أهلا بيكم في الحلقة رقم ٢٨ من برنامج أسلوب في دقيقة

اللي بنجاوب فيها على الأسئلة اللي بتوصلنا في كومنتس

و اللي عمرها ما بتكون دقيقة أبدا

السؤال بتاع النهاردة: هو إنتوا ليه سميتوها أسلوب في دقيقة… طالما هي عمرها ما بتكون دقيقة؟ … أبدا؟

طيب… إيه رأيك تحاول تجاوب إنت السؤال ده في كومنت… و نشوف مين إجابته صحيحة

ولغاية لما تكتبلنا إنت إجابة السؤال ده… (ليه حلقات أسلوب في دقيقة… عمرها ما بتكون دقيقة)

هانحاول إحنا نجاوب على سؤال مهم جدا جدا جدا بجد

السؤال ده فعلا من أهم الأسئلة اللي في الحياة كلها … وإجابته فعلا مش سهلة

السؤال: أعمل إيه في الناس اللي في حياتي… بس هما مش مخليين حياتي تكون سعيدة

السؤال ممكن يكون مش واضح أوي… فا أنا هاحاول أوضحه شوية

في ناس في حياتك ممكن يسببولك مشاكل وإحباط… والناس دي ممكن تتجنبهم أو حتى تتخلص منهم بسهولة

زي صديق سوء… زميل عمل سيء الطباع… مدير متسلط…

كل دي ناس, ممكن بسهولة أوي تشطب عليهم من حياتك … وتشيلهم من تفكيرك… ودول هانتكلم عليهم بالتفصيل في حلقة جاية إن شاء الله…

بس بصراحة… مش هما دول اللي هانتكلم عليهم في الحلقة دي

اللي هانتكلم عليهم هما الناس اللي لازم حياتك تكون مرتبطة بيهم طول العمر

و ممكن يكون حد فيهم بيخلي حياتك صعبة

زي مثلا أشخاص من أفراد عائلتك من الدرجة الأولى مثلا… مثلا يعني

إنت شاطر بقى وفاهم… مش كده ولا إيه؟؟؟ أه أه؟ أه؟ فاهم؟… أه؟ فاهم؟؟؟

شكلك فاهم

طبعا أنا مش هاكذب عليك وهاقولك إن في زرار سحري موجود تحت السجادة اللي تحت ترابيزة السفرة

وإنك لما تضغط على الزرار السحري ده, هاتخلي عائلتك كلها إيجابية وبتشجعك وبتغنيلك أغنية… إتقدم إتقدم… وكفاية خلاص تتندم… تا تا تا تا تا تا

لكن… أنا هافتحلك الستارة شوية… يمكن إنت مش شايف الصورة كاملة:

الفصل الأول: هو إنت لواحدك اللي كده؟

المشهد الأول:

كان في محاضرة ل “توني روبنز” و واحد بيشتكي فيها إن كل المشاكل والإحباطات اللي بيقابلها في الحياة هي بسبب عائلته اللي بتحبطه وبتحاربه و بتشحنه غضب وطاقة سلبية

وكان رد “توني” روبنز عليه بإنفعال كبير جدا… يعني إيه عيلتك محبطة وسلبية؟… إنت فاكر إن دي عيلتك إنت بس…

و “توني روبنز” قاله… أنا نفسي في حياتي كلها أشوف عائلة واحدة مش “محبطة وسلبية”

…. طبعا أنا مش بقولك إن كل العائلات كده… لكن ده للأسف الطبيعي

تعالى نتخيل بس إن واحد مثلا ربنا إختارله إختبار في الحياة… إنه يعيش من غير إيدين مثلا

إختبار صعب مش سهل

والإختبار ده … غالبا مش بيكون لك أي

المشهد التاني:

تعرف سيدنا إبراهيم؟

تعرف قصته؟

تعرف إنه كان معاه رسالة من ربنا؟

تعرف مين اللي كان بيحاربه؟؟؟؟؟

أيوة … شاطر ومذاكر… أبوه آذر هو اللي كان بيحاربه علشان يترك عبادة ربنا ويعبد الأصنام

المشهد التالت:

تعرف سيدنا لوط؟

تعرف قصته؟

تعرف مين اللي كان بيحاربه وبيحبطه؟

قومه كلهم من بره… وزوجته من جوه بيته!!!

يعني مش كفاية الناس اللي من بره… لأه… زوجته هي كمان

المشهد الرابع:

تعرف سيدنا نوح؟

فاكر لما كان بيحاول ينقذ إبنه ويقوله: إركب معنا

وإبنه رفض رسالة وعرض أبوه… مع إن أبوه نبي مرسل

المشهد الخامس:

تعرف مين كان بيحارب سيدنا محمد صل الله عليه وسلم؟

تعرف إن عمه أبو لهب و زوجة عمه كانو من أكبر أعدائه؟

المشهد السادس:

حضرتك … أيوة إنت… وأيوة إنتي

إنت فاكر إن إنت لواحدك اللي عندك أشخاص في حياتك بيحبطوك وبيحاربوك وماتقدرش تتخلص منهم؟

بجد؟… إنت فاكر كده؟

طيب فكر كده كمان مرة… تخيل نفسك واحد من الناس العظماء اللي فوق دول…

نبي… أبوه اللي بيحاربه

و نبي… إبنه رفض رسالته

و نبي … زوجته بتحبطه في رسالته وبتناصر قومه في الغلط

و نبي… عمه كان بيحاربه

…. طيب وإنت يا جميل يا قمر يا عسل يا حبوب… إيه؟؟؟ تبدل مكان مين من الناس اللي فوق دوول؟

فكر شوية كده بالله عليك

وإبدإ إستوعب إن…. مرحبا بك في الحياة

الفصل التاني: طيب مش يمكن إنت اللي…؟

يمكن؟

آه… ليه لأه… والله ممكن

من باب العدل والأمانة كده… في أحيان كتيرة أوي بنكون إحنا أحد أسباب إن حد من أهلنا يكون سبب إحباط لنا

يعني مثلا: لو أنا أهلي بيجتهدوا على قدر إستطاعتهم علشان أتعلم… وأنا فعلا مش باخد خطوات حقيقية في إتجاه إني أكون إنسان ناجح و مؤدب و بار ب أهلي… أكيد ده هايأثر عليهم بالسلب… ويخلي معاملتهم صعبة معانا

لو إنت زوج مثلا … وشايف إن زوجتك هي اللي بتضغط عليك نفسيا و إنها سبب عدم سعادتك

طيب مش زوجتك بتجتهد وبتتعب في البيت ومع الأولاد طول اليوم… والأولاد دول بيجيبوا تخلف عقلي برضه … وممكن تكون كمان بتشتغل

ولو إنت مش بتساعدها بالتشجيع والكلام الكويس على قدر إستطاعتك

أكيد يا عبقري زمانك, زوجتك هاتكون كارهه للحياة… وهاتطلعه على دماغك يا جميل

ولو إنتي زوجة… وشايفه إن جوزك نكدي وبخيل وعصبي وكمان عنده شعر في قفاه

طيب… مش ممكن… ممكن يعني

يكون هو بيتعب أوي في الشغل, وكاره نفسه وكاره الشغل والمرتب إنتي عارفه إنه مش بيكفي حاجة

مش يمكن ده هو السبب في إنه في كل الصفات الصعبة دي.. وهو محتاج اللي يخفف عنه

الخلاصة

إحنا عارفين كويس أوي إن ممكن يكون في ناس حواليك من أغلى الناس عندك في حياتك, وإنت شايف إنهم هما سبب إحباطك

لكن إحنا فتحنا لك الستارة النهاردة علشان تعرف حاجتين مهمين

الحاجة الأولى: الناس دي جزء من الحياة, وكل شخص هايقابل ناس من دي في حياته

ولو إنت شايف حد مفيش عنده أهل مزعجين في حياته

ماتخافش… رزقه جاي في يوم من الأيام… كل واحد بيجيله اليوم

إنما المهم بقى… هي الحاجة التانية

واللي هي: لما تقابل الناس المهمين دول في حياتك, ويكونوا هما سبب عدم سعادتك

لازم تاخد وقت… وتحط نفسك مكانهم, وتفكر بطريقة تفكيرهم حتى لو هي غلط و مش صح

وتحاول تفهم إيه الحاجات اللي مخليه حياتهم صعبة… وبالتالي … بيخلوا حياتك إنت كمان صعبة.

في أغلب الأحوال… هاتلاقي إن الناس دي… محتاجة مساعدة فعلا

مش في كل الأحوال طبعا… لكن… في … أغلب … الأحوال

و للأمانة… الإجابة مش بتقف عند كده

بالعكس… دي مجرد بداية الإجابة

لأن كل شخص و كل حالة وبتتعالج لوحدها

… و … طبعا طبعا طبعا

أنا والله فخور بيك إنك وصلت معانا لمرحلة إنك تضغط لايك على الفيديو

علشان أدعيلك ربنا يرزقك ب سندوتش حلاوة بالقشطة

يالا يا أمور يا جميل يا حبوب

حارب كل معوقات الحياة… وإضغط على زرار اللايك الجميل

و إبعت الحلقة دي لكل واحد بيشتكي إن في حد من أهله هو سبب عدم سعادته

سلاااااام