قهوة الصباح: كل ما هو آت قريب
الجملة دي وقعها بيختلف إختلاف كبير أوي حسب عمر و سن اللي بيسمعها
كل سنة بتعدي عليك من عمرك… كل ما وقع الجملة دي عليك بيبقي أقوى وله معنى أكبر
كل ما هو آت… قريب
كل حاجة طالما مكتوبة… هاتحصل وهاتعدي وهاتبقى قديمة
الناس اللي عندها ٧٠ سنة النهاردة… كانو في يوم من الأيام عندهم ٨ سنين وعنده أب وأم و جد وجدة و أخوة صغار.. وكانو بس بيحلموا إن الأجازة تيجي علشان يلعبوا مع قرايبهم
كل ما هو آت قريب… بالنسبة لطفل عنده ٨ سنوات, جملة صعب يصدقها شوية… بالنسبة له كل حاجة بعيدة جدا
تمر الأيام… والسنة الدراسية تخلص
والعطلة الصيفية تبدأ
والعطلة الصيفية تخلص والدراسة تبدأ
والدراسة تنتهي مرة تانية وتيجي العطلة اللي بعدها
وتنتهي العطلة وتيجي السنة الدراسية
و تلف الدايرة و تلف و تلف
زي بالظبط ما إنت وإنت بتقرأ الكلام ده… عارف إن السنة الدراسية بدأت بس من أيام معدودة, وبقينا في آخر السنة خلاص على الإمتحانات… وأيام بعدها والعطلة كمان هاتخلص
كل ما هو آت قريب
الأيام بتعدي
الدراسة بتنتهي
الدراسة بتنتهي لا محالة
الإنسان بيشتغل
بتبدأ الحياة الأسرية
أولاد
بيدخلوا مدارس
والأيام بتلف تاني… دراسة بدأت… أجازة بدأت… دراسة مرة تانية
و كل ما هو آت قريب
كل حاجة جاية جاية
عمرك هايوصل كده كده لآخر نقطة فيه… يوصل ٨٠ سنة… يوصل ٢٠ سنة… حسب إنت مكتبولك إيه
و كل ما هو آت قريب
كل ما هو آت قريب
ما تشيلش هم أي حاجة… كل حاجة منتهية
الضغوط النفسية منتهية
المشاكل منتهية
الكوارث اللي حصلت واللي هاتحصل برضه منتهية
مهما عملت قبل كده…. كل حاجة بتعدي
كل حاجة بتنتهي
وكل ما هو آت قريب
….. الجميل أوي في الموضوع ده ….
إنك تقدر تغير حياتك كلها لما تعرف إن كل ما هو آت قريب
يعني لو إنت هاتبدأ تموت نفسك إجتهاد دلوقتي حالا علشان حاجة ممكن توصلها في المستقبل بإجتهادك دلوقتي
يبقى تقدر تموت نفسك إجتهاد دلوقتي حالا
وإنت عارف: إن كل ما هو آت قريب
تعرف إنك هاتفرح نفسك في المستقبل لما تجتهد في حاجة وتوصلها وتعيشها في المستقبل
الموضوع بكل بساطة هو… إن: كل ما هو آت قريب
إشتغل وإجتهد بإطمئنان في قلبك: إن كل ما هو آت قريب
لو عرفت بطريقة ما, إن في خير هايجيلك بعد ٥ سنوات مثلا… إحنا عارفين إن بالنسبة لك ده أكتر من طول الحياة نفسها
لكن والله, ال ٥ سنوات بيعدوا… وال ٢٥ سنة بيعدوا… و ال ٧٥ سنة بيعدوا… وحتى مش محتاج تسأل شخص كبير أوي في السن أو حاجة
إسأل بس شخص عنده ٣٣ سنة… هو هايقولك أنا عمري ما كنت أتخيل إني هاكون حتى ٢٥ سنة…. ببص لقيتني نطيت من ٢٥ سنة ل ٣٣ سنة
وإسأل شخص عند ٥٨ سنة… هو كمان فجأة كان ٣٧ سنة من كام يوم… وفجأة لقى أولاده كبروا ماشاء الله وفجأه لقى نفسه ٥٨ سنة
وإسأل اللي عنده ٨٤ سنة… هاتلاقي الحياة عدت معاه بسرعة أوي أوي أوي أوي أوي أوي
الحياة كانت قصيرة قوي… قصة سريعة يحكيها لك في قعدة واحدة
هايحكيلك كل تفاصيل حياته بالتفصيل الممل بكل تفصيلة مملة حصلت فيها… في أقل من يوم واحد
وهاتلاقيه فعلا عارف حقيقة إن الحياة عدت معاه: كأنها يوم أو بعض يوم
كل ما هو آت قريب
إجتهد بقى كده وإنت مطمئن… إن كل ما هو آت قريب
وإبتسم
وإختار إختيارات تفرح بيها أوي
وعيش الحرية والسعادة وإنت بتختار صح
وإطمئن… كل ما هو آت قريب.. وهايجي يوم إنت كمان وتقول لأحفاد أحفادك إن شاء الله: لبثنا يوم أو بعض يوم
و إوعى تنسى تبدأ يومك بإنك تكتب ٥ نعم من نعم ربنا عليك حسيت إن حد حواليك فقدهم, أو إنت تعبت فيهم وحسيت بقيمتهم
الحمد لله… الحمد لله… الحمد لله