حلقة رقم 1: الإستعداد التنيني لرمضان – كيف نستقبل شهر رمضان أسلوب في رمضان ٢٠١٦  osloop ramadan 2016

 

أهلا بيكم… وليلة رمضان… الحمد لله الذي بلغنا رمضان
دي حلقة الإستعداد والتشمير لرمضان… والحلقة رقم 1 من برنامج: أسلوب في رمضان … وحلقة بعنوان… الإستعداد التنيني رمضان

إحنا بدأنا مع بعض في أسلوب مشوار نجاح مهم في حياتنا كلنا, وعملنا حلقات تغير حياتنا كلنا… طلاب وموظفين وناس لسه بتبدأ رحلة نجاحها والأمهات اللي بيديروا بيت وأسرة… وكل واحد عاوز ينجح في حياته

وأكيد أكيد أكيد لازم نكون مع بعض كلنا في رحلة تغيير حياتنا كلها في رمضان السنة دي إن شاء الله… رمضان جديد… فرصتنا كلنا علشان نغير حياتنا بجد

ربنا بيورينا عمليا أد إيه إحنا ممكن نتغير في يوم واحد من أول لما نبدأ نصوم
مفيش وقت في السنة كلها بنكتشف فيه أد إيه إحنا عندنا قدرات جبارة جدا زي رمضان
مفيش وقت في السنة كلها بنقعد ١٦ ساعة وساعات أكتر من كده… من غير أكل ولا شرب عبادة لله وطاعة لله
وبنكررررر الموضوع ده ٣٠ يوم في الشهر… مفيش واحد فينا فيه ذرة خير مهما كانت عزيمته ضعيفة بيسيب يوم من غير صيام (غير أصحاب الأعذار طبعا)… يعني أكتر واحد فينا بيبقى فاكر إنه ماعندوش طاقة وقدرة على النجاح والإجتهاد… بيعمل حاجات مايقدرش أقوى الناس عزيمة في الدنيا تعملها

من كام يوم بس ما كناش قادرين نمشي على نظام ريجيم… فيه أكل وشرب عادي… وكنا بنكسره بعد أول نص ساعة
والنهاردة وإحنا صايمين …. ماعندناش إختيار ولا أوبشن أصلا… قوة إرادة حقيقية في الإنسان يعجز عن وصفها أكثر الناس دراسة لل willpower أو قوة الإرادة

النجاح في الحياة كلها عبارة عن بناء عادات, بتكون صعبة جدا جدا في الأول… وبعدين بتبقى أسهل يوم بعد يوم… ولما تعدي أسبوعين … بيكون خلاص الجسم والعقل إتعود… وبيكمل حياته على طريقة الطيار الآلي

رمضان والصيام بجد, أجمل هدية من ربنا لينا كلنا….
غير الثواب المضاعف… وحلاوة العبادة … والدعاء المستجاب… والفرصة اللي بجد مش ممكن تتعوض طول العمر
إنما كمان ربنا بيورينا من نفسنا عزم وقوة وإجتهاد وكسر لكل العادات القديمة وبداية جديدة

ملايين من الناس كان رمضان بالنسبة لها هو نقطة التغيير بجد
ربنا بيورينا من نفسنا كلنا إن إحنا ممكن نتغير في لحظة واحدة وبدون أي دواء سحري
– الناس اللي كانت بتمشي على سطر وتسيب سطر في الصلاة… بيكونوا أكثر الناس إلتزاما في الصلاة في رمضان… والشباب ماشاء الله تلاقيهم ملتزمين في المسجد
– المصحف اللي ماكنش بيتمسك… دلوقتي صديق لنا في الموصلات وفي أوقات الإنتظار وفي القيام والقراءة… وحلاوة ولذة في القلب
– الناس اللي مدمنين قهوة زي حياتي والناس اللي ربنا يعافينا كلنا بتدخن… ماشاء الله ١٦ ساعة وأكتر صيام…. قوة إرادة وتغيير ربنا بيورينا من نفسنا قوة وطاقة… تكون شاهدة علينا بعد كده طول حياتنا… إن ملناش حجة, ماعندناش ضعف ولا حاجة… محتاجين بس الإجتهاد والدعاء والتوفيق من ربنا إن إحنا نستمر على الإلتزام والخير طووووول العمر

إحنا في أسلوب معاكم كل يوم في رمضان السنة دي إن شاء الله, بحلقة جديدة يوميا الساعة ٨ مساءا (تمانية…. تمانية ونص يعني)…. نشجع بيها نفسنا ونحط أجمل خطط لحياتنا كلها في رمضان… رمضان السنة دي… أجمل رمضان في حياتنا كلنا إن شاء الله
الناس اللي بتسأل هي الساعة ٨ بتوقيت بلد إيه…. هي إن شاء الله تكون موجودة الساعة ٨ بتوقيت لندن… ولو ملحقناش يبقى الساعة ٨ بتوقيت إسلام أبدا… ولو ملحقناش يبقى الساعة ٨ بتوقيت مصر…

إنما بقى لو ملحقناش يبقى الساعة ٨ بتوقتي السعودية…
طب إفرض إفرض إفرض ملحقناش؟ يبقى الساعة ٨ بتوقيت الإمارات
… بص… ماتشيلش هم الشكليات دي كلها… إحنا مواعدينا مظبوطة… إنتظرنا إنت بس الساعة ٨… ٨ … ٨ ونص يعني… وإن شاء الله تلاقينا طالعين لك بنوتيفيكشن حلوة كده على موبايلك
بس إنت خليك حبوب وإعمل سابسكرايب لقناة أسلوب على يوتيوب علشان الحلقات الجديدة توصلك
ولو بقى كنت صديق تنين لأسلوب, وعاوز الرسايل التشجيعية المملة اللي إحنا بنبعتها كل يوم دي… يبقى تنزل برنامج أسلوب للأيفون والأندرويد على موبايلك الجميل.

هاتعملنا إيه يعني يا عم أسلوب بشعرك المنكوش ده في رمضان؟

إحنا عندنا إن شاء الله خطة نشجع بيها بعضنا كلنا على أجمل رمضان في حياتنا كلنا
مش ناسسيين الأمهات اللي بتجتهد في إدارة بيتها في الحر والصيام طول الشهر
ومش ناسييين الطلاب اللي لسه عندهم إمتحانات ومذاكرة مع الصيام
ومش ناسسين الناس اللي بتشتغل وبتجتهد مع الصيام
ومش ناسيين الناس اللي بتنام طول النهار وتفضل تاكل طول الليل… أيوة… إحنا جاينلك إنت بالذات يا كبير… ماتجيب حتة كنافة الأول
وأكيد أكيد أكيد مش ناسيين الناس اللي ناسينا
ولا ناسيين الناس اللي ناسيين إنهم ناسينا
ومش ناسيين الناس اللي….إممممم… أقولك… ندخل في الموضوع أحسن

تعالى إنت بس بكرة إن شاء الله في نفس الوقت … وهات في إيدك وإنت جاي… قلمك الجميل و كراسة مخصوص علشان حلقات أسلوب في رمضان…

هايكون عندنا كل يوم إن شاء الله حلقة تشجيعية مهمة جدا جدا … و واجب عملي يومي… نغير بيه حياتنا كلنا

ونبدأ بواجب النهاردة
١- لازم تكتب واجب كل يوم في كراسة مخصوص لأسلوب… وقف الحلقة دي دلوقتي وروح هات ورقة بسرعة وإكتب فيها, … وبالليل كده وإنت نازل تشتري زبادي, تجيب كراسة ٣٠ ورقة علشان أسلوب في رمضان
٢- تدور على أجمل برنامج ديني بتحبه لأكتر داعية بتحبه, وتكتب ميعاده وتلتزم بيه يوميا… ويفضل طبعا يكون على يوتيوب علشان ما تعيش حياتك كلها تتفرج على الإعلانات اللي في التليفيزيون
…. عندك مئات الناس اللي بتعمل حلقات جميل جدا… طبعا إحنا ماينفعش نقول أسامي علشان مانبقاش بنعمل إعلانات وعلشان ما ننساش إسم حد والناس تزعل مننا
يعني مش هانقول على
الأستاذ الراقي الجميل: أحمد الشقيري
و ولا على د. طارق السويدان
و د. عائض القرني
ود. محمد العريفي
ود. عمر عبد الكافي
ود. عمرو خالد
وأستاذ مصطفى حسني
و د. سلمان العودة
والشيخ نبيل العوضي
والشيخ محمود المصري
والشيخ مشاري الخراز

وغيرهم وغيرهم كتييير جدا….
بس إحنا أكيد مش هانقول على الأسامي… علشان إحنا: ملناااااش دعوة بيييييهممممم

خلاص… جيبت ورقة وقلم وكتبت الواجب بتاعك
إكتبلنا بقى في كومنت, إنت هاتتابع مين في رمضان
وإيه المواضيع اللي تحب نناقشها في حلقاتنا اللي جاية إن شاء الله
ماتنساش… بكرة إن شاء الله … الساعة ٨… ٨ … ٨ ونص يعني
وإعمل خير في رمضان يا آخي وإعمل شيرررر… لا تخشى على إصبح الچميل من الشير والمنشن أيها الحبوب الچميل

سلااااام التنين

[soundcloud url=”https://api.soundcloud.com/tracks/267657265?secret_token=s-hE4Oy” params=”auto_play=false&hide_related=false&show_comments=true&show_user=true&show_reposts=false&visual=true” width=”100%” height=”450″ iframe=”true” /]