ازاى تكون  سعيد؟

   و هل السعادة لما تتحقق و نوصل لها بتكون سعادة أبدية و لا مؤقتة؟

أسئلة كتيرة بيتجيلنا حوالين موضوع السعادة…

مفهوم السعادة اكيد مفهوم نسبي بيختلف من شخص للتاني، فيه ناس بتلاقي سعادتها فى الفلوس، الأسرة، الصحة، الرياضة، الأصدقاء، السفر و حاجات تانية بنربط بيها سعادتنا و لكن للاسف اوقات الحاجات اللي يسعدنا بتروح و شعورنا بالحزن بيكون كبير أوى أوى لما بنفقد الحاجة اللى بتخلينا نحس بالسعادة…

نستنتج من كده أن السعادة ما ينفعش نربطها بشيء معين أو شخص معين، و يفضل السؤال قائم ازاى أكون سعيد؟ ازاي احقق السعادة

هتوصل للسعادة لما تتصالح مع نفسك و تكون متسامح معاها بمعني انك متشيلش من حد ولا حد ياخد من تفكيرك حيز أكبر من حجمه، للأسف كل ما اهتمامنا يزيد بغيرنا كل ما بنفقد الاحساس بالسعادة ….. كل ما زاد تركيزك و انشغالك بأن فلان عمل كذا،  و فلان قالى كذا، و فلان كان قصده كذا…. و تقعد تحلل و تفكر و تنسج قصص من الخيال كمان ….كل ما بنبعد خطوات كبيرة عن أننا نكون سعداء…

ده غير طبعا التصرفات اللى انت بتعملها و عارف كويس أنها مش صح، وعارف أنها بتأذيك، و رغم كده مكمل….ده غير أنك ماشى فى الدنيا تايه ….لا ليك هدف ولا بتشتغل على نفسك يعنى مأنتخ كده فى مكانك…و مستني الفرج يجيلك لحد عندك..

السعادة هتتحقق لما تشتغل على نفسك و تبقى قدام نفسك شخصية تعرف تحترمها، تعرف تحبها، تعرف تتقبلها…

وخلي قلبك أبيض، اللى يضايقك اعذره و افتكرله أى حاجة حلوة عملها، و لو ملاقتش اي حسنة ليه افتكر ان ده هيتحط فى ميزان حسناتك، وفعلا هتلاقى نفسك مرة بعد مرة مش هتركز معاه و لا هتهتم، أنت فى حياتك حاجات أهم تركز عليها غير الناس و تصرفاتهم.

وقف اى حاجة غلط انت بتعملها، وقف أى حاجة معطلاك أنك تكون شخص ناجح، وقف أى حاجة بتقلل من أخلاقك قدام نفسك و قدام الناس

قعد و فكر انت عايز ايه؟ عايز توصل لإيه؟ ايه هدفك؟
لو أنت طالب ركز فى دراستك و اجتهد و اسعى أنك تجيب مجموع كبير ليه لأ؟ و بلاش تتحجج أصل التعليم بايظ، أصل كله حفظ، طيب ليه مفكرتش أن ده تحدى ليك أنت بتثبت به لنفسك أنك مفيش حاجة صعبة عليك أون ما فيش حاجة هتقف فى طريقك

ركز فى شغلك و خليك متميز و اوعي تتحجج أن محدش بيقدرك اوبيهم بيك، مافيش حد بيجتهد غير لما بينجح…ما فيش حد بيزرع غير لما يحصد… وطور من نفسك و اتعلم علشان متملش و متستسلمش للروتين.

طب هل فعلا لو وصلنا ده السعادة هتستمر، عايز الصراحة ولا …أكيد الصراحة طبعا، بص يا سيدى احنا بشر و النفس أمارة بالسوء، للأسف احنا ممكن نوصل لقمة التسامح و فجأة هوووووووب ترجع تانى تقع، وده طبيعى ده سنة الحياة يوم ليك و يوم عليك، بس الشاطر بقى اللى عارف و فاهم أن ده طبيعى و انه هيرجع تانى، بس السعيد هو اللى بيقوم بسرعة و ما يستسلمش بسه   ولة و يعافر و يرجع تانى من جديد .

هى ده الحياة نقوم نقع و نقوم، نتبسط حبة، نزعل حبة، المهم نكون مدركين أنها دنيا و فانية و ان مفيش وقت أنك تعاتب و لا تشيل من حد ، عيش حياتك….عيشها صح ….عيشها فى النور مش مستخبي من حاجة فى الظلمة…..مش خجلان من حاجة غلط بتعملها….عيش حياتك و انت رافع راسك….و السعي انك تكون قدوة فى الخير لغيرك، لأن دي الحاجة اللي هتبقي ليك…عيش مرفوع الرأس….عيش متسامح مع نفسك.