حدد أهم الأعمال … اللي هاتخليك تحس إنك أنجزت في اليوم بتاعك

إبدأ يومك مع مبادئ أسلوب والمبدأ السابع من سلسلة ال ٢١ مبدأ لحياة أكثر إيجابية

“حدد أهم الأعمال … اللي هاتخليك تحس إنك أنجزت في اليوم بتاعك”

كلنا… بنجي آخر اليوم وبنحس إحساس من إتنين

يا إما بنقول… يااااه… النهاردة أنجزت حاجات كتيرة أوي ومهمة

يا إما بنقول… ييييي اليوم راح مني, زي إمبارح… والواحد بيكون متضايق جدا!

اليوم اللي بنكون حسينا فيه إننا عملنا إنجازات كبيرة جدا ده, بيكون ٢٤ ساعة كاملين

واليوم اللي بنوصل لآخره… وبنحس إنه ضاع مننا… بيككون برضه ٢٤ ساعة كاملين…

واليومين دول ممكن يكون المجهود اللي بنبذله فيهم, متساوي

بس في أيام… بنحس إن إحنا فعلا أنجزنا فيهم

وأيام تانية… بنحس إنه يوم ضايع من حياتنا

إحنا النهاردة بنتكلم على حاجة بتحصل لنا كلنا

إن إحنا ممكن نحط مجهود كبير في يوم… ومانحسش بإنجاز آخر اليوم… وده بيسبب مشكلة كبيرة لنا جدا… وبيسبب لنا إحباط

وإحنا جايين النهاردة علشان نحل المشكلة دي

كل واحد فينا, بيكون عنده حاجة معينة… لو عملها في اليوم وخلص منها… هايحس إنه عمل إنجاز وعمل كبير, حتى لو ما إشتغلش غير نص اليوم بس

وبعد كده هايحس براحة, وأي حاجة تانية وراه, هاتكون سهلة ومتشجع إنه يعملها

اللي لازم نتعلمه النهاردة, إن إحنا نعرف إيه الحاجة اللي لو عملناها… هانكون عملنا إنجاز في يومنا

لو موظف مثلا, ووراه حاجات كتيرة مهمة جدا يعملها في يومه زي:

– متابعة فريق العمل بتاعه

– أو إنه يبعت إيميل للموظفين عن قوانين الشركة اللي لازم يلتزموا بيها

– أو إنه يسلم مشروع مهم جدا لعميل

يبقى أكيد, لو إختار يعمل أي حاجة من الحاجات دي علشان يحس بإنه عمل إنجاز في يومه, يبقى لازم يختار إنه يسلم المشروع المهم للعميل

لأنه لو عمل الحاجات التانية … حتى لو إجتهد فيها… مش هايكون أنجز آخر اليوم, لأنه عنده حاجة أهم … لازم ينجزها

إسأل نفسك كل يوم الصبح: إيه الحاجة اللي لو خلصتها, هاجي أخر اليوم, وأقول أنا النهاردة أنجزت

الحاجة دي بتكون مختلفة كل يوم, من شخص للتاني

يعني مثلا, الأم اللي بتدير منزل وأسرة كاملة, في حاجات معينة في يومها بتخليها تحس إنها أنجزت

والطالب طبعا طبعا… بيكون عنده حاجات ممكن يخلص منها, ويحس إنه أنجز

هووم ورك الحلقة:

إكتبلنا في كومنت إيه الحاجة الي لما تخلصها النهاردة, هاتحس آخر اليوم إنك أنجزت

سلسلة ال ٢١ مبدأ لحياة أكثر إيجابية, معمولين علشان يتنفذوا مع بعض من المبدأ الأول للأخير… إبدأ راجع من أول مبدأ تاني.. ونفذ المبادئ البسيطة جدا دي, هاتغير بيهم حياتك

ولو ماكنتش عملت سابسكرايب لقناة أسلوب على يوتيوب لغاية دلوقتي… يبقى تكتب لنا في كومنت:

سوري.. مش هاعمل كده تاني… وهاعمل سابسكرايب في ثواني

الحلقة صوت فقط على ساوند كلاود:

 

إعمل متابعة\سابسكرايب لقناة أسلوب على يوتيوب, علشان توصلك حلقاتنا أول لما تنزل
http://bit.ly/osloop-sub
وكمان نزل برامج أسلوب للأيفون والأندرويد… علشان توصلك جميع حلقات أسلوب بالترتيب الصحيح
نزل أسلوب على #‏موبايلك #‏الأندرويد من هنا:
http://bit.ly/osloop-android
وأسلوب #‏أيفون من هنا:
http://bit.ly/osloop-iOS-eg
وده, #‏موقع أسلوب:
http://www.osloop.com
وده أسلوب على فايسبوك:
https://www.facebook.com/osloop.life/
وده أسلوب على انستاجرام:
https://www.instagram.com/osloop.life/