قصتي مع الصيام: تحدي صيام ١٦٨ ساعة متواصلين: أسلوب في رمضان 2018 - حلقة رقم 1

     أنا جاي النهاردة أحكيلكم قصتي مع الصيام

الكلام اللي في الحلقة بتاعة النهاردة مش كلام عادي خالص ومش كلام عن الصيام في رمضان … الكلام اللي في حلقة النهاردة ده تغيير حياة كاملة… يستحق إنك تعيش معاه … وتسمعه أكتر من مرة

لو إنت بتدور على حلقة مختصرة و مفيش فيها قصص كتيرة… وفر وقتك… الحلقة دي مش ليك خالص… الحلقة دي ممكن تغير لك حياتك كلها بجد… وكل القصص اللي فيها ليها علاقة بالهدف من الحلقة

الصيام السنة دي بالنسبة ليا أنا شخصيا … مختلف تماما عن أي سنة عدت في حياتي كلها

لأن السنة دي, و لأول رمضان من سنين طويلة أوي, أكون مش منتظر الصيام بسبب العبادة والثواب الكبير جدا اللي في الصيام و في شهر رمضان فقط, ولكن

أنا السنة دي, منتظر رمضان علشان عاوز

“أصوم”

نفسي أبدأ أقعد ١٦ أو حتى ٢٠ ساعة من غير أكل ولا شرب.

أنا هاحكيلكم السبب بالتفصيل اللي مخليني دلوقتي قاعد منتظر إني أبطل أكل وشرب على أحر من الجمر…

بس خلوني الأول أحكيلكم قصتي مع الصيام من و أنا صغير

أنا بدأت أصوم أنا وإخواتي من وإحنا في سن الحضانة, وفي إبتدائي كنا بنصوم رمضان كله كامل

و في السنين اللي إحنا فيها دلوقتي… أولادي وأولاد إخواتي بنعلمهم الصيام من و هما في الحضانة وبيلتزموا بإنهم يصوموا رمضان كامل ٣٠ يوم من وهما في تانية إبتدائي… بالظبط وهما أقل من ٨ سنين في العمر بيصموا رمضان كامل

المهم… أنا الصيام عمره ما كان عندي فيه مشكلة فيه خالص

بالعكس, أنا فاكر إني في إبتدائي إعدادي وثانوي كنت بتمنى إن رمضان يجي لأن المدارس كانت أجمل في الصيام ولأني كنت بلعب رياض وكورة وبجري كتير قبل الإفطار

ولما بدأت أنتبه لمذاكرتي في الثانوي وفي الكلية, كان الصيام طول السنة أداة أساسية بالنسبة ليا علشان أتحكم في وقتي, وأذاكر أكتر وكمان أحس بمتعة الحياة لما بتكون صايم وبتفطر

بالمناسبة… أنا إتخرجت من الكلية من ١٣ سنة بالظبط…

بعد الكلية ولما بدأت أشتغل, بدأت أعتمد إعتماد كبير أوي على القهوة لدرجة الإدمان

بقيت مدمن لطعم القهوة أثناء تركيزي في الشغل, حتى لما كانت القهوة بتخليني أهبط وما أقدرش أركز خالص من كتر القهوة, ماكنتش بقدر أبطلها أبدا

وبالتالي, شهر بعد شهر, بدأ الصيام يقل معايا… وبقيت يادوب بصوم رمضان

من حوالي ١٠ سنين, كان وقت الإفطار بيكون أطول حوالي ٣ ساعات عن السنين اللي إحنا فيها دلوقتي… فا كنت بأجل معظم شغلي ل بعد الإفطار

وبالتالي… يوم الصيام بالنسبة ليا كان عبادة فقط بدون أي فائدة في نجاحي

وسنة بعد سنة, بدأت حتى أخاف قبل رمضان من الصيام علشان مشاريع البرمجة

الكتيرة جدا اللي بشتغل فيها واللي بحتاج فيها تركيز كبير

و بالرغم من إني لما كنت بشتغل وأنا صايم … كنت بضطر غصب عني أركز …  لأن مفيش أي حاجة تانية ممكن أقدر أعملها

إلا إني كنت بقيت خلاص ببقى خايف من الصيام قبل رمضان كل سنة إنه يأثر على شغلي… بس طبعا بفرح برمضان علشان العبادة والثواب الكبير

مع إني سبحان الله, محصلة إنتاجي في كل رمضان بتكون أعلى من الأيام العادية … بس الخوف ملوش دعوة بالحقيقة… الخوف ده أبشع مرض ممكن يصيب الواحد

المهم, من حوالي سنة بالظبط, قررت إني بجانب إنتظامي في الرياضة, أنتظم كمان في أنظمة غذائية, وبدأت أتابع ناس بيعلموا الأنظمة الغذائية الحقيقية

لقيت ملايين من الناس عايشين حياتهم على أنظمة مختلفة من الصيام… ناس ملهاش علاقة بالإسلام من قريب ولا من بعيد

ودي حياتهم كلها طول السنة

أول نوع بيعملوا حاجة اسمها:

intermittent fasting

و دول بيحددوا لنفسهم ٤ ساعات فقط في اليوم مسموح لهم فيها بالأكل… بس في أول كام يوم علشان الموضوع يبقى سهل شويتين, بيحددوا ٨ ساعات في اليوم مسموح لهم فيها بالأكل

بس بعد كده, بيلتزموا طول حياتهم ب ٤ ساعات فقط في اليوم مسموح لهم فيها بالأكل… والناس دي بتصوم عن الأكل فقط, مش بتصوم عن المياه

الناس دي بتلتزم بالموضوع ده علشان الفوايد الصحية الرهيبة اللي في الموضوع ده, وملوش أي علاقة بأي عبادة

القناتين المشهورين جدا اللي إنت شايفهم أدامك دول دلوقتي, فيهما ملايين

المتابعين, بيتكلموا طول الوقت عن ال

intermittent fasting

وعن نوع من الدايت اسمه

keto diet

https://www.youtube.com/user/drericberg123/videos

https://www.youtube.com/user/TheTdelauer/videos

https://www.youtube.com/watch?v=7WYCt3nQ15M

الفئة دي من الناس بتشتغل ٥ أيام في الأسبوع و بتتمرن تمارين قاصية جدا من ٥ ل ٦ أيام في الأسبوع

ودي القنوات بتاعتهم:

والنوع التاني من الناس اللي بيصموا بيعملوا حاجة اسمها

OMAD

One meal a day

https://www.youtube.com/channel/UCvkcLBAmmH21adBkOga1pSw/videos

https://www.youtube.com/watch?v=1b3b4O7clY0

https://www.youtube.com/watch?v=6hmEnqAeCCk

ودول مسموح لهم نهم يأكلو مرة واحدة فقط في اليوم طول عمرهم…

و الفيديوهات اللي إنت شايفها أدامك دي, لناس عاملة قنوات كاملة على يوتيوب, بيتكلموا فيها عن حياتهم إزاي إتغيرت حقيقة لما إنتظموا إنهم يأكلوا مرة واحدة فقط في اليوم

والناس دي برضه بيصموا أكتر من ٢٣ ساعة يوميا عن الأكل بس, لكن ممكن يشربوا مياه لما يحتاجوا

و لأن الناس دي بتصوم علشان حياتها كلها تتحسن, فا بيصموا صح… وأهم من كده...بيفطروا صح

الهبل اللي بيكون في الصيام عندنا ده مش بيكون أصلا إختيار متاح عندهم

الهجوم على الأكل زي المحاريم اللي بيحصل عندنا ده, أكتر حاجة غلط في الموضوع كله

زي ما إحنا بنصوم صح… لازم كمان نفطر صح

تعالوا بقى للناس التقيلة بجد

ودول اسمهم

Breatharian

دول بيصموا عن الأكل والشرب لمدد بتتراوح من ٧ ل ١١ يوم بجد

وفي منهم بيحاول يوصل إنه مايأكلش غير مرات معدودة في السنة كلها

بس خلينا في موضوع صيام ال ٧ يوم دول… لأن دول الناس المبتدأئين عندهم

علشان يكونوا

Breatharian

لازم يصموا ٧ أيام  

ومعظمهم اليوم رقم ٨ بيكون شرب مياه فقط, و كمان مش بيشربوا زي المحاريم ولا حاجة… لأه, بعد ٧ أيام ١٦٨ ساعة صيام… أكتر من ١٠ أضعاف الصيام اللي إحنا بنصومه… بيشربوا نصف كوباية مياه كل نص ساعة فقط علشان  جسمهم مايحصلش فيه صدمة من المياه الكتير

إحنا بقى بنصوم ١٦ ساعة … وبنصدم جسمنا صدمة بكمية سكريات و نشويات ودهون … تخلي جسمك يتحول لشوال مليان شحوم على سوايل على كربوهايدرات… تخيل بلونة كبيرة مليان الأكل اللي إنت بتاكله على الافطار… يا لهوي

https://www.youtube.com/watch?v=obwzHnBXLdc

https://www.youtube.com/watch?v=Zx9rii3dcQ0

https://www.youtube.com/watch?v=JJdSp3xCDgg

https://www.youtube.com/watch?v=mXiXQNtOnfU

سؤالي ليك و لنفسي:

هل إحنا نقدر نصوم ١٧٠ ساعة بدون أكل أو شرب؟

الإجابة… لو إنت شخص في صحتك الطبيعية … في ناس كتيرة جدا قدرت تعمل كده … ولو في حد قدر يعمل كده… ليه أنا وإنت ما نقدرش؟

بس الموضوع تحدي العقل أكتر منه تحدي للجسد

ناس كتيرة جدا على يوتيوب عاملين فيديوهات عن تجربتهم صيام ال ٧ أيام بدون أكل أو شرب

إعمل سيرش على

A 7 days dry fasting

بالمناسبة… واحدة جاية زعلانة أوي بعد السبع أيام, تعيط وتقول إنها زعلانة أوي, إنها في اليوم الخامس ضعفت جامد جدا وشربت كوباية قهوة, لكن كملت الصايم بعد كده 😀

بصراحة… إيه الدلع بتاعها ده… بعد ٥ أيام صيام… تشرب كوباية قهوة…. طيب كانت تستنى … خلاص هانت يعني, مش فاضل غير كمان يومين صيام يعني… إصبري كمان يومين وبعدين إبقى إشربي قهوة براحتك يعني

المهم يعني… في ناس كتيرة جدا بتقدر تصوم ١٧٠ ساعة… لكن بالنسبة لنا إحنا مفيش أي سبب يخلينا نعمل كده… إحنا نقدرنغير حياتنا كلها بصيام ٢٠ ساعة فقط في اليوم … أو ١٧ ساعة صيام حسب المكان اللي إنت فيه

سؤال تاني ليا و ليك

هل نقدر إننا نصوم من ١٧ ل ٢٠ ساعة بدون أكل أو شرب وكمان نكون في أعلى إنتاجية؟

الإجابة… أكيييييييييييييد مليون في المية أه… وإحنا محتاجين الصيام ده لفوايد صحية كتيرة جدا عمري ما كنت أتخيلها

كنت للأسف بدأت اصدق التريند إنك لو فضلت عطشان مدة ١٦ ساعة, ده ممكن يضرك

طلع إن مدة ١٦ ساعة دي مش مدة خالص خالص خالص

وفي ناس بتصوم ١٧٠ ساعة علشان صحتها تتحسن

يعني إحنا لما نصوم ١٧ ساعة بالنسبة ليهم إحنا كده بندلع

وفى حاجة تانية بتحصل كتير , إن في ناس كتير بيروح عليها نومة  وقت الفطار وبتصحى بعد أذان الفجر, وبتوصل يومين صيام فى بعض

وده أنا سمعت إن ناس كتيرة جدا بيحصل معاها الموضوع ده أكتر من مرة, خصوصا في البلاد الأوروبية اللي بيكون الصيام فيها حوالي ٢٠ ساعة… سهل أوي إنك يروح عليك نومة ٤ ساعات

وأنا عن نفسي حصل معايا قبل كده إني نمت طول وقت الإفطار كامل قبل كده, ويادوب لحقت أشرب كوباية مياه قبل الفجر… ويوم الصيام التاني كان بالنسبة ليا أسهل بكتير من يوم الصيام الأول

الغلط مش في الصيام… الغلط في الإفطار

سؤال نااس كتير بتفكر فيه: أنا مش ببقى قادر أركز خالص وأنا صايم ؟

إنت نفس الشخص اللي بتفطر ١١ شهر في السنة, وبرضه بتكون مش قادر تركز وبتهرب من اللي إنت بتعمله

بالعكس والله… الصيام بيجبرك إنك ماتلاقيش حجه تهرب بيها من شغلك

والصيام بيجبرك إنك تركز في المذاكرة والشغل والإمتحانات كمان

طول عمري الإمتحانات بتكون أسهل بكتير جدا لما بكون صايم

وإنت برضه نفس الشخص اللي بعد الإفطار, بتضيع وقتك وبتهرب من الشغل اللي وراك, لأنك برضه مش بتكون مركز

وبعدين إنت مش بتصوم ١١ يوم عن الأكل والشرب ولا حاجة… دي الحكاية كلها ١٦ ساعة بس… يعني بالنسبة للصيام الصايم الصيام… مجرد تسخين يعني… وحاجة الأطفال في الحضانة بيقدروا يعملوها, والناس اللي عندها ٨٠ سنة ماشاء الله وعندهم عزم وهمة عالية بيعملوها طول السنة, سواء في رمضان وغير رمضان

 

مش هاقولك إن إنت مش هاتعطش ولا هاتجوع وإنت صايم ولا هايكون نفسك تشرب كوباية شاي أو قهوة

أكيد في أول أيام الصيام هاتحس بالاحتياج ده…

بس المتعة بقى بجد… إنك تبقى عاوز تشرب … وتستمتع بإنك تقول: لأه

تؤ

تستمتع بإنك تتحدى أوي وتقول لنفسك و لجسمك: إديني عطش أكتر… إديني جوع أكتر … خليني أوريك إنت بتتكلم مع مين

ده أخرك معايا… تخليني عطشان… طيب شوف أنا هاعمل فيك إيه

وقوم بقى وإلعب شوية رياضة كده لغاية لما تعلم جسمك الأدب

جرب بس.. والله جرب, هاتلاقي طاقة رهيبة طلعت من جسمك

ويوم ورا يوم… هاتتحول لإنسان أسطوري قوي جدا

خلينا نرجح للأساس بقى:

السبب الأول والرئيسي والوحيد للصيام في رمضان هو طبعا عبادة وطاعة لله, وإحتساب أجر والثواب … ودي حاجة كلنا بنعملها طول عمرنا

مفيش سبب بيخلي أي حد يصوم في رمضان أبدا غير عبادة وطاعة وخضوع لأمر ربنا

ونفس الحكاية في الصلاة

مفيش حد بيصلي … إلا طاعة لله…

إستنى كده

لأه… دا في ناس بجانب إن الصلاة طاعة لله, بيصلوا علشان قلبهم يرتاح

علشان يتواصلوا مع خالق الكون

علشان يحسوا إن مفيش عندهم أي مشاكل في الدنيا

علشان فعلا يحسوا براحة قلب… بيحسها كل واحد بيصلي بجد بقلبه وعقله وجسمه وجوارحه

وإحنا إتكلمنا على الموضوع ده بالتفصيل في حلقة ميديتيشن اللي نزلت على قناة أسلوب على فايسبوك ويتيوب من أكتر من سنتين كاملين

إتكلمنا في حلقة ميديتيشن دي, إن في ناس كتيرة أوي في الغرب, مش مسلمين و لا ليهم دعوة بالصلاة من قريب ولا بعيد, إتعلمت منهم إن الصلاة مفروضة علينا لأنها فعلا الحاجة الواحيدة اللي بتنقي العقل من تلوثات الحياة كلها …

الكلام اللي فات ده له علاقة عن الصلاة وعن المديتيشن… طيب إيه علاقة الموضوع ده بحلقة الصيام النهاردة

أنا بقولك: إني زي ما كنت بصلي الأول عبادة فقط…. إتعلمت إزاي أصلي علشان بجد أقرب من ربنا وأحس بنقاء كبير

أنا كمان لأول سنة منتظر الصيام, مش عبادة فقط… لأه… أنا مستني أصوم وأمتنع عن الأكل والشرب لمدة ١٦ ساعة, اللي أنا شايفها دلوقتي رقم يضحك بالنسبة لناس كتيرة بتصوم, وياريتهم بيصموا لله… دول بيصموا علشان يقووا نفسهم وعزيمتهم وجسمهم

ربنا بعتلي ناس ملهومش دعوة بالإسلام من قريب ولا من بعيد

يفهموني أد إيه أنا محتاج الصيام ده علاج مهم جدا

وسبحان الله, سنة بعد سنة, بلاقي ناس تيجي تفهمني أهمية العبادة والإنقطاع عن الدنيا … والناس دي ملها علاقة بالدين من قريب ولا من بعيد

مرة تانية… أنا عاوزك إنت بنفسك, تدخل تشوف الفيديوهات الكتيرة جدا جدا جدا بتاعة الناس اللي بيصموا صيام ٧ أيام وبيفطروا اليوم الثامن على مياه فقط

الصيام ده هدية من ربنا … سواء في شهر رمضان أو في غير رمضان

و ياسلام بقى لما تبقى بتصوم عبادة لله, وكمان بتحقق الفايدة من العبادة

ربنا مش بيفرض علينا صلاة أو صيام علشان نتعذب

ربنا بيفرض علينا العبادات علشان نعيش صح… دنيا ودين … عبادة وإستفادة

نبقى مش شاطرين خالص لو بقينا بنعمل العبادة, من غير الإستفادة

حلقة النهاردة نتيجة بحث ومتابعة يومية لألاف الفيديوهات … ومتابعة يوميه للناس اللي بتتجه للصيام علشان تغير حياتها للأحسن… وعلشان الحيادية في الموضوع, كل الناس اللي أنا تابعتهم علشان يعلموني إزاي الصيام غير حياتها تماما, كلهم ملهومش دعوة بالإسلام ولا من قريب ولا من بعيد خالص… ده للحيادية فقط مش علشان عقدة الخواجة ولا حاجة

إكتبولنا في كومنتس تجاربكم مع الصيام… ومدى إستعدادكم للصيام السنة دي إن شاء الله

وصل الحلقة دي لكل الناس اللي عندها تخوفات من الصيام… الموضوع بجد جميل أوي

سلاااااام