ده مش عن علم… ده فقط عن تجربة شخصية 

إنت …ولا ربنا سبحانه وتعالى؟

لايف هاكس: تخليك تعيش فوق الحياة

مهما كان دينك ومهما كان إلتزامك بالدين…. في قوانين بتحصل دايما وبنشوفها أدام عينينا كل يوم

في صفات ربنا مش بيسمح لحد إنه ينازعه فيها أبدا أبدا أبدا

زي الرحمة…

مستحيل تكون أرحم من ربنا

جرب حتى كده وخليك رحيم رحمة كبيرة أوي أوي أوي بزيادة مع إنسان تاني

هاتشوف إن ربنا مش هايسمح لواحد زيك إنه يكون أرحم منه… وهاتشوف من ربنا رحمة مضاعفة

ربنا أرحم رحيم

و زي العفو!

جرب تسامح حد يكون غلط في حقك جامد جدا

جرب تسامح كده … ربنا مش هايسمح لك يا أمور تكون أكتر عفو منه سبحانه وتعالى والله

سامح علشان ربنا يسامح

و والله ثم والله ثم والله: لو مكتبة كتب كاملة إتكتبت عن قصة سيدنا أبو بكر و“مسطح” … لما كفت الكتب إنها تعبر عن الآمر بالسماح مهماااااااا كان الظلم

ولو مش عارف قصة سيدنا أبو بكر ومسطح بن أثاثة… يبقى تروح تدور عليها دلوقتي حالا

إقرأ إن شئت من سورة النور آية ٢٢:

وَلْيَعْفُوا وَلْيَصْفَحُوا أَلَا تُحِبُّونَ أَنْ يَغْفِرَ اللَّهُ لَكُمْ وَاللَّهُ غَفُورٌ رَحِيمٌ

زي الكرم… جرب تكون كريم “بإخلاص لوجه الله”

مستحيييييل مستحييييييييل ربنا يسمحلك يا غلبان تكون أكرم منه

هاتشوف كرم خفي من ربنا عمرك ماتحلم بيه… كرم في حاجات تعرفها وماتعرفهاش

مثال: في بعض الطلاب المتفوقين, تلاقيهم بينشروا كل مصادر ومعلومات عن أفضل مصادر وأدوات بتساعدهم على المذاكرة والنجاح

الناس دي…. ربنا بيكتب لها توفيق كبيييير أوي أوي… مش لازم في درجات… لكن فضل خفي من ربنا

أي إنسان بيكون كريم بإخلاص… مستحيل تحاول تنافس ربنا يا غلبان يا فقير يا ضعيف في الكرم… جرب بس كده خليك كريم بزيادة “بإخلاص” شويتين تلاتة أربعة كده

وإنت والله هاتتبسط أوي

شوف حتى بنفسك أغنى رجل في العالم كله “بيل جيتس”

بقاله عشرين سنة بيصرف مليارات على علاج ناس في قارة تانية خالص, مش في بلده ولا القارة بتاعته

وياترى فلوسه نقصت؟؟؟ ؟؟؟

فلوسه بتتضاعف وبتكبر كل ما بيصرف في الخير أكتر

مش هو بس!

مفيش إنسان دخل في منافسة الكرم بإخلاص… بإخلاص… بإخلاص… إلا وربنا أكرمه أضعاف مضاعفة

نفس الحكاية في صفات القوة

ربنا مش بيسمح لحد إنه يضاهيه في القوة والكبرياء والجبروت

تحاول تكون قوي على الناس؟…. فكرة مرة تانية وتالتة ورابعة… لأن كان غيرك أشطر

شوف كده رؤساء دول كانوا قريب جدا مفيش حد يقدر يجيب إسمهم على لسانه… واللي كان يجيب بس إسمهم على لسانه بغير النفاق, كان بيتبهدل ويتسجن ويتعذب.

بنوا لنفسهم كبرياء وجبروت وقوة وهمية… وهما والله غلابة جدا

فين الرؤساء دول دلوقتي؟ منهم اللي مات مقتول ميتة مهينة

ومنهم اللي إتعدم

ومنهم اللي عايش ذليل

عاوز تنتقم من حد ظلمك؟

طيب فكر كده … هل إنت قصرت في أي حق من حقوق ربنا قبل كده؟ أو قصرت في حق من حقوق الناس قبل كده؟

عاوز تنتقم؟…. ممممم فكر مرة تانية… فكر كده كمان مرة…

من صفات الله إنه منتقم

عارف يعني إيه؟… يعني خليك طيب أحسن… بلاش الإنتقام وبلاش تنافس في الإنتقام

علشان إحنا مش أد إنتقام ربنا.

بلاش تحاول تنافس على القوة والإنتقام والجبروت والكبرياء… حاول تنافس على الرحمة والكرم والعفو

شغل مخك إنت كمان وفكر كده… هاتلاقي الكلام ده حقيقي بجد

جرب تكون رحيم… وشوف مين أرحم… إنت ولا ربنا

جرب تكون كريم…وشوف مين أكرم…إنت ولا ربنا

جرب تكون عفو…وشوف مين أكتر عفو…إنت ولا ربنا؟

إوعى تجرب تكون متكبر… والله إحنا غلابة أوي… حتى أكتر واحد متكبر ومتجبر في الكون كله… والله غلبان جدا ولو جاله إمساك بس… هايقلب أرنب في لحظة

إوعى تجرب تكون منتقم… وليعفوا وليصفحوا… والسؤال بقى: ألا تحبون أن يغفر الله لكم؟؟؟؟

كلنا غلابة أوي والله… كلنا كلنا بلا إستثناء

كلنا محتاجين رحمة

وكلنا محتاجين كرم

وكلنا بنغلط كل يوم, وبنكسل كل يوم… وبنقول ومش بنعمل

محتاجين عفو والله من ربنا

وهاسأل نفسي وأسألكم…. ألا تحبون أن يغفر الله لكم؟

إعمل متابعة\سابسكرايب لقناة أسلوب على يوتيوب, علشان توصلك حلقاتنا أول لما تنزل
http://bit.ly/osloop-sub
وكمان نزل برامج أسلوب للأيفون والأندرويد… علشان توصلك جميع حلقات أسلوب بالترتيب الصحيح
نزل أسلوب على ‫#‏موبايلك‬ ‫#‏الأندرويد‬ من هنا:
http://bit.ly/osloop-android
وأسلوب ‫#‏أيفون‬ من هنا:
http://bit.ly/osloop-iOS-eg
وده, ‫#‏موقع‬ أسلوب:
http://www.osloop.com
وده أسلوب على فايسبوك:
https://www.facebook.com/osloop.life/
وده أسلوب على انستاجرام:
https://www.instagram.com/osloop.life/
وأكيد أسلوب على تويتر:
https://twitter.com/OsloopLife