اعمل الصح

السلام عليكم … وأهلا بيكم في الحلقة رقم ٩ من برنامج #أسلوب في #رمضان

وليلة يوم ٩ من رمضان… وحلقة بعنوان… إعممممممل الصح بين قوصين (مالكش فيه)

عندنا معلومة ومحتاجين إنها تدخل دماغنا كده ودماغك… بس ركزززز كويس معانا

إحنا عاوزينك النهاردة… تعممممممملللللل الصصصصصححححححح

هاتقولي: يعني أعمل إيه

هانقولك إعممممللللل الصح

إعممممممممللللل الصحححححح

يعني أعمل إييييييييه؟؟؟؟؟؟؟

إحنا كنا قولنا في المبدأ التاسع من سلسلة ال ٢٤ مبدأ: غير تفكيرك تغير حياتك

إن كل واحد فينا… لازم يروح يدور على الصح… ويتعلم الصح ده… ويعمله… وينسى رأي الناس

بس… بما إن إحنا الناس… وإحنا كمان بنتطوع كتيييير أوي برأينا … وبنفتي لكل واحد في إيه اللي المفروض يعمله… وإيه اللي المفروض مايعملوش…. بدعوى إن إحنا عاوزينه يعمل الصح

إيه هو الصح؟

الصح… إن الصح… مش صح واحد… فيه مليون صح…. وكلهم صح

يعني إيه؟؟؟؟

يعني مثلا, لو واحد معاه فلوس كتير, وعاوز يعمل بيهم خير

ممكن يطلع بيهم عمره أو حج… وده أجمل صح

وممكن يدي الفلوس دي كلها لواحد رايح يتجوز… علشان يساعده على زواجه… وده برضه صح

وممكن يقول… لأه… أنا مش هادي الفلوس دي لواحد بس… أنا هاقسم الفلوس دي على ٢ … كل واحد ياخد مبلغ صغير… وده برضه صح

وممكن يقول… انا هاعمل بالفلوس دي مشروع خيري… وده برضه صح

أو يتبرع بيهم لجمعية خيرية

أو حتى يقول… هاعمل مشروع أكسب منه فلوس, وأجيب فرص عمل لناس, وأعاملهم بما يرضي الله وأخليهم هما كمان يكسبوا فلوس حلاااال

كوووووووووووول اللي فات ده ….. صح…. وفيه مليون حاجة صح… غيرهم ممكن يتعمل

هاتقولي… طيب إنت عاوز إيه مننا دلوقتي طالما كل ده صح

هاقولك… كل واحد فينا… زي ما هو لازم يتعلم يعمل الصح

لازم كمان يتعلم يحط لسانه في بقه… ويسيب الناس تعمل الحاجة الصح… اللي هي شايفاها صح… طالما هي صح

يعني تلاقي الواحد اللي جاي يطلع عمرة ده… يطلع له واحد و يقوله… مش أول تدي الفلوس دي لواحد رايح يتجوز

يروح علشان يدي الفلوس دي لشخص هايتجوز… تلاقي اللي يقوله… إنت أكيد مش في عقلك… هاتدي الفلوس دي كلها لشخص واحد؟؟؟؟؟؟… قسمها على ناس كتير أولى

يروح يقسمها… يلاقي اللي يقوله… دول هايتجوزوا ياعم… في اللي مش لاقي علاج….

ويفض طول ما هو موافق يسمع للهري بتاع الناس… يلاقي واحد جاي يفتي له

لازم كل واحد فينا… يسيب اللي قدامه يعمل اللي هو عاوزه صح

أنا المفروض أسيب الناس اللي قدامي يعملوا الحاجة الصح من غير ما أخليهم يكرهوا نفسهم ويكرهوا الصح

ولو أنا كنت فتااااي ولازم أحشر مناخيري في اللي ماليش فيه… يبقى هما مش المفروض يخلوا حياتهم تتوقف علشان واحد مناخيره طويله وبيحشرها في اللي مالوش فيه زي حلاتي

من حقك دلوقتي تقولي… طيب أنا إيه اللي يخليني أسمع كلاامك وأبطل أحشر نفسي في اللي ماليش فيه… دا الموضوع ممتع أوي لما أقعد أحشر نفسي في اللي ماليش فيه

معاك حق… بس إسمع من سيدنا النبي, صل الله عليه وسلم

عن أبي هريرة رضي الله عنه ، عن النبي صلى الله عليه وسلم قال : من حسن إسلام المرء تركه ما لا يعنيه حديث حسن ، رواهالترمذي وغيره . 

 كما قال صلى الله عليه وسلم : المسلم من سلم المسلمون من لسانه ويده 

 

واجب النهاردة:

هات كراستك الجميلة بتاعة أسلوب في رمضان وإكتب فيها الأربع حاجات دول:

١- من حسن إسلام المرء… تركه مالا يعنيه

٢- المسلم… من سلم المسلمون من لسانه ويده

٣- هاعمل الصح… وماليش دعوة برأي الناس.

٤- هارحم الناس من تدخلي في الحاجات اللي بيعملوها

٥- هاكل زبادي في السحور النهاردة

ورمضااااااان كريييييييم

المبدأ التاسع من المبادئ الأربع وعشرون: غير تفكيرك, تغير حياتك:

٩- دور على الصح… وإعمله… وإنسى رأي الناس

—————

عاوز تبقى ناجح وسعيد في حياتك؟

إتعلم إنك تنسى رأي الناس في أي حاجة تعملها

روح دور على الصح… وإعمله

ماتروحش تعمل اللي إنت شايفه صح…

لأه خالص…

روح دور على الصح الأول…

وإتعلمه كويس.. وبعدين إعمله

وإوعى تخلي إنتقاد أو حتى تشجيع الناس يأثر عليك

—————

ماتهتمش برأي الناس في:

حالتك الإجتماعية

تعليمك

لبسك

أفكارك

عليتك

————–

بس أهم حاجة

تتعلم الصح

وبعدين تعمله

————–

قولنا في تعليق: هاتعمل إيه صح… ومش هاتهتم برأي الناس فيك