diaries of an excellent student  نصائح المذاكرة في :مذكرات طالبة مثالية | أستوديو أسلوب حلقة 7

 

 

مذاكرات طالبة مثالية: إزيكم

أنا النهاردة جاية أفتكر معاكم ذكريات جميلة

ذكراياتي مع المذاكرة

ذكرايتي وأنا لسه طالبة صغيرة…….يااااه… فكرتوني بأيام زمان… لما إتحولت من طالبة ضايعة ومضيعة… لطالبة متفوقة و مثالية

زيي, زي أي طالب فى الدنيا المذاكرة كانت بتخنقني… ماكنتش أطيق حد يقولي قومي ذاكري

لأني ماكنتش بكون متحمسة للمذاكرة, والمواد كانت صعبة ومملة

ولا كنت حتى بعرف أركز ٥ دقائق على بعض.

ولو حفظت حاجة, كله بعدها بيطير … زي العصافير

وكنت بهرب من المذاكرة وأقوم  كل شوية آكل

والمسلسلات كانت بيحلالي الفرجة عليها جدا وقت المذاكرة… بس علي أيامي ماكنش فيه مسلسلات تركي

والنوم… ياسلاااام… مش محتاجة طبعا أقولكوا أنا كان بيحلى النوم أد إيه أول لما أبدأ و أنوي  أذاكر … وأقول… هانام ١٠ دقايق بس وأصحى مركزة… وطبعا بقوم من النوم بعد ١٠ ساعات على الأقل

بس إكتشفت إن مشاكل المذاكرة دي, ماكنتش مشاكلي لواحدي

كانت مشكلتي, وكانت مشكلة كل الطلبة, حتى المتفوقين منهم…. كانوا بيعانوازيي بالظبط

وأجيال ورا أجيال… و لغاية النهاردة… هي نفس المشاكل بتاعة المذاكرة بالظبط

لحد ما إكتشفت أسرار للمذاكرة الممتعة

أسرار للمذاكرة خلتني اذاكر بسهولة… ومن غير أي ضغط عليا … وكمانن قدرت اني اتفوق واجيب درجات عالية… وبمجهود أقل من اللي ممكن تكووا متوقعينوا لطالبة متفوقة جدا

هاقولكم على الأسرار دي حالا… بس نتفق مع بعض الأول

إن إحنا نبص للمذاكرة على إنها مش مذاكرة… على أنها مهارة… لما هانتقنها… لازم هانحبها

وهاتكون ممتعة بالنسبة لنا

أهم حاجة بس… تبطلوا أكل

السر الأول:

التسجيل الصوتي

لما كان عندي تعريفات صعبة, مش عارفة أحفظها, كنت بسجلها بصوتي على موبايلي, أو صوت حد من زمايلي يكون صوته حلو

كنت بشغل التسجيلات ده وأنا بجهز الصبح علشان أروح المدرسة أو الكلية, وفي الطريق وأنا رايحة للمدرسة أو رايحة للدرس… أو حتى وأنا بغسل سناني بالليل

كنت بشغل التسجيلات دي ليل ونهار… كانوا بيثبتوا في دماغي وأنا مش ببذل أي مجهود غير إني بسمع ومطرطقة وداني

السر التاني:

الإختصار الحرفي أو تكوين كلمة سر

لما كان عندي أسئلة محتاجة أحفظلها خطوات مجعلصة, كنت بعمل الآتي

– على أد ما أقدر, كنت بختصر الخطوات دي لخطوات أقصر

– وأكتب كل الخطوات دي تاني بعد لما إختصرتهم

– وأختار أول حرف من كل خطوة, وأكون بيهم كلمة السر

زي بالظبط المثال ده في الجغرافيا: ما هي الأهداف العملية التطبيقية النفعية:

ناخد أول حرف من كل خطوة… ونكون بيها كلمة السر… هنا مثلا هاتكون كلمة: تماما

ولو الخطوات ملهاش ترتيب معين, تكوين كلمة السر هاتكون أسهل

— أكيد طبعا كنت بحتاج إني أخترع كلمات مش موجودة اصلا في اللغة العربية علشان أعملها كلمة سر… بس كلمات السر دي كانت بتسهل عليا  اوي أني أفتكر الخطوات دي

– وكمان, أي حد إتعلم تجويد قبل كده, قابل الإختصار و كلمة السر دي في تقريبا كل الأحكام

حروف الإظهار, حروف الإخفاء, حروف التفخيم حروف القللة وحروف الهمس… وهكذا

(وزي ما قلت لكم ……بلاش أكل وقت المذاكرة)

 :السر التالت

الخرائط الذهنية

أول يوم إتعرفت فيها على طريقة الخرائط الذهنية دي… المذاكرة كلها وتجميع المواد… إختلف تماما

كنت بعمل خريطة ذهنية للسنة كلها… أكتب حواليها المواد اللي عندي

وبعدين أعمل خريطة مفصلة لكل مادة بالدروس اللي فيها

مثلا: منهج العربي

– كنت بقسمه, عندي أجزاء مختلفة

جزء قراءة

ودروس نصوص

وبلاغة

ودروس نحو وقواعد

وأكتب تحت كل جزء, أسامي الدروس الخاصة بيه

يعني القراءة… كنت بكتب تحتها كل الدروس

– قيم إنسانية

– العلم في الإسلام

– القدس مدينة عربية إسلامية

وهكذا…

والنصوص نفس الكلام

وأكتب دروس النصوص والبلاغة

نفس الكلام بالنسبة للنحو والقواعد

كنت بكتب أسامي الدروس كلها, بتاعة كل مادة, وأعلق  لخريطة دي قدامي على المكتب

الرؤيا كانت بتوضح ليا أكتر, عن الدروس اللي خلصتها بنسبة كبيرة, والدروس اللي لسه نص نص… والدروس اللي لسه مافتحتهاش

<…. بس أهم حاجة أفكركم بيها… بلاش الأكل الكتير وقت المذاكرة>

 طريقة كمان كنت بستخدم الخرائط الذهنية فيها و فرقت معايا جدا

 كنت بعمل لكل درس خريطة ذهنية خاصة به

الخريطة الذهنية كنت بلخص فيها كل درس في صفحة واحدة

وأرسم وألون زي ما أنا عاوزة

وأطلع الأسهم والدواير… وألون

بمجرد رسمي للخريطة الذهنية, حتى قبل ما أدخل في مذاكرة الدرس, كان بيخليني احصل جزء كبييير جدا من المعلومات في مخي للدرس ده

والجميل جدا, إني لما كنت برجع للخريطة دي تاني… كنت بفتكر الدرس كله بنظرة واحدة للخريطة

دلوقتي… إنت ممكن تلاقي صديقنا جوجل يساعدك مليان أمثلة لخرايط ذهنية كتيرة معمولة جاهزة… ممكن تعمل زيها, وممكن حتى تلاقي الدروس بتاعتك معمولة جاهزة

السر الرابع:

تجميع الدرس وأسئلته

أنا كنت بعد لما أعمل خريطة ذهنية لدرس في ورقة, كنت بجيب كل الأسئلة اللي على الدرس ده, وأدبسهم في تلخيص الدرس ده

الموضوع ده بقى: كان بيخليني أحس إني بذاكر كمية صغيرة جدا, وكان بيجبرني إني لما أذاكر الدرس, أعرف إيه الأسئة الله ممكن تيجي عليه… وبكده أعرف أنا ذاكرته كويس ولا لأه

لأن المذاكرة مش هي اللي هاتجيلك في الإمتحان… اللي هايجي أسئلة

يبقى أهم مرحلة في المذاكرة… هي لما كنت أذاكر… وبعيدن أجاوب على كل الأسئلة.

وكمان كنت بعرف أراجع أي درس في وقت صغير بمجرد نظرة على تجميعة الدرس وأسئلته… وكان بيوفر عليا التشتيت بتاع إني أقعد أدور على الدرس وأسئلته في الكتاب

!صحيح… هو أنا كنت حذرتكوا من الأكل أثناء المذاكرة ولا لأه… هاتبقوا زييي كده

دول كانو ٤ أسرار, ساعدوني أتحول من طالبة مضيعة, لطالبة متفوقة ومثالية

إنت كمان, مهما كان مستواك… ومهما كانت المذاكرة صعبة ومملة بالنسبة ليك… ممكن الأسرار دي تساعدك تتحول لطالب مثالي

وأكيد مش الأسرار دي بس… في أسرار كتير… كل واحد فينا بيكون عنده مجموعة أسرار للمذاكرة الفعالة… ياريت …. كلنا نشارك بعض بأسرارنا عن المذاكرة… وكلنا نرد على إقتراحات بعض

وإعمل شير للحلقة دي… وقوم ذااااااكر

 

 


حلقات المذاكرة من أسلوب: