ياااااه… وحشتونا والله

أهلا بيكم في الحلقة رقم ١٩ من برنامج أسلوب في دقيقة, اللي بنجاوب فيه على الأسئلة اللي بتوصلنا في كومنتس.
بس مانوعدكوش إنها تكون دقيقة خالص… دقيقة إيه يا راااااجل… دا إنت منور
سؤال النهارده, بيتكرر كتير جدا, وبيوصلنا تقريبا من كل البلاد على حد سواء
وبيوصلنا بصيغ مختلفة… تعالى أقولك شوية صيغ من اللي السؤال ده بيوصلنا بيها 
السؤال: 
أنا حظي وحش إني عايش في بلد بايظة…. لو كنت عايش في بلد أفضل, كان زماني أنجح واحد في الدنيا
وكمان:
التعليم اللي في البلد اللي أنا فيها هو السبب… لو كان عندنا تعليم بالسينابون و شرائح الخص اللذيذة… كان زماني أشطر واحد في الكوكب المدور ده
أو
الحكومة اللي موجودة دلوقتي دي هي السبب في كل مشاكلي… لو كان مانويل جوزيه أو كابتن زين الدين زيدان هو اللي ماسك البلد… كان زمانها لعبت!!!!
إستنى نجيب كابتن زين الدين زيدان على جانب كده الأول
——> نقل الصورة
كنا بنقول إيه؟ أه
أكييييييد عندك حق… لو مانويل جوزيه أوي زين الدين زيدان… كانت لعبت أوي … إلعبي يا ألعااااب
المهم, السؤال ده من أجمل الأسئلة اللي في الحياة… وعلى فكرة, حتى لو السؤال ده ماخطرش في بالك قبل كده
برده مهم جدا إنك تسأله وتسمع إجابته
السؤال بإختصار: إيه مدى تأثير التعليم و البلد والحكومة والفراخ البانيه على مدى نجاحك وسعادتك في الحياة
هاقولك … ليهم تأثير وفرق أكيد 
لكن مش عليك إنت
على العموم, لو معاك فيزا وتكلفة سفر لأي مكان أفضل من المكان اللي إنت فيه دلوقتي… يبقى توكل على الله وسافر
لكن سواء إنت في أفضل مكان في العالم… أو في مكان أقل منه بكتيييير
كده أو كده… ممكن تحط نفسك بمجهودك في وسط الناس الناجحة في المكان ده… أو في وسط الناس اللي بيشتكوا ومنتظرين النجاح والسعادة ينزلوا عليهم من السما… من غير ما يجتهدوا علشانه
سواء قررت إنك تروح كوكب تاني, أو فضلت في الكوكب اللي إنت فيه دلوقتي, 
خليني أسئلك بس شوية أسئلة نعرف بيها مين صاحب المشكلة:
إيه اللي إنت عملته من ساعة لما صحيت من النوم لغاية دلوقتي؟ ياترى ممكن كنت تعمل أفضل من ساعة لما صحيت؟
إيه اللي إنت عملته في يومك الكامل إمبارح, ال ٢٤ ساعة بتوع إمبارح, عملت فيهم إيه؟ ياترى ممكن كنت تعمل فيهم أفضل؟
ضيعت وقت إمبارح؟ هل البلد اللي إنت فيها هي اللي منعتك؟
ضيعت عبادتك إمبارح؟ ياترى البلد اللي إنت فيها هي اللي منعتك؟
هل البلد اللي إنت فيها دي فيها ناس بتنجح من الصفر؟ …. طيب إيه اللي خلاهم ينجحوا؟ مش كان أفضلهم برضه يقعدوا يشتموا ويقولوا: لو كنا في مكان أفضل كان زمنا أفضل حال
هل إنت متوقع إن في حد في أي مكان في العالم مدين لك بأي نجاح؟ هل إنت ماتعرفش إنك كده أو كده لازم تموت نفسك موووت علشان تكون في مكان أفضل…
على العموم… ماتفهمنيش غلط… لو في مكان أفضل في العالم تروحوا… ربنا يوفقك وياريت تروحه… بس غالبا هاتحتاج تحسن من نفسك كتير أوي قبل ما تروحه ل٣ أسباب
- أولا: أي مكان تاني في العالم مش هايرحب بيك إلا إذا كنت أشطر في حاجة معينة بتعملها … يعني لازم يكونوا محتاجينك علشان يرحبوا بيك وتكون ضمن الناس الناجحة
- ثانيا: غالبا… مفيش مكان تاني أصلا هايقبل ياخدك خالص إلا إذا كنت مميز في حاجة…. يعني مش هايخدك كده وإنت أمووور… يا أمووووور
- ثالثا: لو إنت في بلد مش جميلة أوي… صدقنا… أسهل بكتير جدا إنك تكون أفضل واحد في البلد كلها… لأن المنافسة فيها بتكون شبه منعدمه… لأن بيكون أسهل دايما إن الناس تقعد على القهوة وتعلق فشلها على شوية شماعات
الموضوع كبير أوي… أكبر من إننا نغطيه في حلقة قصيرة… وهانتكلم عليه كتير إن شاء الله
إحنا قررنا نرجع بحلقات أسلوب في دقيقة علشان وصلنا شوية أسئلة جميلة… ياريت إنت كمان تبعتلنا أسئلتك 
وياريت تكون مش منتظر إننا نقولك إضغط لايك علشان تضغط لايك… إضغط يارااااجل
تطبيق أسلوب موجود للأيفون والأندرويد… دوس ونزل التطبيق وإكتبلنا ريفيو جميل زيك
وإكتبلنا أسئلتك لحلقاتنا اللي جاية
سلاااام
إعمل متابعة\سابسكرايب لقناة أسلوب على يوتيوب, علشان توصلك حلقاتنا أول لما تنزل http://bit.ly/osloop-sub وكمان نزل برامج أسلوب للأيفون والأندرويد… علشان توصلك جميع حلقات أسلوب بالترتيب الصحيح نزل أسلوب على #موبايلك #الأندرويد من هنا: http://bit.ly/osloop-android وأسلوب #أيفون من هنا: http://bit.ly/osloop-iOS-eg وده, #موقع أسلوب: http://www.osloop.com وده أسلوب على فايسبوك: https://www.facebook.com/osloop.life/ وده أسلوب على انستاجرام: https://www.instagram.com/osloop.life/ وأكيد أسلوب على تويتر: https://twitter.com/OsloopLife