علشان ماتبقاش معفن - أسلوب في دقيقة حلقة ٢٣

أهلا بيكم في الحلقة رقم ٢٣ من برنامج أسلوب في دقيقة

اللي بنجاوب فيه على الأسئلة اللي بتوصلنا في كومنتس

وأول حلقة ممكن نخلصها في أقل من دقيقة…. ياااااي… بس برضه مش هانخلصها في دقيقة 😛

سؤال وصلنا كتير جدا, وإنت نفسك سمعته مليون مرة من ناس كتيرة جدا حواليك

هو إنتو ليه عاوزني أعمل الخير وأساعد الناس… وهما بيخبوا كل حاجة ومش بيساعدوا

وبيجيلنا من طلبة كتير: إنتوا ليه عاوزني أنشر المصادر اللي بتسهل المذاكرة لأصحابي… وهما بيخبوا كل حاجة

ليه تعمل إنت الخير… والناس هاتاخدوا من غير حتى ما يقولوا شكرا

الجواب ببساطة… علشان ماتبقاش معفن

أيوة… الجواب بكل ببساطة: تعمل الخير وتنشر الخير علشان ماتبقاش معفن… إنت كمان!

لو حد مش عارف يعني إيه علشان ماتبقاش: معفن

معناها: علشان ماتبقاش مقرف

علشان ماتبقاش مقزز

حتى لا تكون وغد لئيم

علشان مابقاش معفن… معفن… ياااارااااجل

دي الإجابة ببساطة وممكن تقفل الحلقة دلوقتي وإنت ضميرك مرتاح… معاك الإجابة على سؤالك ببساطة

ليه تعمل الخير حتى مع ناس مايستحقوش: علشان ماتبقاش معفن

لكن لو عاوز تضيع وقت شوية… إسمع التفاصيل

هاقولك ببساطة

عندك ناس بتخبي المعلومات والخير وكل حاجة عندها… والناس دي كتير

وناس تانية فعلا بينشروا الخير بإخلاص, ودول ناس موجودين وبنشوفهم يوميا … وفعلا بينشروا الخير

في ناس كويسة وجميلة (حتى لو قليلين جدا)… وفي ناس مش كويسة (حتى لو كتير جدا)

شوف مين اللي عاجبك فيهم أكتر… وخليك زيهم

أو أحسن من كده

شوف مين الناس الجميلة أوي… وخليك إنت أجمل منهم كمان

أنا لما بشوف واحد عنده عربية مكسرة وقديمة ومبهدلة

وبشوف واحد تاني عنده عربية جميلة أوي ومحافظ عليها

بتمنى دايما إني يكون عندي العربية الجميلة…

وعمري ماقولت: معظم عربيات الناس مكسرة… أنا لازم عربيتي كمان تكون مكسرة… علشان مايشوفوش عربية كويسة

أنا… لما بشوف واحد ماشي تخين وبكرش

وبشوف واحد تاني ملتزم بالرياضة وجسمه متناسق وجميل

بتمنى دايما إني أكون زي الشخص الملتزم بالرياضة وجميل

عمري مابقول: معظم الناس تخينة وبكرش وعندها ترهلات وتسلخات و حياتها كئيبة

أنا كمان هابقى تخين زيهم بالظبط… إشمعنى هما يعني

عمري ما بقول كده… وإنت كمان عمرك ما هاتقول كده

دايما هاتبص للشخص الجميل… وتتمنى تكون أجمل منه

نفس الحكاية

عندك ناس بتنشر طاقة سلبية… أو بتخبي معلومات… أو بيكذبوا… أو بيخبوا

وفي ناس تانية بينشروا طاقة ايجابية … وبينشروا معلومات دايما في الخير… ومش بيكذبوا

لما تشوفهم الإتنين… تحب تبقى زي مين فيهم؟

مفيش مشكلة على فكرة… عندك حرية الإختيار… لو مقتنع إنك تكون معفن دي حاجة أفضل وأذكى لحياتك… Be my guest

بس لو إنت بتشغل عقلك

هاتحمد ربنا إن معظم الناس بتخبي ومابتنشرش الخير… المنافسة أسهل وأجمل …. يعني سهل أوي إنك تكون جميل ياراااجل

إنما… المعفنين كتير… مش هاتبقى مميز خالص لو بقيت معفن إنت كمان

خالص… هاتبقى مع القطيع… اللي هو قطيع… معفن

علشان بس ما تكونش نسيت

ليه تعمل الخير حتى لو في ناس ماتستهلوش

الإجابة… علشان ماتكونش معفن

معفنننننننننننننن

نصيحة من القلب

إوعى تكون معفن: وأكتر من كده… إوعى تخلي حد يضحك عليك ويخليك تكون معفن مع إنك جميل في الأساس

ياريت بقى تاخد لينك الحلقة دي… وتبعتها لأصحابك واحد واحد

مش تعمل شير … لأه… شير ده بتاع المبتدئين

إنت تاخد الحلقة وتروح تحطها لأصحابك واحد واحد في إيديه… وتربطه من رجله لغاية لما يتفرج عليها

سلااااااام