أهلا بيكم في الحلقة رقم ٢٧ من برنامج أسلوب في دقيقة

اللي بنجاوب فيه على الأسئلة اللي بتوصلنا في كومنتس

أيوة أيوة… الكومنتس دي اللي هي تحت و إنت ممكن تكتبلنا فيها الأسئلة بتاعتك و إحنا نرد عليها في حلقة من حلقات أسلوب في دقيقة

واللي طبعا طبعا طبعا طبعا

عمرها ما بتكون دقيقة أبدا

سؤال النهاردة, وصلنا من الأخت المستمعة: سين ميم ألف حاء من ميت أبو الزلط

وبتقولنا فيها:

س م ا ح؟؟؟؟؟؟؟؟؟

آآآآآه ه ه ه ه … دي سماااح …. إزيك يا سماااااح … متخفية فيها وباعتلن الحروف متلخبطة… أه يا حوييييطةةةةةة

طيب خلاصش يا ستشي … مش هانقول لحد إن إنتشي سشماح من ميتش أبو الزلطش…. سرك في بير يا تسشماح

سؤال سماح من ميت أبو الزلط اللي إحنا مش عارفين هي مين بيقول:

بصو بقى يا أسلوب

كلامكوا حلو و بيشجع

وبخرج منه متشجعة كده وبقول هاكسر الدنيا

بس هما يومين بالظبط… وبنسى التشجيع ده كله, وبرجع تاني ل سين ميم ألف حاء من ميت أبو الزلط تاني

أعمل إيه يا أسلوب؟

أنا عاوزة أتغير مرة واحدة للأبد …

يعني عاوزة أبقى أشطر واحدة في كل حاجة

وعاوزة أخس مرة واحدة

وعاوزة أعمل مشروع وما أقفش فيه

وعاوزة ما أرجعش تاني أكسل أبدا

وعاوزة ما أرجعش بظهري ورا تاني أبدا

عاوزة أبقى إنسانة تانية بجد … ومن مرة واحدة

أعمل إييييييه؟

السؤال ده مهم جدا بجد, لنا كلنا, مش ل سماح من ميت أبو الزلط بس

كلنا بنتحمس وناخد قرار إننا هانتغير حالا

وهانبدأ ننتظم في كل حاجة صح للأبد

و بنتشجع إننا ناخد قرار إننا نبطل كل حاجة غلط بنعملها

وبنكون فعلا ناويين ننفذ ومتحمسين

ومننا اللي بيفضل إسبوع متحمس, ومننا اللي بيتحمس لمدة يومين بس … وفينا ناس بتقول: أنا هانام بقى علشان أقوم من الصبح أبدأ حياتي الجديدة…. و كل الحماس يا عيني بيروح تحت المخدة مع أول تعسيلة

لكن لكن لكن … كل ده جميل أوي, و كل ده طبيعي جدا وحله بسيط أوي

إحنا كنا إتكلمنا بالتفصيل في الحلقة رقم واحد من برنامج أسلوب في دقيقة عن مشكلة الحماس لمدة يوم أو يومين, وبعدين الواحد بيرجع زي الأول تاني

و قولنا بالتفصيل: إن المشكلة مش هي إن الحماس بيروح مننا

المشكلة إننا فاكرين إن الحماس ده المفروض يفضل مستمر طول العمر … بجرعة حماس واحدة

خليني أبسطلك الموضوع

دي صورة واحد بعضلات … شايفين عضلاته؟ كبيرة أهي ومش هاتروح في حتة لمدة سنتين تلاتة أدام

بس عضلاته دي ما باقتش كده من تمرينة واحدة

ولا تمرينتين

دا فضل شهور يتمرن كل يومين تمرينة لغاية لما جسمه إكتمل وبقى بالشكل ده

إنت كمان… جرعة حماس واحدة مش هاتغير تكوينك الداخلي وعضلات إرادتك الداخلية

إنت محتاج جرعة حماس كل يوم أو يومين بالكتير لمدة شهور وشهور

وبعد كده, تكوينك الداخلي, وعضلات الإرادة بتاعتك هاتكون أقوى

إنت كمان محتاج تتحدى نفسك تحديات صغيرة بسيطة وتضغط على نفسك ضغطات بسيطة في الأول

محتاج تضغط على نفسك لما تقول أنا هاقوم أسيب شغلي أو أسيب المذاكرة و آخد بريك

محتاج تضغط على نفسك ضغطة صغيرة وتقول: نصف ساعة من دلوقتي مش هاعمل حاجة غير إني هاشتغل أو هاذاكر بتركيز

هاتعلم نفسك وتمرن نفسك إنك تضغط على نفسك نصف ساعة

وتكرر الموضوع ده كل يوم

لغاية لما تقدر تضغط على نفسك ساعة وساعتين وتلات ساعة و ٨ ساعات من التركيز

هايجي أيام مش هاتقدر تضغط على نفسك فيها… ده طبيعي جدا… تيجي بعدها وتبدأ من الأول

التغيير ده رحلة… مش زرار إضاءة… تضغط عليه مرة ينور لما تحتاج تتغير … وتضغط عليه مرة يقفل وترجع زي ما كنت لما تحب

لأه خالص

التغيير رحلة

رحلة جميلة أوي

زي رحلة الناس اللي بيغيروا حياتهم بالتمرين المستمر

كل يوم الواحد بيزيد حاجة بسيطة أوي ممكن ماتكونش ملحوظة خالص

و في أيام الواحد بيرجع كمان خطوة أو خطوتين لورا …. بس تاني يوم بيعوضهم ب ١٠ خطوات للأمام

بس كده يا سيدي … الموضوع طلع بسيط أوي أهو

التغيير رحلة… ورحلة ممتعة كمان

تعالى بقى أقولك خطوات عملية بسيطة علشان تخلي رحلة التغيير حقيقية وسهلة

الخطوة الأولى:

حاوط نفسك بالناس الإيجابييين

وإقطع علاقتك بكل الناس المحبطين المحبطين

إقطع علاقتك بكل الناس اللي بتنشر الطاقة السلبية … حتى لو هما فاكرين إنهم بيعملوا كده للخير

الخطوة التانية:

لازم جرعة حماس وإيجابية يوميا

عندك مصادر كتيرة أوي أوي أوي للناس المتفائلة والناس الإيجابية على يوتيوب وفايسبوك

عندك مثلا قناة أسلوب

و عندك قناة “كريم اسماعيل”

و قناة أخضر

و قناة الزتونة

و فيديوهات د.طارق سويدان

و حلقات صناع الحياة

وقنوات كتيرة جدا بتشجع على الرياضة

لازم جرعة حماس وطاقة إيجابية يوميا

لكن إوعى تخلي الحاجات دي تضيع وقتك… من ١٠ دقايق ل نصف ساعة كويس أوي في الأيام العادية

و ممكن أكتر من كده شوية في الأيام اللي فيها أجازات أو مش وراك شغل مهم تخلصه

المهم: جرعة طاقة إيجابية يوميا

الخطوة التالتة:

هي خطوات الحديث الشريف ده:

اتق الله حيثما كنت واتبع السيئة الحسنة تمحها وخالق النّاس بخلق حسن

اتق الله حيثما كنت

خليك رقيب على نفسك في الحاجات اللي مش كويسة وعاوز تبطلها

زي التدخين مثلا و أي حاجة تانية مش كويسة إنت لازم تبطلها … إنت عارف من نفسك كده المفروض تبطل إيه

خد قرار إنك تبطل الحاجة اللي مش كويسة دي

واتبع السيئة الحسنة تمحها

سبحان الله يا أخي … ربنا سبحانه وتعالى عارف إننا هانجتهد إننا نتقيه … لكن ممكن الواحد يقع في السيئات تاني

وبيقولك بكل بساطة الحل

إتبع السيئة بالحسنة… ياعم ما تتبع السيئة بالحسنة بقى… ياعم خليك حلو… هو أنا اللي بقولك يا عم…

يعني لما تعمل حاجة مش كويسة أو أي حاجة عاوز تبطلها …. إعمل وراها حاجة كويسة على طول

ناس كتيرة جدا جربت الطريقة دي ونجحت معاها نجاح مبهر والله, وعن تجربة من كل واحد نفذها

تحط حاجة خير كويسة محدد تعملها بعد أي حاجة مش كويسة…

زي إنك تتبرع بمبلغ محدد لجمعية خيرية أول لماتكسر وعدك وترجع للحاجة الغلط

وتبدأ من تاني تبطل الحاجة الغلط

أو تقوم تتوضى وتصلي ركعتين

أو تصوم تاني يوم

…. ده مش عقاب… ده العمل بالحديث:

اتبع السيئة الحسنة تمحها

ما تسمع الكلام بقى يا أمووووووور

الخطوة الرابعة:

اقفل البتاع ده دلوقتي حالا وقووووووووم شوف الشغل اللي وراك

حلو أوي كده … قوم امشي يالا

خد هنا… خد هنا تعالى؟؟؟

إنت رايح فين؟

إنت ماشي؟

بسرعة كده؟

فين الايك؟

فين اللايك؟؟؟

فين الشابشاشبشبكرايب؟؟ أه… فين؟

يالا … براءة إنت كده

سلااااام

 
إعمل متابعة\سابسكرايب لقناة أسلوب على يوتيوب, علشان توصلك حلقاتنا أول لما تنزل
http://bit.ly/osloop-sub
وكمان نزل برامج أسلوب للأيفون والأندرويد… علشان توصلك جميع حلقات أسلوب بالترتيب الصحيح
نزل أسلوب على ‫#‏موبايلك‬ ‫#‏الأندرويد‬ من هنا:
http://bit.ly/osloop-android
وأسلوب ‫#‏أيفون‬ من هنا:
http://bit.ly/osloop-iOS-eg
وده, ‫#‏موقع‬ أسلوب:
http://www.osloop.com
وده أسلوب على فايسبوك:
https://www.facebook.com/osloop.life/
وده أسلوب على انستاجرام:
https://www.instagram.com/osloop.life/
وأكيد أسلوب على تويتر:
https://twitter.com/OsloopLife