لذة الاجتهاد

أهلا بيكم فى سلسلة حلقاتنا الجديدة ” مفاتيح النجاح ” و مفتاح جديد يفتح لك باب من أبواب النجاح.

ومفتاح النهاردة للنجاح…. مفتاح لا بد منه

مفتاح النهاردة اسمه: لذة الإجتهاد

سلسلة مفاتيح النجاح دي, عبارة عن سلسلة مفاتيج بجد

كل مفتاح منهم, بيفتح لك باب للنجاح

مفتاح النهاردة, بيفتح أهم باب

بيفتح باب: إنك تقوم وتعمل الشغل اللي وراك

واللي إنت عارف إنه وراك

وبتهرب منه… علشان مكسل, وعلشان مالكش نفس, وعلشان زهقان… وعلشان عندك حاجات كتيرة أوي وملخبطة لدرجة إنك قررت إنك ماتعملش حاجة خالص و قاعد تتفسح على الفايسبوك واليوتيوب وأي حاجة بتضيع وقتك ….

بس خلاص إطمئن

إطمئن أوي

أيوة أيوة… إطمئن أوي… وإطمئن كمان زيادة …. لأنك بمفتاح النهاردة, هاتفتح باب الشغل اللي وارك… وهاتدخل على الشغل اللي وراك … وهاتكله أكل… هاتفرتك الكتب… وهاتاكل أي حاجة كنت بتهرب منها

يالا بينا نتكلم بالتفصيل عن مفتاح النهاردة:

لذة الإجتهاد

الإجتهاد ده بقى… هو إنك تقوم وتعمل الشغل اللي وراك, وتعمل المذاكرة اللي وراك… سواء ليك نفس تعملها… أو مالكش نفس

تجبر نفسك يعني

ده بقى اسمه: إجتهاد

بتجاهد نفسك ضد نفسك كده…شوية غلاسة علي نفسك بس متشكر نفسك بعدها عليها.

الموضوع ده له لذة حقيقية بجد

إنت نفسك عارف كويس أوي إنك لما تقوم وتجبر نفسك إجبار إنك تجيب الشغل اللي وراك, وتحطه أدامك وتبدأ من الصفر…… إنت عارف كويس أوي إن له لذه

ومش أي لذة… دي فعلا الراحة النفسية… وأكيد طريق النجاح

هتشكر نفسك و الله لما تجبر نفسك أنك تصحى بدرى و تبدأ يومك بنشاط، و تحس قد ايه اليوم فيه بركة و خير، و تيجى أخر اليوم تتبسط أنك أنجزت حاجات كتيرة جدا، عمرك ما كنت هتنجزها لو كنت صحيت متاخر. عايز لها شوية عزيمة و رجولة كده، بس هتشكر نفسك بعدها.

و على فكرة لازم لازم و كمان واحدة لازم تكافئ نفسك بعدها، يعنى لو قدرت تصحى بدرى كل يوم، كافئ نفسك فى الأجازة و نام و إتبسط و اتفسح ( لازم تعمل كده)، خطة بسيطة خططها لنفسك.

   

لو أجبرت نفسى أنى أخلص مذاكرة منهج الفيزياء كله، و حليت الأسئلة بتاعت الامتحانات كلها، أكافئ نفسي بأنى اتفسح و إتبسط و أنام، و شوف ممكن تحب تكافئ نفسك بايه.

الفسح و النوم بيبقى ليهم طعم تانى خالص، لما يكون ضميرك مرتاح و مخلص الشغل اللى وراك.

ده كان المفتاح رقم ٥ من سلسلة حلقات مفاتيح النجاح.

اكتب لنا فى كومنت اكتر حاجة عجبتك في الحلقة كانت ايه و هتنفذ ايه منها ؟ و خطتك لمبدأ الشغل مع المكافأة هيكون ازاى؟

وما تنساش تعمل شير للحلقة و تحفز بها أصحابك و زمايلك.

استنونا وحلقة جديدة، ومفتاح جديد من سلسلة حلقات مفاتيح النجاح.