التوتر والقلق أثناء فترة الإمتحانات

ياريتني كنت ذاكرت من أول السنة… إهيء إهيء إهيء (بكاء)… خلاص يا سيد

أهلا بيكم ومرحبا في أجمل أيام التوتر والضغط العصبي والنفسي والأبوي والحلزوني

حلقة رقم ١٧ من برنامج أسلوب في دقيقة و حلقة خاصة جدا جدا عن التوتر والقلق أيام الإمتحانات… بس مش دقيقة خالص… إحنا هانعيش مع بعض النهاردة

إحنا تركيزنا الحلقة دي كلها هو القضاء على التوتر والقلق اللي في فترة الإمتحانات… ومش هانتكلم عن المذاكرة أو طرق المراجعة أو حتى طريقة عمل الفراخ البانيه اللي محشية نوتيلا وكبد وقوانص خالص… إحنا عملنا حلقات كتيرة جدا عن الحاجات دي… هانحط الروابط بتاعتها في الديسكريبشن تحت الفيديو على قناة أسلوب على يوتيوب.

أيام الإمتحانات… ياريتني كنت ذاكرت من أول السنة… ياريتني كنت معاهم… إهيء إهيء إهيء… خلاص يا سيد

النهاردة إحنا هانتكلم عن حاجة مهمة جدا جدا جدا… التوتر والضغط العصبي والنفسي أيام الإمتحانات

وللأسف… التوتر و الضغط العصبي والنفسي والحلزوني ده… مش بيجي للطلبة اللي مضيعين طول السنة بس… لأه ده بيجي كمان لأشطر الطلاب وأكثرهم إلتزاما طول السنة… وبتبقى بعيد عنك كارثة … لو التوتر والقلق ده جه لأحد الأباء وأولياء الأمور كمان… دي تبقى فل أوي… إهيء إهيء إهيء(بكاء)

خلصنا يا عم أسلوب… نعمل إيه؟؟؟… هانضيع يا ودييييييع

خلينا نتكلم من موضوع التوتر والقلق ده من ناحيتين…

من ناحية المميزات… علشان نوظفها ونستفيد منها

ومن ناحية العيوب… علشان نتجنب العيوب

التوتر والقلق ده …نعمة من نعم ربنا علينا كلنا…

وخصوصا على الطلاب قبل الإمتحانات…

بتدي الواحد الطاقة والدافع والإجبار إنه يقوم بقى ويذاكر ويتعلم…

يعني محفز مجاني… ولا تقولي حلقات أسلوب ولا حلقات التنين… محفز داخلي

جميل أوي… أقفل أنا الحلقة دي دلوقتي وأروح أتوتر يعني ولا أعمل إيه؟

إستنى بس يا كبير… هانتوتر كلنا أهو… لما تلاقينا وقفنا رسم… إبقى إتوتر براحتك.

الجزء السلبي بقى من التوتر والقلق ده لما يزيد عن الحد المعقول… إنه بيشل تفكير الواحد

حتى لو مذاكر المنهج كله…

التوتر والقلق هايقلل من قدرتك على إسترجاع المعلومات وهايدمرلك أي خطط مذاكرة ومراجعة تعملها

توتر حاجة قليلة جدا… مفيد جدا

بس أي توتر أكتر من القليل… يبقى كارثة

وإحنا تركيزنا كله الحلقة دي, إن إحنا نساعد بعض إن إحنا نشيل التوتر والقلق خالص بجد… علشان أي خطة مذاكرة أو مراجعة تعملها… تبقى فعلا فعالة وقوية وتجيب أفضل نتيجة لها.

إحنا بنتوتر وبنقلق ليه طيب؟ عندنا ٤ أسباب مهمين جدا هانتكلم عنهم النهاردة… ونقضي عليهم مع بعض إن شاء الله:

١-السبب الأول: الخوف من المجهول… خايفين من الإمتحانات لأننا مش عارفين إيه اللي هايجي فيها وإيه الأسئلة وهايحصل إيه بالظبط…  

وده النوع اللي بيجي لمعظم الناس حتى المجتهدين

٢-السبب التاني: الخوف والقلق إنك ما تقدرش تخلص مذاكرة أو مراجعة…. وده بيجي للطلبة أصحاب المجهود المتوسط… والطلبة بتوع “ياريتني ذاكرت من أول السنة”

٣-السبب التالت: الخوف من النتيجة تطلع وحشة والمستقبل اللي هايضيع … دا طبعا غير اللي الحاج هايعمله فيك بعد النتيجة… والنوع ده بيجي لطلبة كتير عموما… ولأولياء الأمور خصوصا (صوت تخيييين)

٤- السبب الرابع: بقى… هو الندم على الوقت اللي ضاع من أول السنة… ياريتني كنت ذاكرت من أول السنة… ياريتني كنت معاهم… عملوها الوحوش

شكرا يا أسلوب… عرفنا أسباب التوتر والقلق… والرسم لسه شغال… إيه؟ 

تعالوا بقى نرجع كده بالعكس… ونقتل أسباب التوتر دول 

السبب الرابع: الندم على الوقت اللي مذاكرناش فيه

-> تعالى نتفق مع بعض أهم إتفاق وأجمل حاجة هاتطلع بيها من الحلقة دي خالص.

نحب نقولك… كل تضييع الوقت اللي فات… وكل الفرص اللي فاتت دي ماتفرقش معانا في حاجة خالص… إحنا هانبدأ مع بعض بداية جديدة خالص… حتى لو ماتعرفش إسم المادة والإمتحان ماعدش عليه أي حاجة… كده ولا كده… هانبدأ بداية جديد

إنت بجد… اللحظة دي… إنسان جديد

أي حاجة عدت من حياتك قبل كده… خلاص… مش إنت… دا كان إنت قبل ما تسمع الحلقة دي

إنت واحد جديد خالص

مالكش دعوة بالشخص اللي كان بيضيع وقت قبل الحلقة دي

ومالكش دعوة بالشخص اللي كان بيعمل حاجات مش كويسة بسبب الضغط العصبي والنفسي اللي عليه

ومالكش دعوة بالشخص اللي قصر في مذاكرته وإلتزاماته وعباداته وروحانياته قبل كده

إنت إنسان جديد خالص دلوقتي حالا… خلاص؟ لو موافق نبتدي مع بعض من الصفر… يبقى إنسى كل اللي فات… ونبدأ مع بعض من الصفر… ونشوف السبب اللي قبله للتوتر

السبب التالت: الخوف من النتيجة وتوتر الأباء

لو إنت طالب… الخوف من النتيجة والتفكير في المستقبل مش هايفيدك بأي حاجة خالص

حتى لو النتيجة هاتطلع أوحش حاجة في الدنيا… دي لسه حاجة في علم الغيب… تقلق نفسك بيها ليه دلوقتي؟ تشيل همها ليه؟… عيش اللحظة اللي إنت فيها دلوقتي حالا بس… وإعمل اللي عليك من الإجتهاد في المذاكرة وتنظيم الوقت… وإوعى تفكر ولو لحظة واحدة بس في المستقبل… وده نفسه أول مبدأ إتكلم عليه “دايل كارنيجي” في كتاب من أشهر الكتب على الإطلاق في محاربة القلق 

live in day-tight compartments

يعني.. عيش يومك في يومك بس… مالكش دعوة بالماضي خالص… وماتشيلش هم المستقبل

مطلوب منك إنك تكون ذكي… وتعيش اللحظة دي بس… وتعمل أفضل حاجة تقدر تعملها في اللحظة دي. 

ولو إنت أب.. أو ولي أمر… فا بالله عليك… إحتفظ بتوترك ده لنفسك في الوقت الحالي ومثل إنك إنسان طبيعي… لأنه لو التوتر إتنقل بصورة مضرة للأبناء وللبيت… يبقى إنت اللي هاتصعب الموضوع على أبنائك

السبب التاني: خايف ما أقدرش أخلص المادة مراجعة

ماتخافش ولا تتوتر خالص… الخوف والتوتر مش هايساعدوك في أي حاجة.

كده أو كده عندك وقت محدد متبقي… ولازم تخطط له صح… إرجع بقى للحلقة رقم ١٤ والحلقة رقم ٢ من برنامج أسلوب في دقيقة… هاتلاقي الإجابة بتاعة السؤال ده موجودة بالتفصيل في الحلقتين… مرة تانية هاتلاقي روابط الحلقات في الديسكريبشن تحت الفيديو

السبب الأول: الخوف من المجهول

ليك حق تخاف من المجهول لو تحب

بس الإمتحان ده مش مجهول خالص.. إنت بس اللي فاكر إنه مجهول

لو إنت طالب في مرحلة ما قبل الجامعة… المدرسين اللي بيحطوا الإمتحانات بيكونوا مقيدين جدا جدا في حرية وضع الأسئلة, ودايما بيحطوا أسئلة موجودة في كل الكتيبات اللي بيكون فيها الأسئلة المتوقعة للإمتحانات… والأسئلة اللي بتنزل في الكتب الرسمية… يعني مش مجهول خالص

ولو إنت طالب في مرحلة الجامعة… فا إعرف إن وضع أسئلة الإمتحانات دي… حاجة فعلا بتجيب قلق لكل الدكاترة… علشان لازم يحطوا أسئلة صح ونتائجها وحلولها صح… فغالبا بيجيبوا أسئلة من محاضراتهم وإختباراتهم السابقة

وفي جميع الأحوال… كل المواد الدراسية في كل البلاد, وكل السنوات الدراسية, بيكون فيه مدرسين ومعيدين محضرين لها ملازم مراجعة وملازم مذاكرة وملازم للأسئلة… إلتزم بأفضل مصدر للملازم دي… وبكده يكون مفيش مجهول

(فقرة ختامية)

من الآخر …. مفيش أي سبب أو فايدة من التوتر… 

إنت إنسان جديد… هاتبدأ بداية جديدة خالص مهما كنت متأخر

إتفرج على الحلقات رقم ١٤ ورقم ٢ من برنامج أسلوب في دقيقة

ساعدنا في توصيل الحلقة دي لكل الطلبة اللي عندهم إمتحانات… وإشترك في قناة أسلوب على يوتيوب وإعمل لايك وشير

وأكيد إستعين بالله وإدعي بيقين إن ربنا يرزقك الهدوء والسكينة والبركة في الوقت والمجهود

وإقفل البتاع ده… وقوم ذاااااااكر…. إهيء إهيء إيه… ياريتني ذاكرت من أول السنة

إعمل متابعة\سابسكرايب لقناة أسلوب على يوتيوب, علشان توصلك حلقاتنا أول لما تنزل
http://bit.ly/osloop-sub
وكمان نزل برامج أسلوب للأيفون والأندرويد… علشان توصلك جميع حلقات أسلوب بالترتيب الصحيح
تطبيق أسلوب للأندرويد
http://bit.ly/osloop-android
تطبيق أسلوب للأيفون
http://bit.ly/osloop-iOS-eg
موقع أسلوب دوت كوم:
http://www.osloop.com
أسلوب على فايسبوك:
https://www.facebook.com/osloop.life/
أسلوب على انستاجرام:
https://www.instagram.com/osloop.life/

أسلوب على تويتر:

 

 


أسلوب في دقيقة 2:

أسلوب في دقيقة 14:

مذكرات طالبة مثالية:

 

 

 

 


 

الحلقة صوت فقط على ساوند كلاود: