غير حياتك: أسلوب في دقيقة الحلقة رقم ١٢ – إمتى حياتي هاتكون سعيدة

أهلا بيكم في الحلقة رقم ١٢ من برنامج: أسلوب في دقيقة

اللي بنجاوب فيه على الأسئلة اللي بتوصل لنا في كومنتس على قناة أسلوب, بس مانوعدكش إنها هاتكون دقيقة بالظبط

سؤال النهاردة… بيوصلنا كتير جدا وبصيغ مختلة… بس معناه متقارب

هو أنا إمتى حياتي هاتبقى سعيدة؟

أنا كل أيامي مش سعيد… وحياتي كلها ملخبطة…

أنا طالب ونفسي أخلص دراسة بقى علشان حياتي تبقى سعيدة ومستقلة

أنا أم لطفل رضيع… ونفسي يكبر شوية علشان أرتاح وأناااااام

أنا أولادي في المدارس… وضغط المذاكرة والبيت والدروس والمصاريف هايجيبلي هبل

أنا دايما اللي حواليا بيضايقوني

أنا ماما بتفتح حنفية المطبخ السخنة وأنا باخد شاور في عز الساقعة…

أنا إمتى حياتي هاتبقى سعيدة؟

طبعا إجابة السؤال ده هو إجابة الحياة كلها… ومش مجرد سؤال في دقيقة

بس النهاردة هانشارك بعض… فكرة واحدة بس… هاتغير حياتك

الإنسان بيكون سعيد… لما بيعمل كل حاجة في حياته صح…. عبادة وحياة… روح وجسد

حياتك هاتبقى سعيدة… لما تقرر إن النهاردة بس يكون أجمل يوم في حياتك… يوم مثالي

لو النهاردة بس… عملت كل عباداتككلها صح مليون في المية

ولو النهاردة بس… النهاردة بس… موت نفسك في المذاكرة… وفي شغلك… وفي التمرين… وفي التركيز… وبطلت تدخين وكل حاجة غلط… النهاردة بس… وماتشغلش نفسك ببكرة… إبقى إخربها تاني بكرة لو حبيت

و لو النهاردة بس قررت تقابل تحديات المواصلات والشغل والزحمة والحر وضغوط الحياة بإبتسامة بجد… النهاردة بس ماتقلقش… ماتشغلش نفسك إنك تكرر الموضوع ده بكرة

و لما النهاردة بس… كل ما أولادك يعيطوا في البيت ويجيبولك هس-هس التنين… قررتي إن النهاردة بس… هاخلي يوم بسيط ومش هاتجن عليهم وأتحول ولا حاجة… وبكره هافترسهم أحيااااء… 

قرر بس إن النهاردة تعيشه أجمل يوم في حياتك أكتر يوم مثالي في حياتك…. وإنت وشطارتك… يمكن تنجح في أول مرة بنسبة ٢٠ في المية إن يومك يكون مثالي…

 وهاتفضل تحسن نفسك… يوم بعد يوم… لغاية لما تعلم نفسك إزاي تعيش أيام جميلة مع تحديات الحياة

بس المهم… ماتشغلش نفسك بمصايب إمبارح… إلغيها من حياتك النهاردة بس… وماتشغلش نفسك يومك بكرة هايكون إزاي

هاتعيش يوم بجد جميل جدا إنت محتاجة… ودي أول خطوة تمرين لحياة سعيدة… لازم تجربها…. وكرر تجربة اليوم المثالي ده مرة كل أسبوع مثلا.. وبعدين مرتين في الأسبوع… 

هاتتعلم إزاي تقابل تحديات الحياة … بفكر صافي

قولنا في كومنت, إزاي نخلي النهاردة أكتر يوم مثالي في حياتنا

وشير الحلقة دي مع كل الناس… يمكن بكرة نقابل بعض وإحنا كلنا يومنا مثالي

إعمل متابعة\سابسكرايب لقناة أسلوب على يوتيوب, علشان توصلك حلقاتنا أول لما تنزل
http://bit.ly/osloop-sub
غير حياتك: أسلوب في دقيقة – حلقة رقم 12 – إمتى حياتي هاتكون سعيدة؟ osloop
وكمان نزل برامج أسلوب للأيفون والأندرويد… علشان توصلك جميع حلقات أسلوب بالترتيب الصحيح
نزل أسلوب على #‏موبايلك #‏الأندرويد من هنا:
http://bit.ly/osloop-android
وأسلوب #‏أيفون من هنا:
http://bit.ly/osloop-iOS-eg
وده, #‏موقع أسلوب:
http://www.osloop.com
وده أسلوب على فايسبوك:
https://www.facebook.com/osloop.life/
وده أسلوب على انستاجرام:
https://www.instagram.com/osloop.life/

الحلقة صوت فقط على ساوند كلاود