مفاتيح النجاح: مفتاح رقم ٨ : Showing Gratitude

أهلا بيكم في الحلقة الجديدة من برنامج مفايتح النجاح

و المفتاح رقم ٨ من سلسلة ٢١ مفتاح للنجاح

مفتاح النهاردة هو: Showing Gratitude

بالبلدي كده, إنك تعد نعم ربنا عليك

إنك تبص بصة كده على نفسك…. وتاخد نفس عميييييق وتقول بقلب صافي: الحمد لله

دايما علشان توصل للقمة وتوصل للنجاح… لازم تحتاج تبص لفوق… ولازم تبص إيه اللي لسه ما حققتوش, وتجتهد إنك تحققه وتوصله

لكن لكن لكن

لازم كل يوم… تبدأ يومك بإنك تحمد ربنا بكل حاجة عندك

يعني علشان توصل للقمة وتحقق اللي عمرك ما حققته

لازم تقف مع نفسك وقفة كل يوم … وتحمد ربنا على النعم اللي إنت فيها كلها

يعني لو إنت شايف حلقة النهاردة بعينك

تحمد ربنا على نعمة البصر…. واو… والله العظيم نعمة البصر دي لو راحت من واحد فينا سنة واحدة بس… سنة إيه… دي لو راحت من واحد فينا ١١ شهر بس… آآآصدي عشر شهور بس….

المهم… شايفنا دلوقتي… طيب إحمد ربنا

أيوة أيوة…. غمض وإفتح كويس… إتأكد إنك شايف كويس… وشايف ألوان كمان

طيب… قول الحمد لله

إبدأ بقى عد نعم ربنا عليك كده

ياترى عملت حاجة غلط… وربنا سترك؟

وسترك كمان مرة؟

وسترك كمان مرة بعدها؟

ولسه بيسترها معاك لغاية النهاردة؟

طيب كويس أوي… عد بقى نعم ربنا عليك كويس أوي

و خد نفس كده وإنت مبسوط وقول… الحمد لله

هات كراسة, وإبدأ إكتب نعم ربنا عليك

لازم تبدأ كل يوم كل يوم كل يوم … يومك, بإنك تعد ٥ نعم من ربنا عليك

إنت كده أو كده مستحيل تقدر تعد نعم ربنا كلها

تعد كل يوم الصبح وتكتب بإيدك ٥ نعم من ربنا عليك

إحنا هانغششك شوية… وإنت تكتبلنا الباقي في كومنتس

١- نعمة إن إنت بتسمع الكلام الجميل ده, وقلبك بيلين وبيتغير معاه… يعني قلبك لسه حي, وعايش وبيتحرك

٢- نعمة إن إنت شايف الفيديو ده بعينك الجميلة دي

٣- نعمة إن إنت سامع صوتي العذب الرقيق الجميل ده, اللي شبه صوت بيومي فؤاد … يعني وداناك الطويلة… أصدي الجميلة دي شغالة كويس

٤- نعمة إن لسه عندك فرصة إنك تحمد ربنا على نعمه عليك

٥- نعمة الأهل اللي لسه موجودين في حياتك لغاية النهاردة

…..

كمل كمل ما تقفش

المهم, تجيب نوتة صغيرة بجد

وتبدأ تكتب فيها كل يوم ٥ نعم من ربنا عليك

نعمة الحمد

ونعمة الدين

ونعمة الفاكهة

ونعمة الإنترنت

…. وتبدأ كده تعد كل يوم ٥ نعم

مرة تانية…. إنت محتاج دايما تشوف إيه اللي إنت ما حققتوش علشان تقدر تجتهد و توصله

لكن, لازم أكتر تشوف يوميا إيه الخير ونعم ربنا اللي إنت فيها كل يوم… علشان تقدر تعيش الحياة في خير وسعادة

مفتاح نجاح النهاردة إسمه: مفتاح الحمد

الحمد لله

الحمد لله

الحمد لله

روح بقى زي الشطور, هات كراسة مخصوص لسلسة مفاتيح النجاح

وإكتب فيها عنوان كل مفتاح

علشان المفاتيح دي تستخدمها لأجمل حياة تعيشها إن شاء الله

وطبعا لايكك الجميل على الفيديو

الحمد لله

الحمد لله

الحمد لله