أهلا بيكم في الحلقة رقم ٥ من برنامج أسلوب في رمضان

وحلقة بعنوان: التخطيط النفييخ أجمل من ماية البطيخ 

الفرق في الحياة بين واحد بيحافظ على وقته وبيحط خطة لكل أعماله…

وواحد تاني أعماله اليومية ماشية بطريقة ماية البطيخ

زي بالظبط واحد راكب أحدث وأسرع عربية…

وواحد تاني: يمشي الهويني كما يمشي الوجي الوحل … آه يا وحل يا وحل

و بصراحة… مفيش أيام في السنة كلها, تنظيم وتخطيط وإدارة الوقت, أهم فيها من شهر رمضان

شهر رمضان دايما في ناس كتير جدا بتتكتشف فيه طاقات رهيبة في نفسها

من صيام ماشاء الله

وإلتزام في الصلاة جماعة أولى

وقراءة قرآن 

وقيام الليل 

والدعاء والتسبيح 

والشغل أثناء الصيام

وإعداد الإفطار والسحور وإدارة بيت كامل

والمذاكرة طبعا للناس اللي عندها إمتحانات

والناس اللي بتستغل وقتها في تعلم حاجات جديدة وفي القراءة

ومفيش وقت في السنة كلها, محتاجين ننظم وندير فيه وقتنا… زي رمضان

الأخبار الكويسة جدا, إن شهر رمضان كله, اليوم فيه مقسم لأجزاء محددة, ومتقسمة لنا جاهزة… مش ناقص بس غير إن إحنا نعرف نخطط يومنا ونستغله صح

إحنا كده ولا كده عندنا حوالي ١٦ ساعة كاملين صيام… محتاجين نخطط ل ٨ ساعات منهم كويس جدا

والخطط دي, لازم تكون مناسبة لنا كلنا, بحيث يومنا في رمضان يكون أكبر إنتاجية ممكنة لينا كلنا

للأم اللي بتدير منزل كامل وأسرة كاملة

وللموظف اللي بيشتغل ولازم يكون مركز جدا في شغله و منتج

وللطالب اللي عنده إمتحانات, مستقبله هايتحدد عليها 

وللناس اللي في آجازات… ولازم يستغلوا أهم أيام في السنة كلها في تعلم حاجة ترفع من قيمتهم

وللأخ الغلبان اللي فاكر نفسه هاينام ال ١٦ ساعة صيام… ويصحى يعد نفسه مع الصايمين ساعة الإفطار… بس إحنا مش هانسيبه أبدا النهاردة

كل الناس دي لازم لازم لازم تفهم إن يومها ال ٢٤ ساعة ده… واللي متقسم أجزاء منفصلة بالفعل…

ممكن تطلع في يومها ده بأعلى إنتاجية لها طول السنة… وتحقق فعلا معنى الصيام والعبادة والإرتقاء في الحياة

وممكن تعيش حياة كئيبة مفيش فيها إنتاج… هايخليها تعيش في حالة فعلا من الإكتئاب

مش محتاجين نكلمك مليون ساعة عن أهمية الوقت

لكن علشان نكون صايمين بجد, لازم نحط خطة لأساسيات اليوم في رمضان

هات بس الأول كده كراسة أسلوب في رمضان اللي إحنا متفقين عليها

ولو ماكنتش لسه جيبت الكراسة… يبقى إكتب في أي حاجة أدامك دلوقتي… وهات الكراسة معاك حلقة بكرة… علشان في مصاصة هاتتوزع.

تمام… معاك كراستك وقلم الجميل؟ إكتب معانا يا كبير

اليوم في رمضان أكيد أكيد أكيد لازم يكون فيه

١- عبادة

٢- إنتاج

٣- ترفيه

الحاجات دي, لازم نكون حاطين خطة مكتوبة (أيوة… لازم مكتوبة… لو خطة بطيخي كده… يبقى زي قلتها… دا غير البزر طبعا اللي هايكون في الخطة) 

تعالوا بقى نفكر نكتب إيه في كل جزء في الخطة (طبعا التفاصيل هاتختلف من شخص لآخ)

١- العبادة: 

أكيد رب رمضان هو رب الكون كله ورب كل الشهور… والعبادة مش في رمضان بس

لكن لأن ربنا كريم جدا, ورحيم جدا, رزقنا مواسم للطاعة… مواسم للمكاسب المضاعفة… والمواسم دي, اللي يضيع فيها الفرصة… يبقى خاب وخسر والله

إحنا لازم نكون مركزين أوي في العبادات… وفي النوايا لكل حاجة بنعملها في اليوم, علشان نحولها لعبادة

من أول السحول.. لازم نستحضر نية إن إحنا بنتسحر عبادة لله

و العمل أثناء الصيام… لازم نستحضر نية إن إحنا بنتعبد لله بإتقاننا في العمل والمذاكرة وتحضير الإفطار وتجهيز البيت… وكل حاجة بنعملها في اليوم

وطبعا لازم صلاة الجماعة الأولى – ولازم نخطط لها

وأكيد وقت لقراءة القرآن

وأكيد أكيد أكيد الدعاء الدعاء الدعاء الدعاااااااااء – … هو أنا قولت الدعاء ولا نسيت؟

وأكيد إستحضر نية العبادة ولذة العبادة وإستمتع بالعبادة وإنت صايم وعطشان وجعان… وإنت بترسم إبتسامة كبيرة عريضة على وشك وتقول .. الحمد لله… أنا صايم لله وبستمتع بعطشي وجوعي لله

ومستحيل نفكر في العبادة… ومانفكرش أوي أوي في العبادة اللي في البيت

في مساعدة الأم … وإستحضار النية وإحنا بنساعدها

وفي إسعاد كل شخص حواليك في البيت… وإستحضار نية العبادة وإنت بتحاول تسعد كل شخص معاك في البيت

وطبعا في عبادات كتيرة جدا جدا… لازم تحط خطة لكل يوم هاتغطي إيه من العبادات دي… وإيه من العبادات اللي هاتنفذها بشكل يومي إن شاء الله

وكمان… وإنت بتتفرج على أي برنامج ديني, وأي برنامج يشجعك على العبادة والإنتاج… إنك تستحضر نية إنك بتتقوى وبتشحن نفسك طاقة للعبادة

ونصيحة أخوية.. بلاش تقلل من قيمتك وقيمة صيامك بمشاركة النكت الرخيصة بتاعة أد إيه إنت جعان وإن الصيام ٣٢ ساعة في اليوم وبتفطر ياعيني ١٢ دقيقة ونص… وإن السنة دي في كوكب المريخ, بيصوموا عشر دقايق بس… إنت أكيد كنت بتصوم رمضان كله وإنت عندك ٨ سنين… يعني عيب تصغر في قيمتك في رمضان وإنت بقيت حلو وأمور كده…  وعندك بتاع عنا وعنيييين سنة

٢- الإنتاج: لازم يكون عندنا خطة لعدد محدد من ساعات العمل الصاااافي يوميا في رمضان… ونكون مخططين له قبل كل يوم

والعمل الصافي ده بيكون من غير فايسبوك ولا يوتيوب ولا مسلسلات ولا أي بطيخ في الدنيا… صاااافي

ساعات العمل الصافي ده, أكيد هايختلف من شخص لآخر حسب إلتزاماته … وحسب إحنا في أيام الشغل ولا في الويك-إندز

ممكن يكون عدد ساعات الإنتاج الصافي ده ٦ ساعات مثلا للناس اللي في الآجازة: ونخطط في الساعات دي إن إحنا نتعلم مهارة جديدة وناخد فيهم كورسات – أي كورسات بقى… فوتوشوب مثلا أو إنجليزي أو أي حاجة محتاجينها علشان ترفع من قيمتنا

وممكن يكون عدد ساعات الإنتاج الصافي ده ٨ ساعات مثلا للناس اللي بتشتغل وبتجتهد في شغلها

و ممكن برضه يكون عدد ساعات الإنتاج الصافي ١٢ ساعة إنتاج صافي للشباب اللي بتذاكر علشان الإمتحانات

وحوالي ٢٩ ساعة للأمهات اللي مش ناقص غير إنهم يصوموا لباقي الناس اللي معاهم في البيت كمان.

كل واحد فينا, لازم يكتب بإيده هو محتاج يخطط لكام ساعة إنتاج صافي في اليوم

ويكتب قبل كل يوم… هايعمل إيه في الساعات دي… علشان يعرف هل الساعات دي كافية ولا بطيخ؟

وأكيد لو إنت شاطر بقى أوي… يبقى تستحضر نية العبادة وإنت بتعمل شغلك دي… إنك بتعمل كل حاجة وراك بنية العبادة والطاعة والإجتهاد والنجاح

٣- الترفيه

أكيد أيام رمضان بيكون فيها أجمل ترفيه متاح

من أول الإفطار مع الأهل والأقارب وسعات الأصدقاء

ومرورا بالبرامج الكتيرة جدا المفيدة والراقية في نفس الوقت 

وطبعا أطنان الأكل اللي بنفرهمها يوميا من أول الإفطار لغاية السحور

لكن… لازم نكون فعلا راقيين مع نفسنا وإحنا بنختار نوع الترفيه في رمضان

– أولا: لازم يكون الترفيه ده متخطط له كويس أوي… يعني يكون عندك خطة… هاتتفرج على برامج إيه وهاتتابع إيه وإمتى… ماتسيبش التليفيزيون يتحكم في يومك

– ثانيا: أكيد طبعا مش هاتروح تتفرج على حاجة فيها معصية…. وتفتكر إنك بترفه عن نفسك… حتى لو هما بيحاولوا يضحكوا علينا إن ده ترفيه رمضاني

يعني أكيد مش هاتروح تتفرج على مسلسل أو برنامج فيه واحده ضاربة شعرها في الخلاط, أو ناس نست تلبس هدوم قبل ما تطلع في التليفيزيون… أو واحد بيعمل معاصي و بيجتهد إنه يضل الناس بيها

وأكيد مش هاتروح تقعد على القهوة مع ناس بتضيع وقتها وحياتها وصحتها … وتفتكر إن ده ترفيه

من الآخر… الترفيه لازم فعلا يكون راقي… لازم يكون الترفيه ده تقدر تحتسبه عند الله إن إنت بتتقوى بيه علشان تقدر ترجع تعمل العبادة والإنتاج تاني

يعني ببساطة… لو الترفيه ده ماتقدرش وإنت فيه ترفع راسك كده وتقول: يااارب… أنا بتفرج على البرنامج ده… أو بعمل العمل ده بنية إني أروح وأرفه عن نفسي للتقوى للعبادة والإنتاج… يبقى ماتعملش الترفيه ده.

وأكيد مش هاتقعد تتفرج على برنامج ساعة كاملة يعني ترفيه…. وتبقى بصراحة مش ذكي خالص لو ناوي تتابع حاجة على التليفيزيون… وتتفرج على ٥٠٠ ساعة إعلانات بين كل ٥ دقايق في أي برنامج… كل حاجة موجودة دلوقتي على يوتيوب… خليك ذكي ووفر وقت الإعلانات

أخيرا… نحب نفكركم إن إنتوا تشوفوا : الحلقة التانية من برنامج أفكار أسلوب, بعنوان: ٦ خطوات لتنظيم وإدارة الوقت

ونحب نفكركم إن أعمالنا كلنا في رمضان لازم نستحضر فيها كل النوايا الممكنة

ولو كنت بتستفيد وبتتشجع بحلقات أسلوب في رمضان… يبقى صوباعك الجميل ده… وإعمل شير جميل منك

ورمضاااااااان كاااااااريييييييييم