الحلقة الثانية من برنامج – أسلوب في دقيقة – الإمتحانات كمان كام يوم… ياترى في أمل؟؟

الحلقة في ساوند كلاود:

أهلا بيكم في الحلقة الثانية من سلسلة: أسلوب في دقيقة
هانجاوب فيها على أكتر الأسئلة اللي بتجيلنا في الكومنتس على قناة أسلوب…في حدود دقيقة…
بس مانوعدكش إنها هاتكون دقيقة بالظبط…

سؤال متكرر بيجيلنا طول الوقت: … من أول أسبوع في الدراسة ولغاية ليلة الإمتحان

السؤال: لسه ٦ أسابيع على الإمتحانات… هل فيه أمل إني أعوض اللي فات؟

و ناس كتييييرة جدا تفضل تبعت لغاية ليلة الإمتحان

لسه ٤ أسابيع… لسه إسبوعين… لسه إسبوع… الإمتحان الصبح…

هل فيه أمل إني أذاكر وأعوض وألحق نفسي؟؟؟ طب أعمل إيه طيب أنا؟

إجابتنا على السؤال ده… مقسمة ل ٣ أجزاء

الجزء الأول: هو إنت مذاكرتك من أول السنة كانت إزاي؟
================
منتظم ومتفوق
ولا متوسط وبتعافر
ولا مضيعها… وجاي تتوب ليلة الإمتحان؟؟؟

كل واحد فينا بيكون له تحصيل مختلف طول السنة… بس أكيد أكيد كل ما تبدأ بدري… كل ما هاتريح نفسك كتيييير أوي… ووقت المذاكرة هايكون ممتع… بدل ما يكون عذاب
وياريت تستوعب معلومة مهمة جدا جدا… ألا وهي… المذاكرة طول السنة هدفها إن إنت تتعلم… … العلم جميل جدا والله… وإدمان كمان… بس للي يديله فرصته
فا لو إنت بتتفرج على الحلقة دي… وإحنا لسه أول السنة أو لسه مدة كافية على الإمتحانات… إبدأ من دلوقتي حالا… وإعمل في نفسك خدمة إنك تبدأ بدري
وشوف أول ٣ حلقات من برنامج أفكار أسلوب, لأنهم هايساعدوك جدا في المذاكرة وتنظيم الوقت ومقاومة الكسل إن شاء الله

الجزء التاني…. تعمل إيه؟
================
مهما كان الوقت المتبقي… مفيش غير حل واحد
إكتب إنت فاضلك أد إيه في كل مادة
وشوف الوقت اللي فاضل لغاية الإمتحانات… وإقسم المواد بتاعتك على الوقت اللي فاضل
و شوف إمتحانات السنين اللي فاتت في كل مادة قبل المذاكرة… هاتساعدك تحط تركيزك فين في المناهج
…. طبعا… أكيد لو فاضل وقت صغير جدا على الإمتحان… وإنت خاربها من أول السنة… يبقى هاتتسحل سحلة التنين الغلبان
لكن… مفيش إختيارات…. تنين تنين… إسحل نفسك دلوقتي… وخد قرار إنك تبدأ من أول الدراسة الترم اللي جاي….
وإحنا عارفين إن هو ده اللي إنت بتقوله أصلا في زنقة كل إمتحان :)… بس نقول إيه… الإنسان دعيييييف

الجزء التالت… اللي هو السؤال بقى نفسه… هل في أمل؟
================
السؤال ده فعلا عجيب… كأن حد بيعزمك على الإمتحان مثلا…

الموضوع ببساطة… هو في أمل؟… ولا فيييييه أمل؟
مفيش إختيارات أصلا… أكيد لما تبدأ دلوقتي حالا… وتذاكر أي حاجة… أفضل ميت مرة من وصلة الحزن اللي هاتعيشها لغاية الإمتحانات

وبعدين … مين فينا ما اتزنقش في مادة أو مادتين ليلة الإمتحان… بس موت نفسه وربنا أكرمه … دوس إنت بس… وربنا هايكرمك والله… بس اقفل كل حاجة بعد الحلقة دي وقوم شوف مصلحتك ربنا يكرمك

دي كانت تاني حلقة من حلقات “أسلوب في دقيقة”…
لو عندك سؤال عاوز تسمع إجابته في برنامج: أسلوب في دقيقة… إكتبه في كومنت
و ماتنساش تعمل منشن لأصحابك… وشير علشان كلنا نستفيد

الحلقة الأولى من أفكار أسلوب:

الحلقة الثانية من أفكار أسلوب:

الحلقة الثالثة من أفكار أسلوب:

osloop in a minute - episode 02 - slide 01

IMG_3411osloop in a minute - episode 02 - slide 02

osloop in a minute - episode 02 - slide 03

osloop in a minute - episode 02 - slide 04