أشهر كتاب تنمية بشرية في التاريخ | العادات السبع للأشخاص الأكثر فاعلية
 تلخيص الكتاب بأمثلة عملية من واقعنا الحالي:

العادة الأولى للناس الأكثر نجاحا :
Be Proactive
ترجمتها بالعربي “خليك إيجابي ومبادر”

خلينا نشرحلكم معناها الحقيقي, في الحياة علشان تبقى واضحة ليكم

الناس مقسومة فريقين:
الفريق الأول: بيخلي الأحداث والظروف تتحكم في حياته, وبيستسلم ليها
والفريق ده, صعب انه ينجح في حياته, وصعب انه يعيش حياة سعيدة

الفريق الثاني: هي الناس الإيجابية والمبادرة, الناس دي بتتعامل مع الظروف على انها بتحصل لكل الناس
وان دي فرصة ليها انها تكون متميزة عن الناس التانية… لأنها مش بتسمح للظروف دي انها تتحكم في حياتها, وبيرسموا لحياتهم طريق, لغاية لما يوصلوا للنجاح
ومش بيضيعوا أي مجهود أو وقت, في إنهم يعلقوا سبب عدم نجاحهم على أي شماعة
وهما عارفين ان الطاقة الضايعة في إلقاء اللوم على الظروف, مش هاتحسن من حياتهم

فيه ناس بتعلق فشلها على حال البلد, والتعليم, والبطالة والظروف والحالة الإجتماعية

وفي ناس تانية, في نفس البلد, وبنفس التعليم, ونفس تحديات البطالة والظروف والحالة الإجتماعية… وقدرت تبني نفسها وتنجح

فيه أمهات…. مسؤليات الأولاد والبيت والأسرة مش بتخليها تعرف تبني لنفسها أي مستقبل مستقل…
وبتشتكي طول اليوم إن معندهاش وقت

وفي أمهات, بنفس التحديات دي, بتقدر تشتغل وتدرس وتحضر كمان ماچيستير ودكتوراه… وتبقى ناجحة في كل دول

في ناس, بتستنى ان الشركة اللي بيشتغل فيها, هي اللي تعلمه وتكبره

وفي ناس هي اللي بتجتهد, وتثبت نفسها, وهي اللي بتبني وتكبر الشركات اللي هي بتشتغل فيها

لو عاوز تكون انسان ناجح, إنت كمان خليك مع الفريق الإيجابي والمبادر

العادة الثانية:
Begin with the end in mind
إبدأ… والنهاية في ذهنك

الناس الناجحة, لازم تتخيل نفسها يوم وفاتها, عاوز الناس تفتكرك بإيه بالظبط
وإنت نفسك… لو هاتكتب قصة حياتك… تتمنى يكون مكتوب فيها إيه؟

لو عاوز تكتب إنك عشت: رب أسرة صالح, يبقى تبدأ تدي إهتمام أكبر لأسرتك, وتسعى انك تكون قدوة ليهم

لو عاوز تكتب إنك كنت: إنسان ناجح في شغلك, يبقى تبطل كسل وإجتهد, وإسعى علشان تبني النجاح ده

لو عاوز تكتب إنك كنت: بار بوالديك, يبقى تحط خطة يومية إنك تسأل عليهم وتقضي مصالحهم, وتخليهم يفتخروا بيك

العادة التالتة:
Put first things first
رتب أولوياتك

الحاجات اللي بنعملها في الحياة… بتكون حاجات.. مهمة… أو مش مهمة…
وبتكون زي كده

حاجات مهمة وطارئة…

حاجات مهمة, بس غير طارئة

حاجات مش مهمة, بس طارئة

حاجات مش مهمة, ومش طارئة

الحاجات المهمة والطارئة: زي مثلا العبادة, وتسليم شغل في ميعاد محدد, وأيام الإمتحانات… والظروف الطارئة المهمة اللي بتحصل للإنسان… كلها حاجات مهمة ولازم تتعمل في الوقت الحالي

الحاجات المهمة, بس غير طارئة… بيكون فيه حاجات مهمة جدا, بس للأسف لو ماتعملتش مش هايحصل مشكلة في الوقت الحالي… بس هاتأثر على المستقبل… زي ممارسة الرياضة يوميا, وتحسين العلاقة الأسرية, وتحسين مستوى التعليم… تحديد وتحقيق الأهداف في الحياة

حاجات مش مهمة, بس طارئة: حاجات مش مهمة… بس طارئة… زي مثلا, تتفرج على ماتش كورة, لازم تشوفه في ميعاده… أو هايفوتك

حاجات مش مهمة, ومش طارئة… اللي هي الفايسبوك يعني, والقعدة على القهوة والكلام في اللي مالكش فيه… حاجات مش مهمة… ومش طارئة

للأسف… إحنا بنقضي معظم حياتنا في الحاجات اللي مش مهمة

إحنا لازم نرتب أولويات حياتنا صح

ونعيش حياتنا بناء على الأولويات دي

يعني لو أهم أولوية عندك, هي طاعة ربنا
يبقى مايجييش وقت الصلاة, وتدي أهمية لأي حاجة تانية عن الصلاة

ولو أسرتك ليها أولولية عندك, يبقى تقضي وقت أطول مع أسرتك

ولو نجاحك في حياتك العملية من أولوياتك, يبقى لازم تختار إنك تخصص وقت أكبر لنجاحك, ووقت أقل لتضييع الوقت والفايس بوك

العادة الرابعة:
Think Win Win
فكر بطريقة المكسب المشترك

النجاح في الحياة, هو إنك تكون عاوز اللي أدامك ناجح وسعيد…زي ما إنت بتتمنى لنفسك إنك تكون ناجح وسعيد

يعني لو إنت صاحب شركة أو شغل
و فاكر إن مكسبك هايتحقق من غير ما الموظفين اللي عندك يكسبوا و ينجحوا ويتقدموا هما كمان في حياتهم
يبقى انت أكيد غلطان… ماتخافش انهم يسيبوا شركتك لو بقوا شاطرين… انت هاتستفاد ان الناس الكويسة هاتكون عاوزة تشتغل معاك في المستقبل لأنك بنيت سمعة انك بتبني للناس مستقبلهم في نفس الوقت اللي انت بتكسب فيه
نجاحكم مرتبط ببعض

لو انت زوج, وفاكر ان انت من حقك انك تخرج مع أصحابك وتتنفس في الشغل مع زمايلك
بس مراتك لازم تشيل مسؤلية البيت والأولاد وضغطوات الحياة وميكونش لها نفس الوقت اللي انت بتتنفس فيه مع أصحباك
وفاكر نفسك ان ممكن تعيش حياة سعيدة…. يبقى انت أكيد غلطان

لو انتي زوجة, وفاكرة ان لما تنقلي ضغوطات الحياة عليكي… عصبية للأولاد ولجوزك
وفاكرة ان الحياة ممكن تكون سعيدة… يبقى انتي كمان غلطانة

الحياة بتكون بس سعيدة… لما تبدأ تهتم الأول ان اللي أدامك يكون كسبان وسعيد
حتى لو احتجت انك تستثمر وقت ومجهود في الأول انك تخلي اللي أدامك سعيد… زي كل استثمار ناجح, لو عملته صح, هاتلاقي النتيجة في الآخر

لو انت طالب في مدرسة أو جامعة… وفاكر ان لما تخبي معلومات أو كورسات أو حلول عن باقي زمايلك… ده هايخليك ناجح
ده هايخليك إنسان مكروه, وأناني… وعمرك ما هاتنجح أبدا… كمان مرة… هاتبقى مكروه… وفاشل… وأناني

العادة الخامسة:
seek first to understand, then to be understood
حاول انك تفهم أولا, قبل أن يفهمك الآخرون

الكاتب بيقول: إحنا بنقضي معظم حياتنا نتعلم نقرأ ونكتب, لكن مش بنتعلم إن إحنا نسمع

لو انت زوج أو زوجة… العادة دي مهمة جدا جدا جدا لحياتكم… طبعا مع العادة رقم ٤… النجاح بيكون مشترك

إنت كازوج… لازم تفهم المجهود الخرافي اللي مراتك بتعمله من أول لما بتصحى من النوم علشان تدير أسرة كاملة بكل تحديات ومحبطات الحياة.

وإنتي كازوجة… لازم تقدري الضغوطات اللي بره البيت على زوجك… لازم كل واحد يحاول يفهم اللي أدامه, قبل ما اللي قدامه يحس بيه ويفهمه

العادة السادسة:
synergies
التعاون الإبداعي
هو تعاون بين أكتر من شخص, عندهم إمكانيات مختلفة, بيكملوا بعض, وبيطلعوا نتايج, مفيش حد فيهم يقدر يطلع الناتج ده لواحده

مثال, فريق عمل أسلوب اللي بينتج الڤيديو اللي انتوا شايفينه ده,

فيه في فريق العمل:
اللي بيكتب الاسكريبت
ومنهم اللي بيسجل و يعمل مونتاج للصوت
ومنهم اللي بيشتغل على الجرافيكس
ومنهم اللي بيعمل الويب سايت www.osloop.com والأبليكيشنز بتاعة أسلوب لموبايلات الأي فون والأندرويد

لو جبنا واحد من فريق العمل لواحده…. مش هايعمل حاجة بالناتج بتاعه لواحده… الإسكريبت لواحده مش هايطلع العمل ده
ومفيش تسجيل صوت ولا جرافيكس من غير سكريبت
والويب سايت, ملوش لازمة لو مفيش حلقات

مجموع التعاون الإبداعي لفريق العمل, بيطلع ناتج مكتمل القيمة… ماينفعش واحد من فريق العمل يطلعه لواحده

===========
العادة السابعة: سن المنشار
sharpen the saw

دي أهم استثمار كل واحد فينا لازم يستثمره في نفسه… إن الواحد مايبطلش يتعلم حاجات جديدة, ويزود مهاراته في الحاجات اللي بيعرف يعملها دلوقتي

الكتاب بيدي مثال, لو إنت شغلك إنك تقطع شجر في الغابة بمنشار, وهاتقطع ١٠ شجرات في ١٠ ساعات

يبقى, لو استثمرت أول ٥ ساعات في إنك تسن المناشر بتاعك كويس أوي… هاتقدر في ال ٥ ساعات اللي باقيين, تقطع ٢٠ شجرة… مش عشرة

لازم ماتوقفش تحسين مهاراتك في الشغل اللي إنت بتعمله

يعني لو إنت مصصمم جرافيكس, يبقى لازم تستثمر كل يوم من وقتك, إنك تتعلم أدوات تصميم جديدة, توفر عليك وقت شغل في المستقبل

لو شغلك بيحتاج كتابة كتير على الكمببيوتر, يبقى محتاج تستثمر من وقتك في إنك تتدرب على الكتابة السريعة على الكمبيوتر

لازم ماتوقفش تعليم أبدا, ده أجمل استثمار, ممكن تستثمرة بنفسك في نفسك

=============================
وبكده, نكون وصلنا لنهاية الكتابة…

ونعمل بقى مراجعة بسيطة على النقط الأساسية

ال ٣ عادات الأولى دول, تركيزهم على تحسين عادات النجاح الداخلية لكل شخص فينا

“خليك مبادر وإيجابي”… ماتعلقش عدم نجاحك على شماعة الظروف… الناجحين هاينجحوا بنفس ظروك وتحدياتك
, و “ إبدأ والنهاية في ذهنك”…. أكتب قصة حياتك, و إرسم نهايتها هاتكون ازاي … وعيش حياتك بالطريقة اللي تحقق النهاية اللي انت عاوزها
, و “رتب أولوياتك”… رتب أولويات حياتك, وعيش حيات, بناء على الأولويات دي

وال ٣ عادات اللي بعدهم: بتركز على تحسين العلاقات الخارجية والإجتماعية مع الآخرين
“فكر بطريقة المكسب المشترك”… الحياة مش دايما تنافس… الحياة نجاح مشترك
“حاول انك تفهم أولا, قبل أن يفهمك الآخرون”… حط نفسك مكان الشخص اللي قدامك, حاول تفهم هما بيفكروا ازاي, علشان تقدر تخليهم يفهموك
“التعاون الإبداعي”: النجاح الناتج من فريق عمل مبدع, أكبر من مجموع نجاحات كل الأشخاص منفردين

العادة الآخيرة, “سن منشارك”… أهم استثمار, تستثمرة بنفسك, في نفسك… إنك ماتوقفش تعليم أبدا

===========
ده كان أول كتاب من سلسلة, مكتبة أسلوب

اكتبلنا اقتراحتك للكتب اللي جاية, وشاركنا برأيك في كومنت

إعمل شير للحلقة, ساعدنا في نشر العلم ده لناس كتير جدا محتاجاه
وإعمل منشن لأصحابك اللي تحب انهم يستفادوا معاك

هاتلاقوا الحلقة مكتوبة بالكامل على موقع أسلوب.كوم
وكمان هاتلاقوها مكتوبة بالكامل على أبليكيشنز أسلوب للأيفون والأندرويد

إعمل سابسكرايب لقناة أسلوب, علشان توصلك حلقاتنا قبل أي حد
شير كمان مرة… خليك كريم

http://bit.ly/osloop-lib-01-7habits-video