بمناسبة شهر رمضان الكريم و كل سنة و كلكم طيبين،

كلنا هنبدأ نبعت رسايل الواتس أب وبوستات الفيس بوك لكل حبايبنا،

وأصدقائنا اللى بنحبهم.

بس أهم من كل الناس دى أنك متنساش تبعت رسالة للناس اللى أنت مزعلهم، و اللى أنت عارف و متأكد أنك مزعلهم، رسالة هتفرق معاهم و تهديهم من من ناحيتك، وبتمهد الطريق للصلح، اذا كنت حريص على أنك فعلا تصالحهم.

و الأهم من الناس دول كلهم, الناس اللى مزعلينك، أيوة سمعت صح الناس اللى مزعلينك، اللى مش طايقهم، اللى عايز تولع فيهم، أيوه هم دول اللى جم فى دماغك دلوقتى حالا.

اعمل اللي هقولك عليه دلوقتى:

وقف تفكيرك، اكتم نفسك و سد مناخيرك، هات صوباعك الجميل ده- و

أكتب معايا ” كل سنة وانت طيب يا فلان أو يا فلانة” و أضغط سند “send “، الموضوع ده هيفرق معاك “أنت” بس والله هتحس براحة نفسية و هتهدى نفسيا، خصوصا خصوصا لو لقيت رد جميل أوى لرسالتك دى، ولقيت اللى مزعلك بيصالحك، والله هتفرح و عبء هيتشال من عليك، وهتبطل تفكر فى الشخص ده بطريقة وحشة، ويبطل الاحساس الوحش ده يجيلك بقى و تتحرر منه.

تتحرر من مشاعر الغضب، تتحرر من مشاعر الغيظ، تتحرر  من…..

ايوه سمعاكي يا اخت سماح……”طيب لو ماردوش عليا …اعمل ايه؟؟؟ هاقولك يا بختك ما انتي مش طايقاهم اصلا بس بدل ما ماطيقهمش ببلاش….خدي الثواب من وراهم و خليكي ناصحة!!

الحمدلله لسه الدقيق ما خلصتش!!

اقول بقي الحتة اللي جية بسرعة!!

 

مين دلوقتى هيكتب لنا كومنت أنه هيبعت رسالة دلوقتى حالا للناس اللى مزعلاه؟؟

شير للحلقة دى لكل اصحابك وزمايلك، علشان تساعدهم هما كمان يتصالحوا مع الناس اللى مزعلنهم.

لو عجبتكم الفكرة و الحلقة اعملوا لايك.