الشماعة

 

أهلا  بيكم في الحلقة رقم ١٧ من برنامج: أسلوب في رمضان

وحلقة بعنوان: الشماعة – دليلك السريع لكيفية تعليق فشلك على الشماعة

في ناس إشتكت, من إن كل حلقات أسلوب… بندي فيها خطوات و واجب لازم يتعمل… ولازم الواحد يكتب الخطوات بإيده… ويدفع تمن النجاح من مجهوده

والناس دي… عاوزه حاجه سهلة شوية… عاوزة تتفرج بس… من غير ماتقولي خطوات ولا كراسة أكتب فيها ولأ أي بتنجان

علشان كده, إحنا النهاردة, جايين بحلقة مرييييحة جدا… مش هاتحتاج تعمل فيها أي مجهود خالص…

بالعكس… دا إنت هاتتبسط جدا جدا بالنصايح بتاعة النهاردة, لأنها كلها مريحة جدا…

و نتايجها في إن اللي يعملها هايكون فاشل ومكروه… مضمونة ميه في الميه

وأكيد… لأن الناس اللي عاوزه تفشل… دي جزء مهم جدا من المجتمع… وهما السبب الرئيسي في كل السلبية والقرف اللي ممكن تقابله في حياتك… قررنا نديلهم فرصتهم

علشان تفشل في الحياة… الموضوع سهل… شوية بس أدوات بسيطة:

هاناخد من الأدوات دي في حلقة النهاردة… أداة واحدة بس:

هانتكلم النهاردة عن: الشماعة

الشماعة دي بقى من أهم أساليب الفشل في الحياة… وهاتريحك جدا من إنك تعمل أي شغل مهما كان

و هاتعلق عليها كل أسباب فشلك … وهاتعيش حياة مقرفة وكئيبة وجميلة… وكمان… هاتخليك تحقد على كل الناجحين

يا سلام بقى لو جبت كام شماعة حلوة كده, و بدلت بينهم… تبقى إنت كده… فل و عنب

بس إستنى… خد كورس سريع الأول في : كيفية إستخدام الشماعة

لو إنت طالب مثلا:

إوعى تذاكر طول السنة… إلعب وهيص وعيش حياة الفشل براحتك

ولما تيجي آخر السنة… إشتم في المناهج والتعاليم…

وقول: دي مناهج للحفظ مش للفهم.. أنا لو في بلد نضيفة… كانوا عملوا نظام تعليم ينفع مع الناس الذكية اللي زيي… مش الناس اللي بيحفظوا…

أهي دي بقى… شماعة كويسة جدا… هاتريحك أوي طول السنة… وهاتضمنلك نتايج ممتازة جدا, في إنك تعيش عبارة عن راس كرومبة… طول حياتك

وممكن كمان تعلق عدم نجاحك على إن المدرسين مش بيشروحوا كويس, أو إن المدرس أو أي حد تاني مستقصدك

إنت وشطارتك بقى يا معلم… شماعتك معاك… والفشل مضمون

لو إنت بقى واحد بتشتغل أي شغلانة مهما كانت وفي أي مكان… موضوع الشماعة ده مهم جدا وهايريحك من إنك تشتغل بضمير وإتقان وإحسان

هانغششك شوية شماعات حلوة كده… كلها هاتبسطك جدا, وتضمنلك فشلك الوظيفي… وتضييع الأمانة اللي إنت مكلفة بيها… إبسط يا عم

شماعة رقم واحد: إمشي قول : ماهو كل الناس مش بتشتغل… إشمعنى أنا

شماعة رقم إتنين: أنا بموت نفسي في الشغل, وفي الآخر يرمولي ملاليم… وياكلوا هما تعبي وشقايا

شماعة رقم تلاتة: أنا لو إشتغلت وإجتهدت… هايجي واحد تاني ياخد مجهودي

شماعة رقم أربعة: الملاليم اللي بيرموها لنا آخر الشهر دي ما تعييش فرخة… أنا لازم آخد إكراميات (اللي هي رشاوي يعني) ولازم أطلع بأي سبوبة كده من الشغل

شماعة رقم خمسة: لما تعمل أي حاجة غلط… إرمي اللوم على كل الناس… كل ما تقعد مع واحد… إرمي اللوم على واحد تاني… وخليك ماسك ومتبت في الشماعة

لو إنت بقى واحد متخرج والمفروض تجتهد وتبني مستقبلك زي كل الناس اللي المفروض تبني مستقبلها وتنجح

فا إعرف إن النجاح محتاج مجهود… علشان كده… هانشرحلك إزاي تستخدم الشماعة… علشان ماتعملش مجهود, وتفشل وضميرك مرتاح

بس للأسف… مش هاتعرف تستخدم الشماعات كويس هنا… إلا إذا إنت كنت من الناس اللي كانت بتستخدم الشماع أيام ما كانت في الدراسة وطول حياتها

لأنك لو كنت إنسان مجتهد ومحترم من وإنت صغير… يبقى … هايكون صعب أوي إنك تحترف إستخدام الشماعات علشان تبرر بيها فشلك

وعلى العموم… شوية شماعات مهمة جدا للشباب اللي بادئ حياته… علشان مايجتهدش… ويعيش حياته … في ماية البليلة

شماعة واحد: مفيش حد بيشتغل غير بواسطة أو كوسة… دي بقى أهم واحدة… وياريت بقى كام مثال حلو كده لشوية فشلة تانيين إشتغلوا بالواسطة… علشان تدي منوم قوي لأي حافز داخلي جواك يحاول يخليك تقوم وتنجح… البلد دي ماشية بالكوسة

شماعة إتنين: أنا معايا مؤهل أد الدنيا… مش هاشتغل أي حاجة ماتليقش بمؤهلي الفزيع الشنيع

أحلى حاجة في الشماعة دي, إن مايفرقش معاك مؤهل إيه خالص… سواء معاك إبتدائية, دبلوم, مؤهل عالي أو حتى خريج معهد تقفيص بلح… الفشل عمره ما بيفرق بين حد أبدا بناء على مؤهلاته… كلنا عندنا فرصة في إننا نستخدم الشماعة دي

… إوعى يا باشا تبدأ شغل في أي شغلانة كده على ما تبدأ تخطط لحلمك… وضعك الإجتماعي يا كبير… إقعد على القهوة أحسن… وخليك عالة على باباك ومامتك طول العمر… وياسلام بقى لو بتدخن كمان… يبقى إنت كده في التمام التمام التماااام

مش هاطول عليكوا… إحنا متأكدين إنكوا عارفين مليون شماعة تانية… بتسموعها من ناس كتييييرة جدا طول الوقت

ياريت كل واحد فينا, يكتب كده كام موقف وكام شماعة في كومنت… علشان كلنا نساعد بعض… في تعلم الفشل

هات بقى كراسة أسلوب بتاعتك… علشان نكتب فيها… ملخص الحلقة

إكتب:

الفشل ببلاش… النجاح بس هو اللي مش ببلاش

ولو مش مصدقنا… شوف حلقة رقم ١ من صرخة دلوقتي حالا… علشان تصدقنا

شير الحلقة دي مع كل الناس… علشان كلنا نتعلم أهم طريق للفشل

وهايكون بإختيار كل واحد فينا… إنه يتعلم الطريق ده… علشان يتجنبه ويتجنب يعمل أي حاجة فيه

أو يكون بإختياره… إنه يستمتع… بالفشل

ورمضان… كريم