أهلا بيكم في الحلقة رقم 15 من برنامج أسلوب في رمضان

وحلقة بعنوان: تأمرون بالمعروف… وتنهون عن المنكر

بسم الله الرحمن الرحيم:

كنتم خير أمة أخرجت للناس

تأمرون بالمعروف

وتنهون عن المنكر

بسسسسس كده… الموضوع بسيط جدا

عندي وعندك أمر… بالأمر بالمعروف… وأكيد أكيد أكيد أولى من الأمر بالمعروف… عمل المعروف … ونشر المعروف

عندي وعندك أمر… بالنهي عن المنكر… ماينفعش نسيب منكر ماننهيش عنه…. وأكيد أكيد أكيد أولى بكتييير من النهي عن المنكر… الكف عن فعل المنكر

عندنا وعندك أمر لنشر الخير في الحياة

وأمر بالكف عن نشر الشر في الحياة

أنا وإنت… مش جايين الحياة دي, علشان نستنى حد يجي من بره… يغير لنا حياتنا بعصايا سحرية

أو إن أنا وإنت… ننتظر إن شخص تاني… هو دايما اللي ينشر الخير… وإحنا نقعد كده ندعيله وخلاص

أنا وإنت… مطلوب مننا … إن إحنا نقوم ناخد خطوات حقيقية … نحو النجاح … ونشر الخير… والأمر بالخير… والنهي عن الشر

مطلب مني ومنك, لما نعرف حاجة فيها خير… ندل الناس عليها… حاجات بسيطة مش كبيرة

زي إنك تدل أصحابك على طريقة كويسة يتعلموا بيها حاجة معينة

وإنك تشجع أصحابك دايما على الرياضة والإنتاجية والإيجابية

و إنك كمان تشارك الحاجات اللي إتعلمتها وفيها خير, لأصحابك وللناس اللي بتهمك

وأكيد إنت عارف, إن الناس اللي دايما بتعمل نفسها ناصحة, وبتفضل تخبي كل حاجة تعرفها وتتعلمها… بيكونوا مكروهين جدا من الناس كلها, وكمان بيبنوا من نفسهم مسخ دميم بجد… وللأسف… هما اللي بيعيشوا مع المسخ الدميم ده… لأن مفيش حد بيحب يحاوط نفسه بالناس اللي بتفكر في نفسها

وأكيد إنت بتشوف ناس كتيرة من اللي بيمشوا يقولوا:

أنا مش هاعمل خير في حد تاني, لأني لما بعمل خير في الناس مابلاقيش من الناس غير الخبث والشر والأر والكر والفر

والناس الجميلة اللي ماشية بنظرية: أنا مش هاسأل عليه وهو مريض… لأنه ماسألش عليا لما كنت مريض أنا كمان

أنا مش هاباركلها على خطوبتها… أصل هيا ماباركتش لبنت عمة سعاد… لما نجحت في إمتحان البروبرؤلأيكوفينلييين… هو يعني إيه “إمتحان”

أنا مش هاقول لحد خالص إن حددت ميعاد فرحي… علشان الناس كلها شر وحسد … (هايحسدوك على إيه يعني يا مثبتهم…  نفسي أفهم)

أكيد… إحنا وإنت… أووول لما بنسمع الناس دي بتتكلم… و من أوووول كلمة بيقولوها… بنقول… يالهوي… هو إنت منهم… طيب إخلعوا بقى… إنتوا الناس بيهربوا منكم علشان أفكاركم السلبية دي… مش علشان بتعملوا خير… مفيش حد بيفكر بالطريقة دي… بيجي منه أيييي خير

حتى يا سيدي لو عملت خير في حياتك مرة… ورجع لك حاجة غير الخير

هايكون أجرك وثوابك عند ربنا… أفضل مليييييون مرة من إنك تنتظر الخير يترد لك من إنسان غلبان زيك

والجزء التاني بقى… إنك لما تشوف حاجة غلط بتتعمل… لازم تنكرها

لو الحاجة الغلط دي إنت اللي بتعملها… يبقى تمنعها بإيدك… بإنك توقف الحاجة الغلط

ولو الحاجة الغلط دي, حد تاني بيعملها… وإنت في مكانة وعلم يسمحوا ليك بإنك تنصحوا بطريقة ذكية وحبوبة… يبقى تنصحوا… بس إوعى تكون من الناس اللي لو نصح حد في حاجة… بيكرهوا في الحاجة الصح!!!!

أو على الأقل… تكلم نفسك جوه نفسك لما تشوف حاجة غلط… وتعرف نفسك إنها حاجة غلط…. ماتخليش حاجة غلط تعدي أدامك من غير ماتنكرها… حتى لو بقلبك … وده أضعف الإيمان

إحنا وإنت… مأمورين بإننا:

ننشر الخير ونعمل الخير… وننهى عن الشر… وأكيد ما نعملوش

شد بقى كراسة #أسلوب في #رمضان بتاعتك 

وإكتب الواجب بتاع النهاردة

– إكتب إيه أول حاجة خير ممكن تعملها وتوصلها لحد… وإعملها

– إكتب إيه أول حاجة إنت عارف إنها مش خير بتعملها… ووقف عملها حالا

إستنى… رايح فييين… إعمل بقى خير يا حبوب… وإنشر الخير… وإعمل شير للحلقة دي بكل طرق الشير الجميلة اللي عندك

فايسبوك وجوجل بلس و واتس آب وتويتر … وأي زرار تلاقيه عندك بيعمل شير… حتى لو ماتعرفش هو بيودي على فين

ورمضان… كرييييييم

شير في الخيير… ورمضاااان كريييييم 

نزل أسلوب على ‫#‏موبايلك‬ ‫#‏الأندرويد‬ من هنا:
http://bit.ly/osloop-android
وأسلوب ‫#‏أيفون‬ من هنا:
http://bit.ly/osloop-iOS-eg
وده, ‫#‏موقع‬ أسلوب:
http://www.osloop.com
وده أسلوب على فايسبوك:
https://www.facebook.com/osloop.life/
وده أسلوب على انستاجرام:
https://www.instagram.com/osloop.life/
وأكيد أسلوب على تويتر:
https://twitter.com/OsloopLife