صرخة رقم ٥ من أسلوب : صباح الخير

في ناس نومها تقيل شوية

و في ناس… نومها طوييييل شوية

فيه اللي بينام ساعة أو ساعتين

فيه اللي بينام ١٠ ساعات

و فيه اللي بينام أيام

و فيه اللي بينام شهور وسنين

وفيه ناس عمرها ما قامت من النوم طول حياتها

في ناس بتقوم من النوم من نفسها… بدافع داخلي و سبب يخليها تختار إن كفاية نوم

و في ناس مش بتقوم من النوم غير ب ألم جامد أوي

ب خبطة جامدة أوي في الحياة

في ناس مش بتصحى من النوم غير لما تفقد حد عزيز عليها

و في ناس مش بتصحى من النوم غير بقلب مكسور

و في ناس كتيرة أوي مش بتصحى من النوم غير بعد فوات الأوان

بس أقولك… مش مهم

مش مهم إنت نمت أد إيه

مش مهم إنت بقالك أد إيه نايم

مش مهم إحنا دلوقتي بعد فوات الآوان… ولا لسه في فرصة نرجع

المهم: إن إنت بتسمعني دلوقتي

المهم إن ربنا بعتلك الرسالة دي دلوقتي

المهم … إن إنت لسه عندك بواقي قلب ممكن يستوعب

بواقي قلب ممكن يخلي عينيك تبكي و تصحيك من النوم

حتى لو قلب مكسور أو قلب مصدي ماعرفش قبل كده يعني إيه “قلب”

المهم… إن أنا وإنت بنتكلم مع بعض دلوقتي

أنا بحكيلك قصة حياتك … وإنت مصدوم ما كنتش متوقع إني أعرف كل ده عندك

أنا مش الراجل اللي بيتكلم وإنت بتسمع صوته دلوقتي

أنا … إنت في المرايا

الكلام اللي هاقوله مش أنا اللي هاقوله

إنت … اللي هاتقوله لنفسك

إنت اللي هاتسمع نفسك بنفسك إنت كنت نايم في إيه

و إيه الفرص اللي عدت منك

وتفكر نفسك كويس إنت وصلت لغاية فين ب نومك ده

كله ده, إنت اللي تقوله لنفسك … وإنت اللي تراجع بيه نفسك

لكن اللي أنا هاقولهولك وهاقوله لنفسي

إن مهما نمنا كتير

ومهم قصرنا

ومهما إخترنا إختيارات غلط

و مهما كنا عايشين في خنقة وهم وألم دلوقتي

ده ميعاد إننا نصحى من النوم و نقوم

عندي ليك خبر حلو أوي

في آلاف من الناس … أذكى مني ومنك مليون مرة

وأنجح مني ومنك مليون مرة

و عندهم من العلم والمال والعقل والسلطة والشهرة أكتر مني ومنك مليون مرة

و برغم كده… إختاروا إختيارات غلط كتيرة

وبرغم كده … جت عليهم فترات كتيرة نامووا فيها ونسوا الخير اللي هما فيه

و إتسببوا بنومهم ده في مصايب كبيرة أوي لحياتهم وحياة غيرهم

يعني … مش أنا و إنت بس اللي بننام وبتروح علينا نومة

لأه … ده جزء من الحياة

بس أنا وإنت … محتاجين اللي يجي يفكرنا

محتاجين اللي يصحينا

محتاجين اللي يزعق في ودننا ويقولنا: كفاية كده

كفاية نوم …. وقت الصحيان من النوم جه

النوم الكتير اللي إحنا كنا فيه ده … هو الدافع اللي هايخلينا نصحى من النوم وقت كتير أوي

الغلطات اللي غلطناها في حياتنا … هي الدافع إننا ما نغلطش لوقت كبير أوي أدام

الحاجات اللي ضيعناها واللي ضاعت مننا في حياتنا … هي الدافع إننا ما نضيعش أبدا أي فرصة أو أي لحظة بعد كده

الغلطات اللي إحنا غلطناها في حياتنا … هي النااااار اللي هاتخلينا عمرنا ما نغلط تاني

لأننا إتعلمنا كويس إن النوم الكتير … بيقتل أي متعة في الحياة

لأننا نمنا كتير … و النوم الكتير وحش أوي

صباح الخير

يا بختك والله

يا بختك والله

دلوقتي … تقدر تصحى من النوم بنفسك

وتسأل نفسك: أنا كنت مضيع إيه

تقصير في حق ربنا؟

عبادة؟

دراسة؟

مستقبل؟

رياضة؟

أفعال مش كويسة قتلت في قلبي كل متعة للحياة؟

و تعالى أنا وإنت نصحى من النوم بإختيارنا دلوقتي

لأن لا أنا ولا إنت نقدر نستحمل إننا نكمل نوم

لا أنا ولا إنت نقدر ندفع تمن إننا نصحى متأخر عن كده

و الأكبر من كده… لا أنا ولا إنت نقدر نصحى من النوم بعد نهاية الحياة

هافكرك وهافكر نفسي مرة تانية

أنا و إنت … بنعيش الحياة دي … مرة واحدة بس

مرة … واحدة … بس

أنا وإنت بنتقابل في الحياة دلوقتي مرة

بنتقابل مرة و أنا بفكرك وبفكر نفسي إن إحنا فعلا في الحياة

مش بنعمل تمرين أو بنحفظ أدوار علشان نطلع نمثل دور في مسلسل أو فيلم

لأه … هي دي الحياة

و إنت دلوقتي جوه اللعبة و جوه الحياة

طالما إنت جوة الحياة وجوه اللعبة … طيب ما تيجي نكسب بقى

طالما إحنا كده أو كده في الحياة … طيب ما تيجي نكسب

حتى لو خسرنا ألف مرة قبل كده … تعالى نكسب مع بعض أول مرة

من دلوقتي حالا: أنا قررت أصحى من النوم

و إنت كمان هاتصحى من النوم

وأنا قررت إني ما أخسرش تاني … مهما كنت خسرت قبل كده ومهما كنت ضيعت قبل كده ومهما كنت عملت أخطاء قبل كده

وإنت كمان … وقت إنك تصحى … و ما تخسرش تاني أبدا

شهيييييق طوييييل

نفس عميييييييييق أوي

يااااااه

يا باختك والله

صباح الخير … ومبروك قلبك الجديد