في الحلقة رقم 3 من برنامج أسلوب في رمضان

بعد تاني يوم صيام… رجعنا تاني وحلقة بعنوان: شهادة ميلاد

خلينا نقف مع بعض الأول وقفة… ونقولك… مبروك

بجد مبروك

يا باختك إن إنت موجود دلوقتي حالا… وحاضر معانا هنا في رمضان السنة دي … وبتسمع كلام يحفزك ويدلك على فعل الخير والإيجابية والطاعات

وتبقى جميل أوي بزيادة… لو إنت من الناس اللي بيرجعوا يشوفوا الحلقات دي بعد رمضان… علشان يفكروا نفسهم بأيام الخير والثواب والفضل والسعادة وراحة القلب والبال

بنقولك مبروك: لأن إنت عايش دلوقتي حالا فرصة كبيرة أوي في الحياة

إحنا جايين النهاردة علشان نقولك: إنت إنسان جديد

أيوة… إنت دلوقتي حالا فرصتك إنك تبدأ كل حياتك من جديد

فرصتك … إنك تختار إنك تنسى الماضي كله وتمسحه من حياتك ومن تفكيرك… وتبدأ على نضيف… صفحة بيضة وجديدة من دلوقتي حالا

تنسى كل مشاكل الماضي

كل أخطاء الماضي

كل تحديات ومحبطات الماضي

وتاخد قرار دلوقتي حالا إنك تبدأ بداية جديدة في كل حاجة

بداية جديدة مع ربنا

تبدأ توبة حقيقية نصوحة

توبة تفرح بيها قلبك

توبة من كل حاجة غلط إنت بقالك كتييييير أوي نفسك إنك تبطلها وبتدعي ربنا إن إنت تبطل الحاجة الغلط دي

توبة تخليك فعلا سعيد في حياتك

توبة تخليك قريب من ربنا بقلبك… توبة تخليك في قمة الحياة والحضور والتركيز والخشوع والسعادة وإنت واقف تصلي بين إيدين ربنا

بداية جديدة… قلب جديد… صفحة جديدة

كل واحد فينا, بيتولد أول مرة في حياته بدون إختياره… وبيتعلم حاجات في حياته من غير إختياره…. وبيتفرض عليها ظروف كتيرة طول حياته بدون إختياه…

حتى كل كلمة بتكتب في شهادة ميلاد كل واحد فينا … بتكون كلها بدون إختياره

لغاية لما بنوصل لنقطة التحول… نقطة التحول اللي هي حلقة النهاردة!

كل واحد فينا, بيفضل ماشي في الطريق اللي مش من إختياره, لغاية لما بيوصل لنقطة الإستيعاب… لغاية لما بيوصل ل لحظة عقل ولحظة نضج وإرادة تغيير وإرادة سعادة وإرادة نجاح… وبيبدأ فيها لحظة ميلاد جديد بجد

إنت كده النهاردة

إنت كده دلوقتي حالا

تقدر تكتب لنفسك شهادة ميلاد جديدة دلوقتي حالا

تنسى فيها كل حاجة إنت مش راضي عنها عملتها

وتجيب ورقة وقلم بجد…  وتكتب فيها شهادة ميلاد جديدة

هات الكراسة اللي إتفقنا إنك تعملها لحقات #أسلوب في #رمضان

وهات الصفحة رقم ٣ – لتاني يوم في رمضان

و إكتب فيها: شهادة ميلادي الجديدة

إكتب في الصفحة دي إسمك

وإكتب في الصفحة دي وصفك اللي تحب توصف بيه نفسك بجد

ماتسمعنيش إلا علشان نكتب مع بعض شهادة ميلادك الجديدة

وأنا زيك دلوقتي حالا هاكتب لنفسي شهادة ميلاد جديدة

إكتب فيها إسمك

وإكتب فيها وصفك اللي نفسك توصل له بالظبط… إكتب فيها كل اللي عاوز تشوفه في نفسك بالظبط

إكتب فيه الشخص اللي عاوز توصل له وتبقى الإنسان الجديد ده

إكتب فيها: إنت علاقتك إيه مع ربنا؟ منتظم في الصلاة والعبادة؟ ولا … لأه… مش عاوز تكون منتظم في الصلاة والعبادة؟

إكتب فيها: وإنت بتصلي: هل قلبك مع ربنا؟… مش شايف ولا سامع أي حاجة غير إحساسك بوقوفك أمام خالق السموات والأرض؟ واللي بأيده الكون كله؟ ولا بتصلي وإنت بتحسب هاتخلص إمتى وسرحان في حاجات تانية؟

إكتب في شهادة ميلادك الجديدة: شكلك عامل إزاي؟… رياضي وجسمك متناسق؟… ولا بكرش وغير متناسق الجسم ومش قادر تاخد نفسك؟

إكتب فيها إنت أمين ومتقن في عملك؟ ولا محترف إلقاء لوم على الظروف وزملائك في العمل والمديرين والمؤامرات الخارجية والكواكب المحيطة بالكوكب بتاعنا؟

إكتب في شهادة ميلادك دي… إنت شاطر في إيه؟ بتتبع مين؟ بتقرأ إيه؟ بتتعلم إيه كل يوم؟

إكتب في شهادة ميلادك دي… هل إنت صادق مع نفسك ومع كل الناس في كل لحظة في حياتك؟ ولا إنت جبان ماعندكش كرامة وبتستخبى ورا كذب رخيص بيقلل من كرامتك ومن إحترامك لنفسك؟

إكتب لنفسك دلوقتي حالا شهادة ميلاد جديدة بإيدك

بس الفرق في شهادة الميلاد دي… إنها بإختيارك إنت

كل حرف هاكتبه في شهادة الميلاد ده… هي الرسمة اللي هاتوصل لها في يوم من الأيام إن شاء الله

شهادة ميلادك دي تفضل حاططها أدامك طول العمر

تعلقها… وتزود فيها كل يوم… وتضحك وتبتسم من قلبك وإنت بتبص لها

لأنها إرادتك إنت… إختيارك إنت… الشخص اللي إنت هاتبنيه بإذن الله… زي ما إنت عاوزه بالظبط… زي ما إنت راسمه بالظبط

النهاردة… إسمحلنا مرة تانية إن إحنا نبارك لك… لحظة ميلاد جديدة لك

فرصة جديدة لك في حياتك

وإنت عارف إيه واجب النهاردة

واجب النهاردة إنك تكب بإيدك فعلا على كراستك بتاعة رمضان: شهادة ميلادك

وتبتسم أوي أوي أوي وإنت بتكتب شهادة ميلادك

ووصل الرسالة دي لكل أهلك وأصدقائك علشان نكتب كلنا شهادات ميلاد لنا كلنا النهاردة

نبدأ بيها حياة جديدة… حياة سعيدة… حياة نقية… حياة سهلة بسيطة…. حياة لله

وجدد نيتك قبل ما توصل الحلقة دي لباقي الناس… إستحضر نية نشر الخير والإيجابية والسعادة… وإحتسب أجرها وإنت بتساعد في نشر الحلقة دي

ونشوفك بكرة إن شاء الله في حلقة جديدة من حلقات #أسلوب في #رمضان

ورمضان كريم.