أستوديو أسلوب – الحلقة الرابعة – ٧ خطوات لتحديد وتحقيق هدفك في الحياة
أهلا بيكم في أستديو أسلوب والحلقة الرابعة – وحلقتنا انهارده عن تحديد الأهداف.
موضوع مهم جدا و كتير منكم طلبوه منا فى تعليقاتكم على صفحتنا علي الفيس بوك.
تعالوا نتفق مع بعض في الأول, إن الحياة من غير أهداف … ملهاش أي معنى…….يعني اللي بيشتكي ان حياته ملهاش اي معني يعرف انه محتاج انه يحدد اهداف لحياته و يسعي انه يحققها.
أنا النهاردة جاية مخصوص… علشان أقولكم على طريقة تساعد كل واحد فينا إنه يحط هدف أو مجموعة أهداف لحياته .
الأهداف في الحياة طبعا هاتختلف من شخص لآخر… ومن مرحلة عمرية لمرحلة عمرية تانية.
يعني لو طفل صغير… حيكون هدفه في الحياة إنه يجيب اللعبة اللي بيحبها
ولما يكبر شوية… بيبقى هدفه… إنه مثلا ينجح في المدرسة بدرجات عالية ويدخل الكلية اللي بيتمناها
وبعد كده ممكن يكون هدفه إنه يتخرج ويتشغل الوظيفة اللي بيحلم بيها.
السؤال المهم, واللي وصلنا من ناس كتيرة جدا في تعليقات على صفحتنا… ……هو ان إزاي أحدد هدفي في الحياة؟؟؟
طيب ياترى اصلا هل كل واحد فينا عنده أهداف بيسعى إنه يحققها ويوصلها في حياته؟
هاتقولي أيوة طبعا:
أنا هدفي إني أكون سعيد في حياتي
أو إني أكون ناجح ومشهور
أو إني أكون غني وعندي فلوس كتير
– بس علي فكره دي كلها مش أهداف حقيقية.
أيوه… ……هى دي الحقيقة, كل الحاجات دي ماتعتبرش أهداف… دي حضرتك إسمها أحلام… أو أمنيات
كل الناس بتحلم بالحاجات دي بلا استثناء
بس تعريف الأهداف الحقيقية … دا شيء تاني خالص
تعالوا نتعرف مع بعض ازاي نحول الأحلام والأمنيات دي لأهداف حقيقية نقدر نحققها في حياتنا ب ٧ خطوات بسيطة
الخطوة الأولى:
———————
١- حدد أهدافك في الحياة
فكر إنت عاوز تعمل إيه في حياتك
مثلا: هاتقولي
أنا عايز أدخل كلية معينة
أو أنا عايز أتعلم مهارة جديدة
أو إني أشتري البيت اللي باحلم بيه
أو إني يكون عندي عربية آخر موديل
أو إن مرتبي يزيد الضعف أو أكتر
أو إني أخس في الوزن وأكون رياضية
او اني اتفوق فى الرياضة اللي بحبها.
و مش شرط أهدافك كمان تكون أهداف مادية, ممكن أهدافك تكون أهداف سامية ……..
زي مثلا إني أكون الأم المثالية وقدوة لأولادي
أو إني أنشر الخير والإيجابية بين الناس…
– وممكن كمان يكون عندك أهداف تانية خالص…
أهم حاجة… إنك تقعد مع نفسك تفكر كذا مرة… إيه الأهداف اللي أنا هاحطها لحياتي
واللي عايزين نقوله في الخطوة دي: ان أهدافك لازم تكون واضحة ليك وضوح الشمس و تكون عارف بلظبط انت عاوز ايه.
وتكون راسم لاهدافك طريق ومخطط ليها كويس
طيب اللي لسه مش عارف أهدافه إيه
أو أهدافه كتير… ومتناقضه أو مش واضحة
خلي بالك… تحديد الأهداف دي مهارة … ب تكتسب, وممكن نتعلمها ونتمرن و ننميها
يعني ممكن نبدأ بهدف صغير, ونحققه… لحد ما نوصل إننا نقدر نحقق الأهداف الكبيرة
كل حاجة بالتمرين… والتكرااااار
الخطوة التانية
——————
٢- الأهداف لازم تتكتب على ورق
لو أهدافك دي مش كاتبها على ورق بكل تفاصيلها
يبقى آسفه إني أقولك إن أهدافك دي مجرد أماني…. مفيش أي نوع من الطاقة أو الجدية وراها
يعني مجرد أحلام وأماني بتعدي عليها في حياتك, من غير ما تحقق منها حاجة, ومن غير ما الأهداف دي تكتمل
– لازم الأهداف اللي إنت هاتخترها لنفسك…. تكتبها على ورقة
– ولازم الأهداف تكون قابلة للقياس
يعني ايه بأي الكلام الكبير ده؟…………حبسطهههههاااالك يعني لو هدفك إن مرتبك يزيد… يبقى لازم تحدد عاوزه يزيد ويكون كام بالظبط… قول أنا مثلا… هدفي إن مرتبي يزيد من ١١٢٩.٥ جنيه ل ٢٢٥٩ جنيه …. ماتفكرش كتير… الضعف يعني
المهم… حدد أرقام قابلة للقياس….اكتب الارقام المحددة الي انت عاوز انه يزيد بها.
mk [4:01 PM]
الخطوة الثالثة
———————
٣- حدد مهلة محددة من الوقت لكل هدف
– حط قدامك تاريخ محدد تحقق خلاله هدفك…… وبعد كده… قسم المهلة دي لأجزاء أصغر… وحدد تاريخ لتحقيق جزء جزء من هدفك
يعني لو مثلا… هدفك إن مرتبك يزيد من ١٠٠٠ جنيه ل ٢٠٠٠ جنيه في خلال سنة … (سنة …. سنة ونص يعني)…
أقسم بقى الهدف ده لأهداف أصغر بتواريخ أصغر …
يعني تعمل هدف أولي إن مرتبك يكون ١٥٠٠ جنيه في خلال ٦ شهور
وبعد كده الهدف اللي بعده إن مرتبك يوصل ٢٠٠٠ جنيه في خلال سنة بكده يكون هدفك اكتمل.
طريقة تقسيم الهدف علي مراحل وتحديد تاريخ معين لكل مرحلة… بيسهل جدا جدا تحقيق الهدف باكمله.
الخطوة الرابعة:
———————
٤- حدد المعوقات اللي موقفة هدفك… وحلها
شوف إيه اللي إنت بتعمله دلوقتي محتاج تتحسن فيه علشان هدفك يتحقق
أو … إيه اللي إنت محتاج تتعلمه جديد علشان توصل لهدفك
مثلا… علشان مرتبك او دخلك يزيد… محتاج تاخد كورس إنجليزي وتحسن نفسك في اللغة
اوعلشان تقدر تلاقي وظيفه بمرتب كويس ….… لازم بجانب الشهادة انك تتعلم مهارات جديدة زي مثلا كورسات آي سي دي ال اللي هو كورس اساسيات تعليم الكمبيوتر.
ولو إنتي وراكي البيت والأولاد والمذاكرة و التمارين و كله كوم و الغسيل ده كوم تانى………..… ومش ملاحقة إنك تفكري حتى في أي هدف تفكري فيه و تحديديه لحياتك…….. يبقى إنتي محتاجة تقرأي كتاب عن مهارة تنظيم الوقت(لينك للكتاب علي سوق)……………مهم جدا عشان تحسي بكيانك و ان حياتك لها معني ، انك يكون عندك اهداف تسعى انك تحقاقيها فى حياتك.
الخطوة الخامسة:
—————————
٥- حدد الأشخاص اللي ممكن يساعدوك إنك توصل لحلمك
شوف مين من الناس اللي حواليك ممكن يساعدك في تحقيق هدفك
ممكن يكون الشخص ده… هو شخص حقق نفس الهدف قبل كده… وإنت بس محتاج تشوف هو عمل إيه علشان يحققه… وتمشي على خطواته
أو ممكن يكون شخص هايشجعك ويكون الحافز ليك طول الطريق لغاية لما تحقق هدفك
الخطوة السادسة
————————
٦- إبدأ فعلا في التنفيذ
علشان تقدر تحقق هدفك اللي في المستقبل, لازم كل يوم تعمل حاجة ولو بسيطة في إتجاه تحقيق هدفك
يعني لو هدفك إنك عاوزه تخسي ١٢ كيلو في خلال ١٢ شهر
يبقى لازم يوميا تلعب رياضة وتغيري عادات أكلك وكلي أكل صحي.
لو هدفك إنك تحسن اللغة الأجنبية بتاعتك
يبقى لازم كل يوم تتفرجي علي كورسات انجليزي علي الانترنت.
ولو عاوز تجيب الدرجات النهاءية يبأي لازم كل يوم تذاكر و تكتب و تلخص و تلون و تتعلم ازاي تستمتع بلمذاكره………تابع حلقتنا الى فاتت عن فن الاستمتاع بلمذاكره عشان يكون عندك فكره اكتر عن اساليب المذاكرة الصحيحة..حتستفاد جدا.
مهما كان هدفك… لازم يكون عندك كل يوم خطوة بتعملها تقربك لهدفك
الخطوة السابعة
————————
٧- إجبار النفس على الإستمرار
دي أهم خطوة نجاح عموما طول العمر… إنك تجبر نفسك إنك تقوم وتشتغل في الوقت اللي مالكش نفس تشتغل فيه
هو هواه السيلف ديسبلين اللي قولنا عليه قبل كده
لو هاتستنى للوقت اللي نفسك جايباك إنك تشتغل أو تذاكر أو تحسن من وضعك… عمرك ما هاتنجح آآآآبدا
النجاح… إنك تقوم تجتهد وتموت نفسك إجتهاد… في الوقت اللي مالكش فيه نفس للشغل
وآخيرا, رحلة تحقيق الأهداف دي رحلة ممتعة للغاية طلاما وراها الحماسة الكافية والإصرار
هاتكتشف في نفسك مهارات وقدرات عمرك ماكنت هاتتخيل انها فيك
دول كانوا سبع خطوات لمساعدتنا في تحديد وتحقيق أهدافنا في الحياة
قولنا في تعليق … إيه هي أهدافك في الحياة وكلنا نشارك بعض إزاي ممكن نطبق السبع خطوات دول على كل هدف من أهداف الحياة
وأنا عن نفسي… هاكون أول واحدة أكتب هدف من أهدافي… وإنتوا كمان اعملوا كده
في ناس كتيييييير جدا محتاجين يستفادوا من البرنامج بتاعنا ده ومن الأفكار الإيجابية اللي بنحاول ننشرها مع بعض…
خليك كريم إنك تعمل شير للحلقة…
وأكيد إعمل سابسكرايب… علشان تكون أول واحد يشوف حلقاتنا اللي جاية إن شاء الله
وشييييير كمان مرة … ربنا يخليلك الأوستاذ… مش ده مش ده… الطيب الطيب
شير ماتخفش
32 Responses to “(أستوديو أسلوب – الحلقة الرابعة – ٧ خطوات لتحديد وتحقيق هدفك في الحياة (أهم حلقة في أسلوب”
نفسي اخس ٤٠ كيلو في سنة الاتنين ونفسي اقوي اللغة عندي عشان ولادي واعرف أربيهم كويس
كل الناس اللي خست, حتى لو ٥ كيلو بس
حتى لو ٣ كيلو بس… حياتها كلها اتغيرت
فعلا… فقدان الوزن يستاهل أي مجهود في الدنيا… ده بيبني حياة من جيد
بجد, ربنا يوفقك
نفسي اخس ٤٠ كيلو
ربنا يكرمك معلومات اكثر من رائعة
شكرا محمد على متابعتك وتشجيعك 🙂
شكرا جزيلا لاستوديو اسلوب انا تابعت بعض الحلقات وشىء متميز جدا واسلوب تعليمى وتربوى ونفسى ومتميز جدا لجميع الاعمار حقيقى باستفاد منه على الرغم من وجود خبرات كثيره لدى الا ان برنامجكم ياتى ليؤكد عليها وينعشها من جديد …. امنيتى التقدم للامام فى عملى وبدء حياة اسريه ناجحه
شكرا جدا عبير على تشجيعك لفريق عمل أسلوب 🙂
نفسي اواظب عالصﻻة وتنظيم وقتي …بحاول بس مش بستمر
رائع
احفظ القرءان خلال اربع سنوات
احتاز امتحان البورد الأمريكى
انزل 10 كيلو من وزنى
امارس الرياضة بانتظام
بارة بوالدى
واصله لرحمى
راعية لبنتى
اكون متميزة ف عملى
ماشاء الله يا نهى… إن شاء الله ربنا يوفقك لتحقيق جميع أهدافك
هحقق هدفي ان ابقا سيده اعمال من خلال عملي في
World global network 😀
بدي حلقة موضوعها الطريقة الصحيحة للمذاكره لكي تنجح
شكرا حسناء على تعليقك
فيه حلقة بالفعل عن المذاكرة, ممكن تشوفيها وتقوليلنا إيه رأيك:
https://www.youtube.com/watch?v=GK4OoBbisvs&index=5&list=PLVAvctGvugB9ge-76R6Hs7c0VTjjsSVzY
في حلقة موجودة عن المذاكرة الصحيحة, ممكن تشوفيها من هنا
http://bit.ly/osloop-study
ربنا يرزقنى بالزوج الصالح
آمين 🙂
شكرا جزيلا لاستوديو اسلوب انا تابعت بعض الحلقات وشىء متميز جدا واسلوب تعليمى وتربوى ونفسى ومتميز جدا لجميع الاعمار
وعن هدفى بجد نفسى اواظب على الصلاه واربى اولادى تربيه صحيحه يعنى مع مرعاه احلامهم ومتطلباتهم ونفسيتهم يعنى تربيه دقيقه فى كل شىء
شكرا على المعلومات القيمه التى تقدم منكم وارجو متابعة التقدم فى هذه المواضيع القيمه
هدفى انى اخلص الماجستير ف سنتين واكون دكتوره ف الجامعه واكون ف مكانه كويسه
وانى اروح احج واخد بابا وماما معايا
وان ربنا يرزقنى الزوج الصالح اللى يفهمنى وافهمه ويخاف عليه ويسعدنى واسعده ويراعى ربنا فيه
ربنا يوفقك ويتقبل منك ويحقق لكي أهدافك يارب
<3
حاجه جمييلة جدا ربنا يجعله ف ميزان حسناتكم
بجد شكرا كتييير على المجهود اللى بتعملوه ده وتأكدو ان مجهودكم كله ببغير فينا بجد
ياريت تستمروا بفيديوهاتكم الاكثر من رااااائعة
تستحقوا 10000000 لايك
ربنا يوفقكوا
برافو بجد
طريقه جميله لعرض الفكره.. ربنا يوفق
انا هدفي اني اشتغل لي وظيفة كويسة وأحسن من دخلي وأجيب كل حاجة ناقصتني بس انا لسه مخلصا كلية وكمان نفسي زوجي يحسن من دخله
انا هدفي اني اشتغل لي وظيفة كويسة وأحسن من دخلي وأجيب كل حاجة ناقصاني في بيتي بس انا لسه مخلصا كلية وكمان نفسي زوجي يحسن من دخله
انا هدفي اني اشتغل لي وظيفة كويسة وأحسن من دخلي وأجيب كل حاجة ناقصتني بس انا لسه مخلصا كلية وكمان نفسي زوجي يحسن من دخله
جزاكم الله خيرا
انا استفدت من برنامجكم الرائع
وهدفي احفظ القران لالبس والدي يوم القيامه تاجا من نور
اولا جزاكم الله خير علي مجهودكم الرااااائع اللي بيغير فينا حاجات كتيييييييير
وبالنسبة لاهدافي
اختم حفظ القرآن
أكون انسانية اكتر ايجابية
اولادي يحفظوا القرآن
اعلم اولادي تعليم ينفعهم في حياتهم
اخد رخصة القيادة
تبقي حياتي منظمة مش ماشية زي ماالدنيا تمشيتي
اتعلم لغة انجليزية وفرنسية وتركية
اكيد في اهداف تانية لما اكتب في كراسة اسلوب اكيد هفتكرها ان شاءالله
ربنا يبارك فيكم ويجعل عملكم في ميزان حسناتكم
عايز انجح في ان اكون شغلي الخاص و اكون حر
ان شاء الله
حفظ القرآن الكريم
قراءة الكثير من الكتب في مختلف المجالات
الحصول علي تقدير امتياز هذا العام
تنمية موهبة الرسم لدي
تعلم برامج الكمبيوتر المتعلقة بدراستي
تعلم قيادة السيارة
احتراف الطبخ
تعلم اللغة الانجليزية،الالمانية،الاسبانية،الايطالية
الحصول علي وظيفة مريحة