https://www.youtube.com/watch?v=w_b3JbgZ2iI
م. بانسيه : أنت رايح فين يا أسلوبي ؟؟
أسلوبي : أنا ! أنا رايح أذاكر مع أصحابي
م.بانسيه : رايح تذاكر ولا تاكل يا أسلوبي .. و ايه الشنطة ديه كلهاا .. ديه فيها البلاي ستيشن ديه ولا ايه؟؟
أهلاً بيكم في حلقة جديدة من برنامج استديو أسلوب .. النهاردة هتكلم معاكم عن موضوع جديد .. و هو موضوع انك ازاي تذاكر مع مجموعة من زمايلك ..
طلبة كتير فاهمة ان المذاكرة في مجموعة هي عبارة عن مجموعة من الطلبة قاعدين في المكتبة و كل واحد بيذاكر لوحده .. اه ده هيخليك تذاكر برضه عشان شايف اللي حواليك بيذاكروا .. و ده هيديك حافز كبير بس مش هو ده موضوعنا النهاردة ..
المذاكرة في مجموعة .. هي مشاركة الطلبة في المذاكرة .. و ديه ليها خطوات و قواعد هكلمكم عليها دلوقتي حالاً ..
طبعاً مفيش شك أن المذاكرة في البيت و أنت قافل علي نفسك و لوحدك أهم و أحسن الطرق للمذاكرة .. و أن الطريقة ديه هي السبب للنجاح ..
طب امتي اذاكر مع أصحابي ؟؟
في طلبة بتخلص مذاكرتها أول بأول و بتراجع دائما علي القديم .. و لكن بيجلها شعور بالملل من المذاكرة لوحدها كل يوم ..
هو ده الوقت المناسب للمذاكرة مع أصحابك .. ان بعد ما تكون مخلص دروسك .. ايه اللي يمنع انك تنزل و تغير جو مذاكرتك شوية .. و بدل المذاكرة في البيت .. تذاكر مع أصحابك و كلمة أصحابك هنا هي ان الولاااااااد يذاكروا مع الولاااااد و البناااااااات تذاكر مع البنااااااااات هاه ؟؟
طيب عرفنا الوقت اللي نذاكر فيه في مجموعة يكون امتي … نعرف بقي هو ايه الهدف اصلاً من المذاكرة في مجموعة ؟؟
أولاً .. هيزود معلوماتك أكثر لانك بتسمع معلومات جديدة و بطريقة مختلفة ، ثانيا .. هيديك حافز و هدف كبير للمذاكرة لانك شايف زمايلك حوليك بيذاكروا و بيتعبوا فغصب عنك هتكون زيهم .. كمان هتغير من روتين مذاكرتك و يخليك تقتل الملل ..
نيجي بقي للخطوات و القواعد اللي لازم نتبعها عشان نضمن ان وقتنا الثمين مايضعش مننا ..
أول خطوة ….
لازززززم و لا بد و حتما تختار كويس جداً زمايلك اللي تذاكر معاهم .. زمايلك اللي عندهم نفس الهدف و نفس الطاقة اللي عندك اللي حاطين المذاكرة في دماغهم مش نازلين يلعبوا … و طبعا دول بيبقوا عددهم قليل عشان كدة المجموعة لازم تكون بالكتير أوي 3 أو 4 من زمايلك ..
و معلومة صغيرة كده ليك .. مش لازم يكونوا شاطرين و فائقين الذكاء .. لا خالص .. اختار الملتزم و اللي مقطع نفسه مذاكرة عشان يوصل للنجاح و بس.
ثاني خطوة …
اختاروا القائد للمجموعة .. في قانون كده لأي مجموعة .. اي فريق .. اي شلة حتي .. لازم يكون ليها قائد .. و الا الموضوع هيكون سلطة خالص و هنعمل زي أسلوبي كده .. هدفنا الأكل و الكلام فقط ..
فلازم يكون في قائد و القائد ده هو أكثر واحد ملتزم في كل حاجة .. مواعيده .. مذاكرته و تنظيمه الكويس ..
و القائد ده لازم يحط قوانين و عقاب .. يعني ايه ؟؟
أسلوبي : قوانين و عقاب ايه بس حضرتك هو احنا في سجن ؟؟
م. بانسيه : أيوه يا أسلوبي و كفاية أكل بقي .. ارحم نفسك
قوانين لايه و عقاب لايه بقي ؟؟ .. لازم القائد ده يحط قوانين للي جعان دائما زي أسلوبي كدة .. يحدد وقت للأكل و وقت للبريك بتاعكم .. و مواعيد تتقابلوا فيها و يعمل جدول المذاكرة بتاعكم اللي تمشوا عليه و كمان ينظم وقت الاسئلة و طريقة المناقشة بينكم ..
أما العقاب .. فده لأي شخص في المجموعة يتكلم في أي موضوع خارج المذاكرة في وقت المذاكرة .. لأنكم و انتم قاعدين اللي هيتكلم في الكورة .. و اللي هيتكلم في الأكل .. و اللي هيتكلم في الأفلام و المسلسلات و اللي هينم علي خلق الله … فالعقاب ده هو أنسب حل .. و يكون عقاب بسيط طبعاً .. مثلا يعزمكم علي الغداء .. أو يدفع مواصلاتكم كلها و انتم مروحين أي عقاب يخليه يندم أنه يتكلم في وقت المذاكرة مش في وقت البريك ..
الخطوة الثالثة…
تنظيم وقت المناقشة و الاسئلة ، المذاكرة هنا عبارة عن المشاركة .. مشاركة المعلومات بينكم ..
يعني كلكم تكونوا مذاكرين درس معين .. كل واحد يكون مذاكره في البيت لوحده و محضر أسئلته للدرس و كاتب النوتس بتاعته في ورق ..
و تختاروا أحسن واحد محضر الدرس ده و يبدأ يشرحه بطريقته .. و بعدها يجي وقت المناقشة بقي .. اللي كاتب معلومة زيادة يقولها .. اللي فاهم جزء كويس يقولوا برضه بطريقته كل ده هيزود تركيزكم ويقوي معلوماتكم ..
خلصنا شرح .. جه وقت الأسئلة و ديه ليها كذا طريقة بقي .. ممكن تقسموا نفسكوا مجموعتين و تعملوا مسابقة بالأسئلة اللي يجاوب أسرع أو اللي يجاوب عدد أسئلة أكثر …
و ممكن قائد المجموعة هو اللي يقول السؤال و الأسرع منكم يجاوب .. ممكن كمان تكتبوا الأسئلة كلها في كذا ورقة و كل واحد يختار ورقة عشوائية و يجاوب .
الطريقة ديه مش هتخليكم تذاكروا الدرس .. ديه هتخليكم زي ما بيقولوا كدة .. تشربوا الدرس كله
و أخيراً عايزة بس أفكركم بكذا نقطة .. أول حاجة انتوا نازلين تذاكروا .. ثاني حاجة .. متخليش كل اعتمادك علي المجموعة خليك فاكر انك في الامتحان لوحدك و ان المجموعة دي أداة انت بتستخدمها بس للمراجعة علي معلوماتك فقط .. ثالث حاجة و الاهم .. اياكم و الغيرة .. مش معني ان واحد في المجموعة جاب درجات عن باقي المجموعة .. فهو بقي سوسة و بيذاكر من وراكم و خلبوص .. لا .. هو ذاكر كويس في البيت و نزل يراجع معاكم و بذل أكبر مجهود عنده عشان يتفوق .. فبدل ما نغير منه .. نتعلم منه .. صح ولا ايه يا أسلوبي .. أسلوبي .. أنت نمت و لا اييه ؟؟
أسلوبي : هاه .. أه أه صح طبعاً حضرتك أومال ايه !!
م.بانسيه : قلتلك بلاش أكل كتير أديك نمت مني أهو ….
ديه كانت طريقة جديدة من طرق المذاكرة .. أتمني تطبقوها صح ..
و متنسوش تعملوا شير للحلقة دي و ما تبخلوش بفيدتها لأصحابكم و وزمايلكم.
أشوفكم و حلقة جديدة من أستديو أسلوب ….