أهلا بيكم في الحلقة رقم ٢٠ من برنامج أسلوب في رمضان

وحلقتنا بعنوان: الحفلة

في الحلقة رقم ١٤… أنا أخدتكوا معايا نعمل شوبينج في السوبر ماركت

النهاردة بقى أنا عندي حفلة… وعزماكوا تيجوا معايا

كله يلبس ويتشيك

أصحابي لازم يشرفوني

ييييي… دا أنا هقابل مديحة في الحفلة… أستغفر الله العظيم يا رب… مش بتنزلي من زووووور

إيه ده… هي مش دي مديحة… اللي لسه جايبه ليكي هدية… بمناسبة عيد ميلادك ال ٧٠ … و مجمعة أصحابك كلهم يوميها علشان يحتفلوا بيكي

هي دي مش مديحة اللي كانت صاحبتك من أيام الكلية

مش هي مديحة

أيو سمعت سمعت… هي مديحة

بس آخر مرة… سلمت عليا بطريقة مش لطيفة خالص

عطيتني خدها الشمال قبل خدها اليمين كده… سلمت عليا بألاطه … وماقامتش تقف ترحب بيا

خلي بالك من عقلك الباطن

عقلك الباطن بيخليكي لما تركزي على حاجة معينة, بتلغي كل اللي قبلها

يعني لما ركزتي على مديحة بطريقة سلبية, في آخر مقابلة ليكي معاها

لغيتي كل الحاجات الحلوة, اللي مديحة عملتها معاكي قبل كده

لأه… وكمان عقلك الباطن … عمملك الطاقة السلبية دي بدرجة, تخليكي تحسي إن صاحبتك دي, طول عمرها وحشة معاكي

عقلك الباطن بيفكرك دايما بآخر تجربة

خلي عندك إدراك المرة اللي جاية… لما يكون عندك خلاف مع أي شخص

الأستاذ جووووزك… وحتى مامتك وأقرب الناس ليكي… … 

خلي عندك إدراك, وماتخليش عقلك الباطن يضحك عليكي ويعمملك إن الشخص وحش

نتيجة آخر تجربة سلبية مريتي بيها معاه

يالا بينا… التكتوك جه… علشان ما نتأخرش على الحفلة

OMG

إيه تاني

مش هاروح الحفلة معاكوا… 

ليه بس؟

أصلي هقابل عزت

مين عزت ده كمان

عزت ده مديري في الشغل

على طول متعصب… مش بعرف أتعامل معاه خالص

ممكن نضطر نتعامل في حياتنا مع أشخاص… حاديين و عصبييييييين

سواء كان حد من قرايبك

أو مديرك في الشغل مثلا

علشان نقدر نتواصل مع الأشخاص اللي من النوع ده, لازم ما نقاومهومش وهما بيتعصبوا

أو و هما متمسكين ومتعصبين لرأيهم 

لأنهم هايقاوموك أكتر

هاتعند معاهم

هايعندوا معاك أكتر

من الذكاء إنك تمشي مع طاقتهم القوية دي… وماتقومهاش

لازم تكون مرن علشان تقدر تكسب اللي أدامك

وتتواصل معاه بطريقة ناجحة

وإذا النتايج ماكانتش ناجحة, يبقى إنت محتاج تغير طريقتك وأسلوبك

إكتشف شخصية اللي أدامك

وإتعامل معاه على أساس شخصيته

وقبل ما تكتشف شخصيات الناس… إكتشف نفسك أولا

وإتعلم إزاي تتعامل مع نفسك صح… وتصلح منها

أنا عارفة طبعا إنك هاتقولي على نفسك… بتتعصب بس قلبك طيب

زيك زي أي واحد في الدنيا… كل الناس بتقول على نفسها كده

كويس أوي إنك إكتشفت نفسك

خلي بقى عندك إدراك… وصلح من نفسك… وصلح من أسلوبك مع الناس

دايما تاخد بالك إنك ترحب بالناس اللي تقابلهم

وتديهم إنتباه وتسمعهم لما يوجهلوك كلام

وحسس الناس بأهميتهم عندك

فن التواصل مع الآخرين, ده فن بنتعلمه

مادة أساسية في الحياة, لازم ندرسها, مافيش فيها نجاح ولا سقوط

إتعلم تتعامل مع الأشخاص المختلفة

الشخص الحساس, أو العصبي

الشخص المعتز بنفسه… والسيكوباتي

خليك مرن

دايما بنسعى إننا نغير من صفات وسلوكيات الأشخاص اللي حوالينا

وعمرنا ما بنحاول إحنا اللي نغير طريقتنا ونغير سلوكنا علشان نحصل على النتيجة اللي إحنا عايزينها

ونتواصل مع الناس صح

واجب النهاردة

١- إختار حد تعرفه, مش عارف تتعامل معاه, وحاول إنك تكتشف شخصيته

وتغير إنت من طريقتك وسلوكك معاه

طبق عليه فن المرونة في المعاملة

٢ – إكتبلنا في كومنت, إيه أكتر الشخصيات اللي بتلاقي صعوبة في إنك تتعامل معاها

إعمل شير للحلقة, ومنشن لكل أصحابك… يمكن… حد فيهم يتعلم إزاي يتعامل معاك 

الحفلة خلصت… ورمضان كريم