أهلا بيكم في الحلقة رقم ٢٦ من برنامج أسلوب في دقيقة اللي بنجاوب فيه على الأسئلة اللي بتجيلنا في كومنتس واللي عمرها ما بتكون دقيقة أبدا سؤال النهاردة…. بمناسبة الدراسة والعودة إلى المدارس السؤال ممكن يكون غريب شوية… بس هو بيوصلنا كده, وبالصيغ المختلفة دي السنة الدراسية هاتبدأ… أعمل إيه؟ أنا في ثانوية عامة… ومش عارف أعمل إيه؟ أنا في أزهر وعندنا ١٨٢٤ مادة … ومش عارف أعمل إيه أنا جعان… بس مش عارف أطلب أكل إيه…. لأ لأ… ده سؤال تاني… سيبك منه المهم… السؤال ببساطة… في دراسة ومذاكرة في الموضوع… المفروض تعمل إيه وووووووووه السؤال ده له إجابتين… إجابة قصيرة… وإجابة طويلة.. الإجابة القصيرة… إقفل الفيديو ده وقوم ذاكر… وكده إنت زي الفل ومش محتاج باقي الفيديو لكن لو إنت مكسل تقفل الفيديو… يبقى تعالى بقى أسمعك الإجابة الطويلة صوباعك الجميل ده بس على زرار الاايك … جربه كده بس شوفه شغال ولا لأه… وتعالى نغير تفكيرنا في طرق المذاكرة عندنا معلومات مهمة عاوزين نتفق عليها بس الأول ١- المذاكرة والدراسة… ممكن بسهولة جدا تتحول لوقت ممتع ولعبة مسلية جدا… مهما كان مستواك التعليمي في السنين اللي فاتت… حتى لو كنت راس كرومبة ٢- ينفع دايما تبدأ مذاكرة ورحلة تفوق من الصفر لو بدأت مذاكرة بذكاء وتنظيم من أول السنة… (أو من أول لما تشوف الفيديو يعني) ٣- لما تحول وقت المذاكرة لوقت ممتع, هاتستمتع بالدراسة جدا, وهاتستمتع بالعام الدراسي جدا … إكتب النقطة دي علشان ماتنسهاش ٤- تحويل وقت المذاكرة لوقت ممتع, مش معناه إن إنت تاخد بريكس ووقت راحة ممتعين وتذاكر ٥ دقايق وترتاح ٥ دقايق ولا حتى معناه إنك تلغي الراحة من جدولك تحويل وقت المذاكرة لوقت ممتع معناه: إنك تحول طريقة المذاكرة نفسها لطريقة مسلية لعقلك اللي بيحاول يهرب من ألم المذاكرة طيب… اللي فات ده كانت معلومات مهمة عاوزين نرسخها في دماغنا علشان نقدر نبدأ رحلة مذاكرة ممتعة بس دلوقتي… محتاجين خطوات عملية طبعا طبعا طبعا… قلمك الجميل … وكراسة أسلوب بتاعتك, وإكتب الخطوات دي وقف الفيديو وروح هات ورقة وقلم الأول, لأن موضوع شرف الحضور الرسمي ده مش هاينفعك في حاجة يا أمور يا حلو يا طعم يا جميل يا رايق ورقة وقلم بسرعة خطوات لازم تنفذها: الخطوة الأولى: ١- إقتل التشتيت بكل أنواعه قبل ما تبدأ مذاكرة يا كبير, لازم تقتل التشتيت لازم ماتذاكرش أدام تليفيزيون أو أي حاجة ممكن تشتتك لازم تذاكر في مكان تقدر فعل تركز فيه, وتغوص في أعماق المذاكرة علشان تقدر تستمتع بيها لو أخوك اللي قاعد معاك في الأوضة عنده هواية تسلق النجفة والقفز منها على الدواليب… سيب الأوضة وروح ذاكر في أي حتة تانية لو أختك بتكلم خطيبها في التليفون وبتتخانق معاه علشان هي عاوزة أوضة السفرة النبيتي في أخضر, مش اللي مامته إختارتها… يبقى لازم تروحي تذاكري في مكان تاني يكون فيه تركيز شويتين طبعا مفيش حاجة إسمها موبايل أبدا وإنت بتذاكر… الموضوع بجد مش هزار, إقفل موبايلك بجد وقت المذاكرة … يبقى الخطوة الأولى كانت إيه؟ لازم تقتل كل تشتيت قبل ما تذاكر الخطوة التانية: ٢- تكرار مذاكرة الموضوع الواحد على فترات كتيرة متباعدة إحنا كنا إتكلمنا بالتفصيل عن طريقة “الكتابة والتكرار” في المذاكرة لكن, لو أنا بذاكر موضوع معين, مش التكرار بس إني أكرر مذاكرة نفس الموضوع في المرة الواحدة خمسين مرة حاجة مهمة جدا في التكرار, هي إني أكرر مذاكرة الموضوع نفسه مرة كمان بعدها بيوم وكمان مرة بعدها بيومين وكمان مرة بعدها بأسبوع وأفضل أكرر أكرر أكرر أول مرة مذاكرة موضوع ممكن ياخد ساعة أو أكتر لكن تاني مرة تكرار, الموضوع هياخد بالكتير أوي ١٠ دقايق… وهايكون فعلا ممتع, وهاتكون نتيجة التحصيل أكبر بكتير جدا وتاني مرة تكرار لمذاكرة نفس الموضوع, المذاكرة هاتاخد ٥ دقايق… والتحصيل هايكون أضعاف أضعاف أضعاف وتالت مرة مذاكرة ممكن الموضوع ياخد أقل من ٥ دقايق لكن… لا غنى عن التكرار التكرار التكرار التكرار … لو عاوز فعلا المعلومات تدخل جوه خلايا مخك اللي عامل زي الجيلي ده خلاص يا عمونا؟ حلينا لك لغز: إنك بتنسى؟ التكرار … هو أهم قرار يبقى الخطوة التانية كانت إييييه؟ تكرار مذاكرة الموضوع الواحد على فترات كتيرة متباعدة سؤال بس محرج… هو إنت بتكتب … ولا قاعد تدور هاتتفرج على فيديو إيه تاني من الفيديوهات اللي تحت الفيديو ده؟ ياعم المشتت إنت… إكتب يا عم… إكتب علشان اللايك اللي إنت حطيته على الفيديو ده يكون بفايدة… ماتكتب يا وااااد! … يادي النيلة … العيال جنوني خلاص يا أبو أحمد الخطوة التالتة - خلي وقت المذاكرة وأدوات المذاكرة تجربة ممتعة كان عندي مدرس وأنا في سنة ٣ إعدادي, كان بيكتب ويرسم ويلون على السبورة أثناء الشرح, لمادة الرياضيات… وكان كل الفصل بيستمتع بالحصة بتاعة جدا وكل الفصل كان بيتحمس أوي إنه يخلي الكراسة بتاعة المادة بتاعة المدرس ده, أجمل كراسة بس الموضوع ده كان بياخد وقت شوية أو شويتين في المذاكرة علشان تلون وترسم وتخلي الكراسة شكلها جميل … بس كان بيفتح النفس على المذاكرة أوي المهم… أنا لما كنت أكره المذاكرة… كنت أحاول أخلي وقت المذاكرة ممتع بإني أكتب وأرسم وألون وأنا بذاكر وأفتح نفسي على المذاكرة … طبعا كان بيجيلي بعض الناس اللي بتحب تفتي أوي, وكانوا بيقولولي: إنت كده بتضيع وقت… إنت بتلعب مش بتذاكر… إنت بتضحك على نفسك أنا طبعا ما كنتش بهتم بكلام أي حد منهم, لأن دي الطريقة الوحيدة اللي كانت فعلا بتفتح نفسي على المذاكرة بجد, وكانت بتخليني أتعلم بجد لغاية لما وصلت ل تانية ثانوي, وكان عندنا مدرس جميل أوي, قعد يشرحلنا في حصة كاملة لذة ومتعة إنك ترسم وتلون وتدلع المذاكرة كده وإنت بتذاكر … وشجعنا إننا نجرب الطريقة دي … ولو جابت نتيجة معاك … يبقى إلتزم بيها وسيبك من اللي يجي يفتي لك بإنك بتضيع وقتك… إنت بتذاكر بذكاء مش بتضيع وقت. وأنا كمان بشجعك دلوقتي إنك تجرب الطريقة دي… إنك تنظم مكان مذاكرتك أوي أوي, وترتب أدوات مذاكرتك, وتكتب بألوان مختلفة وترسم وتفتح نفسك على المذاكرة وإنت بتذاكر ولو الطريقة دي جابت معاك نتيجة… يبقى إلتزم بيها ولو الطريقة دي ماجابتش معاك نتيجة… مفيش أي مشكلة… لخبط مكان المذاكرة تاني وإكتب بخط وحش وإعمل أي حاجة ممكن تفتح نفسك على المذاكرة يبقى الخطوة التالتة كانت إيه؟ خلي وقت المذاكرة و أدوات المذاكرة تجربة فعلا ممتعة الخطوة الرابعة الإلتزام والإجبار والإستمتاع بالألم ده بقى الكلام الكبير مش كل الوقت هاتكون نفسك مفتوحة على المذاكرة بالعكس, في أيام هاتكون تعبان وهبطان ومسحول ومحلول ومحمود وم…. المهم لازم بقى وإنت في أصعب حالاتك الصحية والبدنية, تروح تجيب مادة حلوة كده, وتبدأ تنقل الدرس اللي فيها من غير حتى ماتفهم حاجة إجبر نفسك… وإستمتع أوي بألم الإجبار وقول لنفسك… الله… الله… الألم جميل أوي… إديني أكتر… أنا بحب الألم أوي… ده أخركوا يعني؟؟؟؟ طيب شوفوا أنا بقى هاعمل فيكوا إيه دا أنا هاذاكر أضعاف أضعاف دلوقتي وأنا مش عاوز أذاكر… وهاتشوفوا …. بوعدك, إنك هاتستمتع فعلا بالمذاكرة بإجبار النفس على المذاكرة في الأوقات اللي مش طايق فيها تذاكر أبدا الخطوة الخامسة إكتب أجمل تجربة مذاكرة بتحبها على ورق… وإقرأها كويس بص بقى… مش كل الناس زي بعض … في فروقات بين الناس في ناس كتيرة جدا بتكون تركيزها في المذاكرة أكبر بكتير جدا في وقت الصباح الباكر عن تركيزها أثناء المذاكرة بالليل وفي ناس قليلة شوية, بيكون تركيزها في المذاكرة باللي أكبر بكتير من تركيزها للمذاكرة صباحا أنا عن نفسي, من الناس القليلة اللي تركيزها بعد الساعة ١٢ بالليل بيكون أعلى مليون مرة من تركيزي صباحا علشان كده, بناء على معرفتي بنفسي, بقيت بركز وقت مذاكرتي بالليل …. بس أكيد طبعا كنت بذاكر الصبح برضه طبعا دايما بيجيلي الناس اللي تقعد تشرحلي إن المذاكرة الصبح هي أفضل وإن في دراسة إتعملت في معهد أم صلاح العالمي لتقفيص البلح, بإن خلايا العنب بتكون في أعلى درجات الجوافة الصبح بدري, وعلشان كده أنا بضيع عمري في إني مش بذاكر الصبح بس أنا عارف إن الناس دي كلامها صح جدا, بس غالبا صح لأم صلاح… مش ليا أنا عارف عن نفسي أنا بركز في المذاكرة إمتى وإزاي ومليش دعوة أنا ب أم صلاح بتحب تذاكر إمتى… هي أم صلاح … وملهاش كلام غير على صلاح وعلى أبو صلاح إنما أنا … هذاكر في الوقت اللي بركز فيه أكتر و بالطريقة اللي بتكون أفضل ليا إنت كمان, لازم تفتكر على ورق دلوقتي, إيه أفضل وقت وتجارب وطريقة مذاكرة إنت جربتها قبل كده, وجابت معاك نتيجة وحط خطة إنك تلتزم بالطرق اللي بتجيب معاك نتيجة ولو لسه لغاية دلوقتي مفيش عندك طريقة محددة, نفذ الخطوات اللي في الحلقة دي … وإبدأ لاحظ الطرق اللي بتجيب معاك نتيجة ونفذها يبقى الخطوة الخامسة كانت إيييه؟ مالكش دعوة ب أم صلاح و بكده يا طويل العمر, معاك خطوات تفتح نفس أفشل المخلوقات الفضائية على المذاكرة, وتخليك تتغلب على صلاح وعلى أم صلاح إنت محتاج ضروري تشجع نفسك كل يوم كل يوم كل يوم على تحفيز نفسك وعلى المذاكرة علشان كده, حلقات أسلوب كلها في إنتظارك, تشحن نفسك طاقة إيجابية وتقوم تعمل الشغل اللي وراك وكالعادة, دوس سابسكرايب لو إنت لسه مش مسبسبسبسبسكرايب و حط لينك الحلقة في جميل جروبات الواتس آب والفايسبوك اللعين وأكيد… خليك كريم… خليك حبوب