قهوة الصباح: ليه ناس مش بتفرح أبدا طول عمرها؟ في ناس بتعيش طول عمرها في سلسلة من الأحداث الحزينة وغير المفرحه وحتى لما بيكون في سبب للسعادة في حياتهم, زي فرح أو إحتفال أو حتى عيد ميلاد المواضيع دي بتقلب عندهم بزعل و بكاء وأيام كئيبة الناس دي بتكون حياتهم فعلا صعبة جدا... ويليق عليهم المثل اللي بيقول: جت الحزينة تفرح... مالقتلهاش مطرح لكن لكن لكن لما تقرب لحياة الناس اللي بينطبق عليهم المثل ده... تلاقي إنهم هما اللي مش بيسمحوا للسعادة تدخل حياتهم أبدا إنت شخصيا أكيد قابلت ناس كتيرة جدا جدا جدا من اللي ربنا بيرزقهم بخير, بيقلبوه لسبب للشكوى طول الوقت في منهم ناس السعادة اللي في حياتهم بتبقى إن الناس تبصلهم بصة شفقة و أد إيه هما ياعين تعبانين و عندهم ضغوط في الحياة و ناس منهم تفكيرهم يا عيني إنهم يحسسوا الناس إن حياتهم وحشة أوي طول الوقت, خوف قال إيه من الحسد... وحياتهم بتتحول فعلا لحياة كئيبة خوفا من الناس إنهم يحسدوهم على حياتهم مع إن لو كل الناس اللي في الدنيا فعلا حسدوهم, الضرر اللي هايقع من الحسد ده, مش هايجي واحد على مليون من الضرر اللي هما عايشين فيه فعلا و لو إن فعلا الكئابة اللي هما عايشين فيها دي علشان يبعدوا عن الحسد... يبقى نصيحة لوجه الله... إن إنت تتحسد على حياة سعيدة... أحسن مليون مرة من حياة كئيبة... لأنك بتكون كئيب على نفسك وعلى أهلك وعلى الناس اللي حواليك وعلى الكوكب الغلبان ده كله وأكبر من كده, بيكون نكران ل نعم ربنا اللي عايشين فيها يعني لما ربنا يرزقك بفرح... وتقلبه لسبب للحزن... هل ده رد على نعم ربنا؟ لما ربنا يرزق واحد بسبب من أسباب السعادة... يعمل نفسه ناصح ويقعد يدعي الشكوى... هل ده رد على نعم ربنا؟ لما تقرب فعلا لحياة الناس الغير سعيدة... هايصعبوا عليك أوي أي فرح عندهم, هو سبب للشكوى بالمسئوليات والتعب اللي في الفرح أي نجاح عندهم في تعليم أو نجاح في اي شيء, هو سبب للشكوى في إن الكليات صعبة والمدارس صعبة والشغل صعب وصحتي بتتدهور وضهري بيوجعني... و .. و ... و ... شكوى شكوى شكوى مش ممكن... الحياة بتكون صعبة جدا مستحيل إنسان يقدر يعيش قريب من الناس دي لكن... في وقاية وعلاج من الحياة الكئيبة دي الوقاية والعلاد بيجوا في: حمد ربنا لازم لازم لازم لازم تبدأ يومك كل يوم, بإنك تكتب فعليا شوية نقط, من نقطة واحدة ولغاية ٥ نقط مثلا, تحمد ربنا عليهم الحمد لله, أنا النهاردة صاحي وأنا في صحة وعافية الحمد لله, أنا شايف الكلام اللي أنا بكتبه ده, الحمد لله عيني شغالة الحمد لله, أهلي النهاردة بخير الحمد لله, أنا كنت نايم في سريري أنا متخانقة مع جوزي, بس الحمد لله… أنا متجوزة الحمد لله… الحمد لله… أتخانق أوي كمان… إيه المشكلة, الحمد لله أنا متجوزة أو تكتب: خطيبتي مقموصة عليا, إيه ده.. أنا خاطب… طيب الحمد لله, على الأقل أنا خاطب لو إنت في دراسة والدراسة صعبة أوي… إكتب: الحمد لله, أنا بدرس, غيري بيشتغل وهو طفل من غير أي ذنب هو عمله الحمد لله… أنا ربنا بيوفقني إني بشوف حاجات بتصحي الحاجات الحلوة اللي جوايا بس إوعى تقول الكلام ده دلوقتي بس إنت لازم يكون عندك نوتة صغيرة, وتكتب فيها كل يوم كل يوم كل يوم … ولو نقطة واحدة تحمد ربنا عليها إبدأ يومك بالحمد وإوعى تكون من الناس اللي مش بتسمح للسعادة تدخل حياتها https://www.youtube.com/watch?v=UHYflwtb-nY