أهلا بيكم في الحلقة رقم ٢٩ من برنامج أسلوب في دقيقة … اللي بنجاوب فيه على الأسئلة اللي بتوصلنا في كومنتس, والله عمرها ما بتكون دقيقة أبدا أبدا أبدا

سؤال النهاردة بإختصار شديد ومن الآخر:

أنا زهقان وطهقان من المذاكرة … أعمل إيه علشان أذاكر …. مستقبلي يا جودعان

بص بقى يا كبير

إنت جيتلي في حتتي

بجد يعني… إنت جيتلي في الحتة بتاعتي

المذاكرة وذكريات المذاكرة الفعالة دي بقى يا كبير…. بتاعتي أنا

تعالى بقى كده… وهات ودنك معاك, وما أشوفكش بتدعبس في الفيديوهات اللي تحت دي علشان تشوف هاتهرب من الحلقة فين

آخرك معايا في التشتيت إنك تضغط على زرار الايك الجميل اللي تحت ده… وتقوم تجيب ورقة وقلم وتيجي زي الشطور كده تكتب الكلام اللي جاي ده, علشان يدخل جوه جمجمتك المدورة دي

خلاص؟ جاهز؟

معاك ورقة وقلم؟

خلصت فرك وحركة؟

ضغطت لايك؟

يالا نبدأ

إنت زهقان من المذاكرة

وده مفيش منه أي مشكلة خالص… بالعكس… دي أجمل حاجة قولتلي عليها النهاردة … لأنك هاتخرج من الحلقة النهاردة تاكل الكتب بتاعتك أكل

وهاترجع تتفرج عليها مرة تانية كل لما تزهق

ما هي المفاجئة بقى… هي إنك هاتتشجع شوية… وهاترجع تزهق تاني

وهي دي أجمل حاجة في الموضوع… وهي دي أجمل حاجة في حلقة النهاردة.

بص بقى يا كبير… في علاجات كتيرة أوي لموضوع الزهق من المذاكرة ده… وإنت حسب الموود اللي إنت فيه… تنفذ واحد منهم… كل مرة علاج منهم هاينفع… واللي ماينفعش معاك… دوس في العلاج اللي بعده على طول يا كبير

العلاج الأول للزهق من المذاكرة: إنك يكون عندك حافز وهدف من وراء النجاح اللي إنت عاوزه… وتفكر نفسك بالهدف ده وتكتبه على ورقة كبيرة وتعلقه على الحيطة في أوضتك… يكون لك هدف جميل وكبير

العلاج التاني للزهق من المذاكرة: إنك تحول وقت المذاكرة لوقت ممتع وتخلي المذاكرة لعبة مسلية… بحيث تستمتع بالعمل نفسه من غير ما تكون بتجبر نفسك علشان النتيجة…. وطبعا إحنا عندنا حلقة كاملة بتتكلم على إنك إزاي تخلي المذاكرة وقت ممتع ولعبة مسلية… الحلقة الأولى من أفكار أسلوب … والحلقة إتشافت على يوتيوب أكتر من ٢ مليون مرة لغاية دلوقتي

شوفها بقى إنت كمان… وحول وقت مذاكرتك لوقت ممتع

العلاج التالت للزهق من المذاكرة: إنت تشد نفسك من قفاك الجميل ده, وتقعد نفسك غصب عنك وتدي نفسك بال…. بال … بال بتاع على دماغك علشان تقعد تعمل الشغل اللي وراك زي البتاع … غصب عنك

مش دايما الأهداف ولا التشجيع ولا الوقت الممتع هو اللي هايخليك تعمل الشغل اللي وراك… لازم من فترة للتانية كده تشد نفسك من قفاك الجميل والكبير والمسطح ده… وتقعد نفسك غصب عنك

لازم موضوع غصب عنك ده والله… مش دايما… بس من وقت للتاني كده لازم تقول نفسك … كفاية دلع ومروقة بقى… شوية رجولة إنت و هي الله يخليك.

طيب اللي فات ده كل كان طرق علاجات مهمة…. بس في حاجات كلها ضرر… مش علاج

طيب إيه اللي مش العلاج؟

اللي مش علاج: هو إنك تهرب من الشغل والمذاكرة اللي وراك… ده هايشدك ورا أكيد…. مش محتاجنا نقولك دي… إنت شاطر وعارفها لواحدك

اللي مش علاج كمان: هو إنك تفتح فايسبوك أو انستاجرام أو ألعاب أو تليفيزيون وتضيع وقتك عليه… دا مش بس هايضيع وقتك, ده كمان هايخليك تتحسر على وقتك اللي ضاع بعدها

اللي مش علاج كمان: هو إنك تقول هابدأ بكرة

اللي مش علاج كمان: هو إنك تعلق دلعك ده على أي شماعة فشل مهما حصل

من الآخر كده يا صديقي الصدوق

من الآخر… يا … صديقي… الصدوق

يا صديقي الصدوق… من الآخر كده

في كذا حل علشان تقوم وتهز طولك الجميل ده, ووسطك الرشيق ده… وتقوم تذاكر وتعمل الشغل اللي وراك

سعات ها تحتاج تحبب نفسك في المذاكرة… وسعات هاتحتاج تدي نفسك قلمين وتقوم تذاكر

وسعات هاتحتاج تضغط على نفسك وسعات هاتحتاج تاخد راحة وتبدأ تاني

وفي حاجات تانية كلها مش حلول… زي مثلا إنك لسه مشرفنا وقاعد لغاية دلوقتي وماروحتش تذاكر

يرضيك كده طيب؟

يعني يرضيك إنت كده؟

بأمانة طيب.. قول إنت من نفسك… يرضيك؟

يرضيك؟

إنت وراك مذاكرة… وبتشوف حاجة تشجعك على المذاكرة… ولسه قاعد

يرضيك؟

يرضيك؟؟؟

روح إلااهي ربنا يرضيك… ذاااااااااااااااكر …. ذاااااكر ذاكر

إكتبلي في كومنت دلوقتي … هاتقوم تذاكر وتعمل الشغل اللي وراك… ولا إيه نظامك

ولايك بقى للفيديو… وبلاش الحركات النص كم دي

سلااااااام