أبدأ يومك مع مبادئ أسلوب و المبدأ رقم 19 من سلسلة ال 21 مبدأ لحياة أكثر إيجابية.

خصص وقت محدد لكل عمل

خصص وقت محدد لكل الشغل اللي وراك

خصص وقت محدد لوضع خطة عمل لليوم

خصص وقت محدد للرياضة

خصص ساعات محددة للمذاكرة

خصص وقت محدد للراحة و الترفيه

خصص وقت محدد للفيس بوك و السوشيال ميديا كلها

أوعي تسيب وقتك يضيع بسبب عدم النظام

——————————————————————————–

عايزين نتخيل مع بعض يوم من حياتنا و نشوف مع بعض اليوم ده ممكن نقدر ننظمه أزاي

علشان يعدي بأحسن كفاءة …و أكثرإنتاجية

هاناخد  مثال ليوم فى حياة اكتر شخص علي وجه الارض بيكون يومه مشحون و مشغول ….

و أكيد  الشخص ده هو الامهات…… الله يعينهم…….

اللي مش بيلاحقوا علي البيت و لا الدروس و لا التمارين و ولا مشاوير البنك و لا الدكتور و لا السوبرماركت!!!

و لا التليفونات المهمة و لا زيارات حماتك و اعياد الميلاد…..

ده بجانب وقت المسلسلات و الدخول علي الفايس بوك و الواتس اب و غيرهم و المرواح للكوافيرة…

و ياسلام لو بجانب كل ده بتشتغلي او بتدرسي……. بصراحة الامهات دول سوبر هيروز والله….

أظن مافيش مخلوق بيكون يومه مشحون و مكربس زي يوم الامهات اللي علي طول النسكافيه بتاعهم بيشربوه بارد…..

و اكلهم دايما بيكون علي الواقف.

يومك هايفضل مكربس مافيش مفر……

بس ممكن بشوية نظام بسيط تقدري تخلي يومك يمشي بسلاسة و راحة اكتر و باقل ضغوط….

و ده عن طريق انك تخصصي وقت محدد في اليوم كل حاجة من الحاجات اللي بتعمليها يوميا…..

مثلا شغل البيت والغسيل و الطبيخ هاتخصصي ليه وقت الصبح بدري لمدة ساعتين او 3 ساعات مثلا

و تنتهزي فرصة ان الاولاد فى المدارس….و بعد كده تقرري قرار صارم و حاسم ان بعد الوقت المحدد ده مش هتلمسي قشاية فى البيت….لأن شغل البيت فعلا مش بيخلص…..

حددي كمان مثلا نص ساعة كل يوم تعملي فيها كل التليفونات المهمة ……

و وقت تاني تحديده فى اليوم تختاريه للدخول علي الفايس بك و انستجرام و الواتس اب…..

و غير الوقت ده ماتدخليش……

احنا فاهمين ان فيه جروبات مدارس مهمة لازم تكوني متابعاها……

انتي ممكن تعملي ميوت لكل الجروبس بتاعة البيجامات والشنط وهدوم البيت… وتيسيبي بس الجروب الخاص باولادك مثلا …..

المهم يكون الجدول بحساب علشان وقتك مايضيعش منك علي الكلام فى امور تافهة…..

و15 دقيقة قراءة صفحة من كتاب قبل النوم او وردك اليومي من القران.

حاولي تخصصي وقت محدد فى اليوم لكل حاجة وراكي……

خلي كل دقيقة من وقتك فارقة في حياتك…..

اختاري مثلا يوم فى الاسبوع للمشاوير المهمة…..

ده هايكون افضل بكتير ليكي عن انك كل يوم يكون عندك مشوار……

و يوم تاني مثلا للاهتمام بنفسك و تروحي فيه عند الكوافيرة تستجمي او تقابلي فيه صحباتك… أو حتى تهربي تحت السرير وتقوليلهم إنك في الساحل الشمالي… أي حاجة طالما هايكون عندك أي وقت ولو ساعة ليكي إنتي بس

…..و ده هايكون اهم يوم لان ده اليوم اللي هايشحنك طاقة تقدري تكملي بيها الاسبوع من جديد

خلي عندك جدول بالمواعيد اللي وراكي باليوم او الساعة……..

واعرفي ان اهم فكرة فى موضوع تخصيص الوقت لكل حاجة ده ….

هو التخصيص بمعني الكلمة…..

يعني و انت مثلا فى الوقت اللي حديديه للمذاكرة للاولاد…..

تكوني قافلة موبايلك و بعيدة عن اي حاجة تشتتك…..

نفس الكلام لو حتي عندك وقت بتتفرجي فيه علي مسلسل…..

برده اقفلي موبايلك و ما حدش يطلب منك حاجة خالص طول ما انت بتتفرجي علي المسلسل ……

و ساعتها ابقي اشربي النسكافيه بمزاج.

ده كان مثال للأمهات… وطبعا ده مجرد مثال متطرف وأحلام يقظة… إبقوا سيبوا الأمهات بس في حالهم

إنت كا طالب

وإنت كا موظف

وكل واحد فينا مهما كان سنه… ومهما كانت الأعمال اللي وراه

لازم تكون مخصص وقت محدد ومكتوب لكل حاجة في يومك

زي الشطور دلوقتي حالا… هات ورقة, إكتب فيها حاجات مهمة بالنسبة ليك, وحط ليها مواعيد محددة.

ده كان مبدأ رقم ١٩ من سلسلة ال ٢١ مبدأ لحياة أكتر إيجابية

السلسلة كاملة مهم جدا إنك تطبقها على بعضها

إرجع للمبادئ كلها من المبدأ رقم ١

وإكتب الخطوات المهمة اللي في كل مبدأ في كراسة مخصوص للمبادئ

وغير حياتك بإنك تستخدم كل مبدأ في الوقت المناسب له.

وشير ولايك بصوباعك الجميل ده

وماتنساش أبليكيشنز أسلوب للأيفون والأندرويد, علشان توصلك رسائل أسلوب التشجيعية دائما

هاتلاقي الروابط في صندوق الوصف تحت الفيديو.

وإكتبلنا إقتراحاتك لأفكار جديدة تحب تشوفها في أسلوب
 
إعمل متابعة\سابسكرايب لقناة أسلوب على يوتيوب, علشان توصلك حلقاتنا أول لما تنزل
وكمان نزل برامج أسلوب للأيفون والأندرويد… علشان توصلك جميع حلقات أسلوب بالترتيب الصحيح
نزل أسلوب على ‫#‏موبايلك‬ ‫#‏الأندرويد‬ من هنا:
وأسلوب ‫#‏أيفون‬ من هنا:
وده, ‫#‏موقع‬ أسلوب:
وده أسلوب على فايسبوك:
وده أسلوب على انستاجرام:
وأكيد أسلوب على تويتر: