غير حياتك: مبدأ ٥ من ٢١ مبدأ لحياة اكثر إيجابية، رتب أولوياتك - أسلوب osloop

إبدأ يومك مع مبادئ أسلوب

والمبدأ الخامس من مجموعة ال ٢١ مبدأ لحياة أكثر إيجابية

رتب أولوياتك...

إبدأ بالأكبر والأصعب والأهم أولا

لأن طاقتنا زي البطارية, بتفضل تفضى على مدار اليوم, فا إبدا يومك وإنت لسه بطاريتك مليانة

بإنك تنجز أهم وأصعب الأعمل الموجودة في خطتك اليومية

أو بمعنى أصح

إبدأ بالأعمال الغلسة الأول

وسخر كل طاقتك وتركيزك على الأعمال دي… وإخلص منها

هات خطتك اليومية… اللي إتعلمت تعملها في الحلقة رقم ٢ من سلسلة ال ٢١ مبدأ لحياة أكثر إيجابية

رقم من ١ ل ٥ بجانب كل عمل مكتوب في خطتك اليومية

حط رقم ١ بجانب العمل المهم والطارئ….. وإبدأ تنفيذه فورا … وإجبر نفسك على إنك ماتعملش أي حاجة أو أي عمل تاني لغاية لما العمل ده يتم إنجازه

حط رقم ١ كمان بجانب الأعمال اللي لو ماعملتهاش هايكون لها عواقب شديدة… والعكس, لو عملتها هايكون لها أحسن النتائج …

زي المذاكرة أيام الإمتحانات …

أو إنك تقابل عميل مهم في شغلك

أو إنك تجيب هدية لمراتك يوم عيد جوازكم مثلاا…. وإلا العواقب… مانتا عارف :joy:

أو إنك تلاقي فردة الشراب اللي ضايعة من جوزك… علشان توفري على نفسك خناقة كل يوم الصبح…. وتقدري إنك تبدأي يومك بنشاط وحيوية

حط رقم ٢ … بجانب الأعمال المهمة برده… بس مش طارئة… ومش هايترتب عليها عواقب سيئة في الوقت القريب… لكنها مهمة جدا في الحياة

- زي إنك تقرأ صفحتين من كتاب تنمية بشرية يوميا

- و زي إنك تمارسي الرياضة يوميا

- وحاجات تانية كتيرة… شاركنا بيها في كومنت

حط رقم ٣ بجانب الأعمال اللي ملهاش أي عواقب أو ضرر لو معملتهاش …

زي الخروج مع أصحابك والترفيه عن نفسك… مطلوب طبعا…  بس مش كل يوم

خد أجازة من الأجازة شوية… ما إنت كنت لسه مضيع اليوم كله في خروجة إمبارح

وإنك تروحي تعملي شوبينج…

الشوبينج جميل مقلناش حاجة… وبيعالج أمراض نفسية كتيييييييرة والله…

يعني تبقى قاعدة في البيت ظهرك ورجلك ودماغك واجعينك

وفجأة لو ربنا رزقك بفلوس… تلاقي نفسك ماشاء الله… خفيتي ونزلتي تجري تعملي شوبينج… عادي خالص… بتحصل!

أما الأعمال الل تحط جانبها ٤ دي… الأعمال اللي تتزاكى فيها… وتخلي غيرك يعملها … لو ينفع

- لو ينفع تخلي حد يعمل لك حاجة بأي مقابل… علشان تفضي لنفسك وقت تعمل فيه حاجات أهم… يبقى حط ٤ بجانب الأعمال دي

-> زي إنك تجيب محاسب يساعدك في حساباتك آخر السنة

-> أو تجيبي مساعدة ليكي تساعدك على أعمالك اليومية

-> أو تجيب واحد صاحبك… يلعب رياضة أو يذاكر مكانك…صحتك بالدنيا

أما الأعمال اللي المفروض ماتعملشها خالص وتضييع الوقت… حط جانبها رقم ٥ وإنت قلبك مطمن

طبعا… كل واحد فينا أولوياته غير التاني… ممكن تكون أهم حاجة بالنسبة لواحد… هي رفاهية لواحد تاني

قولنا في كومنت… بترتب أولوياتك إزاي؟ وراجع الحلقة رقم واحد من سلسلة: مكتبة أسلوب… وتلخيص كتاب العادات السبع للأشخاص الأكثر فاعلية… هاتلاقي النقطة دي بالتفصيل في الكتاب

و طبعا وإنت بتشد باب الحلقة وخارج… ماتنساش تطفي النور وتدوس لايك وسابسكرايب… وتقفل باب البلكونة … وتشير الحلقة مع أصحابك

إعمل متابعة\سابسكرايب لقناة أسلوب على يوتيوب, علشان توصلك حلقاتنا أول لما تنزل http://bit.ly/osloop-sub غير حياتك: أسلوب في دقيقة - حلقة رقم 12 - إمتى حياتي هاتكون سعيدة؟ osloop وكمان نزل برامج أسلوب للأيفون والأندرويد… علشان توصلك جميع حلقات أسلوب بالترتيب الصحيح نزل أسلوب على #‏موبايلك #‏الأندرويد من هنا: http://bit.ly/osloop-android وأسلوب #‏أيفون من هنا: http://bit.ly/osloop-iOS-eg وده, #‏موقع أسلوب: http://www.osloop.com وده أسلوب على فايسبوك: https://www.facebook.com/osloop.life/ وده أسلوب على انستاجرام: https://www.instagram.com/osloop.life/

 

الحلقة صوت فقط: