أهلا بيكم في الحلقة رقم ٢٩ من برنامج أسلوب في رمضان

وحلقة بعنوان: ريوبيك كيوب

اللي هو البتاع ده يعني

عاوزين نسألك الأول… تعرف تحل اللعبة دي؟ لعبة ريوبيك كيوب دي… يا ترى جبتها قبل كده وجربت تحلها؟

اللعبة دي المفروض بتشتريها متربتة بالشكل ده:

وبعدين تجيب واحد بيحبك… ويلخبطها بالشكل ده

وبعدين تحاول إنت بقى ترجعها تاني زي ما كانت بالشكل ده

في ناس كتير مننا إشترت اللعبة دي وجربت تحلها… وكل واحد فينا بلا إستثناء, من الناس اللي جربت تحل اللعبة دي, أكيد ماعرفتش تحلها

أي واحد فينا جرب يحط أشطر خطط ذكائه في إنه يحل اللعبة الجميلة دي… أكيد ماعرفش يحلها

أكتر واحد فينا بيطلع الأول على الفصل وأشطر واحد في الكلية وأشطر واحد في شغلته, بكل تأكيد مش هايعرف يحلها مهما جرب خطط ذكية

أخرنا كلنا, إن إحنا نحل منها مستوى واحد زي كده مثلا… إنما إنك تحلها كلها على بعضها كده زي كده… لأه… مستحيل

(صوت أسلوبي) أستغفر الله العظيم يارب… شكل اليوم طويل النهاردة.. ولسه مابدأناش نفهم إنت عاوز إيه بلعبة الكوربك كروب دي عالصبح

إسمها: ريوبيك كيوب يا أسلوبي… 

الحلقة دي مهمة جدا جدا جدا جدا

علشان الحلقة دي بتمثل حاجات كتيرة جدا جدا جدا في الحياة

اللعبة دي: إنت مهما كنت ذكي وشاطر.. مش هاتعرف تحلها… إلا لما تتعلم إزاي تحلها

(صوت أسلوبي) مش فاهم أي حاجة في أي حاجة… هاعرف أحلها… ولا مش هاعرف أحلها

هاتعرف تحلها بس… لما تتعلم إزاي تحلها

لما تتعلم طريقة من طرق حلها

لما… ت ت ع ل م طريقة حلها

إنما بالشطارة والذكاء والتجربة وأي بطيخ… مش هاتعرف تحلها … وهاتزهق منها وترميها ومش بعيد تكسرها

بس إحنا مشا جايين النهاردة علشان نقولك إزاي اللعبة دي

إحنا جايين نستفيد من الدرس المهم أوي في الحياة ده

عمرك ما هاتعرف تحلها… إلا لما تتعلم إزاي تحلها

ولما تتعلم طريقة حلها… هاتبقى بتحلها بسهولة جدا جدا جدا, ومن غير تفكير كمان

يعني الموضوع فعلا سهل… وحلها سهل… وحل أي مشكلة في الحياة كلها سهل جدا, لكن بس إنك تتعلم طريقة الحل… هي دي النقطة

كل حاجة تانية عندنا في الحياة – عمرنا ما هانعرف نعملها صح, إلا لما “نتعلم” إزاي نحلها صح

نتعلم

– لو إنت طالب, وعاوز تكون متفوق وناجح

لازم تروح تتعلم الطريقة اللي تكون بيها متفوق وناجح

-> تشوف فيديوهات تعليم طرق المذاكرة المختلفة

-> تتعلم تنظيم وإدارة الوقت

-> تدور على المهارات اللي إنت محتاج تتعلمها علشان تقدر تذاكر صح

– لو إنت زوج أو زوجة, وعاوز تعيش حياة سعيدة… ده لو عاوز يعني

-> يبقى لازم تستثمر من وقتك وجهدك في إنك تتعلم إزاي تعيش حياة زوجية سعيدة

مهما كنت شاطر وحبوب, ومها كنتي شاطرة وذكية… عمرك في حياتك ما هاتعيشي حياة ناجحة سعيدة بجد

غير لما تتعلم وتتعلمي إزاي تعيشوا حياة سعيدة

-> لازم نقرأ من كتب في تعليم الحياة الزوجية

-> لازم نشوف فيديوهات من اللي بتشرح الكتب المشهورة في الحياة الزوجية, زي حلقة كتاب: لغات الحب الخمسة اللي عملناه هنا في أسلوب

– لو إنت عاوز تكون ذكي في التعامل مع الناس

-> لازم تقرأ كتب في فن التعامل مع الناس

وطول ما إنت لسه ما بدأتش تقرأ وتتعلم… ممممم… إنت عارف… هاتفضل مكانك

كراستك بقى الجميلة بتاعة أسلوب في رمضان, وإكتب فيها ملخص الحلقة دي:

-> الحياة عبارة عن مجموعة من الألغاز… 

الألغاز دي مش بتتحل بالفطرة أبدا

-> كل لغز, وله طريقة حل… و معظم الألغاز دي لها حلول معروفة… ومنتظرة اللي يروح يتعلمها

محتاجين نسمع منك, إيه في الحياة عاوز تعمله, وياترى لقيت المكان اللي تتعلم منه الحاجة دي ولا لسه

إعمل شير الحلقة دي من أسلوب, علشان تعمل دورك في الحياة في نشر النجاح والإيجابية

ولو إنت عاوز تتعلم طريقة حل الريوبيك كيوب… ممكن تشوف الفيديو ده على قناتي الشخصية:

 

لكن ماتعملش كده غير في الأجازة أو في وقت البريك

ورمضااااان كرييييم

إعمل متابعة\سابسكرايب لقناة أسلوب على يوتيوب, علشان توصلك حلقاتنا أول لما تنزل
http://bit.ly/osloop-sub
وكمان نزل برامج أسلوب للأيفون والأندرويد… علشان توصلك جميع حلقات أسلوب بالترتيب الصحيح
نزل أسلوب على #‏موبايلك #‏الأندرويد من هنا:
http://bit.ly/osloop-android
وأسلوب #‏أيفون من هنا:
http://bit.ly/osloop-iOS-eg
وده, #‏موقع أسلوب:
http://www.osloop.com
وده أسلوب على فايسبوك:
https://www.facebook.com/osloop.life/
وده أسلوب على انستاجرام:
https://www.instagram.com/osloop.life/
وأكيد أسلوب على تويتر:
https://twitter.com/OsloopLife