الحلقة الثانية من برنامج أفكار أسلوب: ٦  خطوات لتنظيم وقتك – مقدمة عن إدارة وتنظيم الوقت

وقت الجد… الحلقة التانية من برنامج أفكار أسلوب
وحلقة بعنوان: ٦ خطوات لتنظيم وقتك – مقدمة عن إدارة وتنظيم الوقت

إوعى تكسل إنك تعمل شير… فيه ناس كتير أكيد هاتستفاد بسببك لما تشاركنا في رحلة نشر الأفكار الإيجابية .. إعمل شير

إكتبلنا في كومنت, تجربتك عن تنظيم وقتك, واقتراحاتك لتنظيم وادارة الوقت

=========================
الحلقة كتابة, علشان اللي النت بطيء عنده
——————-
أهلا بيكم في الحلقة التانية من سلسلة: أفكار أسلوب
وحلقة بعنوان: مقدمة عن تنظيم وادارة الوقت
مرة تانية… حلقة النهاردة كانت أكتر حاجة اتطلبت مننا الفترة اللي فاتت
ازاي انظم وقتي؟
حلقة النهاردة: مقدمة عن تنظيم و ادارة وتنظيم الوقت

سواء كنت د. أحمد زويل
أو كنت كابتن محمد أبو تريكة
أو طالب في المدرسة أو الجامعة
وأو ست بيت وبتديري منزل وأسرة

كلنا… عندنا ٢٤ ساعة بس في اليوم… وطلبات وأعمال ووجبات وأهداف وأحلام… اكبر بكتيييير جدا من الوقت المتاح

إحنا جايين النهاردة, علشان نحط ٦ خطوات أساسيين, علشان نبدأ بيهم رحلة: تنظيم وإدارة الوقت

الخطوة الأولى: راقب وقتك
==============
—— علشان تقدر تستفاد أكبر استفادة ممكنة من وقتك, لازم تراقبه الأول تشوفه هو بيروح فين
—— الخطوة دي لوحدها, كفيلة بأنها تزيد انتاجيتك و كمية الحاجات اللي بتخلصها في يوم واحد, ٣ أضعاف… ومن أول يوم
—— وعلشان كده, الخطوة دي هانديها أكبر إهتمام وتركيز في حلقتنا النهاردة:
هات ورقة وقلم, وسطر الورق وقسمها ٣ أقسام
الوقت من… الوقت حتى…. كنت بعمل إيه في الوقت ده….
وابدا إكتب كل حاجة بتعملها في يومك لما تيجي تعملها, وبتعملها من الساعة كام لكام بالظبط
يعني… من ١٢ بالليل ل ٨ الصبح نايم
من ٨… ل ٨:١٥ …بتدلع على السرير علشان أصحى
من ٨:١٥ ل ٨:٤٠… بجهز علشان انزل الشغل أو المدرسة أو الكلية
من ٨:٤٠… ٩:٣٠… رحلة المواصلات الصباحية… بس استفدت من وقتي بإني قرأت صفحتين من كتاب… أو اتفرجت على فيديو عن ادارة وتنظيم الوقت
من ٩:٣٠… ١٠:١٠… فاتح الفايسبوك… بلف على نفس الصور اللي بلف عليهم كل يوم
من ١٠:١٠… ل ١٠:٢٠ على الواتس آب… بتكلم كلام ملوش لازمة
من ١٠:٢٠… ل ١١:٠٠ بفطر وبعمل شاي وبتكلم مع زمايلي
من ١١:٠٠ ل ١١:١٠… بدأت أركز في شغلي.. شوية… ١٠ دقايق
من ١١:١٠… ل ١١:٥٠… فايس زفت تاني… يادي النيلة…..
وإفضل اكتب يومك كله من أوله لآخره من غير ماتسيب ولا لحظة, حتى لما تنام… سجل كل حاجة

انت محتاج تنفذ خطوة مراقبة الوقت دي لمدة يوم أو يومين بس…
وانت بتراقب وقتك, هاتلاقي نفسك مش راضي تضيع وقتك علشان هاتتكسف انك تكتب ٣٠ أو ٥٠ دقيقة على الفايسبوك… بتفرج على صور ناس مش عارفة أنا مين
هاتلاقي نفسك متشجع انك تعمل الحاجات الصح كلها… علشان تسجلها عندك في جدول مراقبة وقتك
….
أنا عن نفسي, أول يوم بدأت أنفذ فيه خطوة مراقبة وقتي, انتاجيتي تضاعفت وبقيت بخلص حاجات كتيرة جدا في اليوم
الخطوة دي بس… كفيلة بإنها تغيرلك حياتك كلها… جربها لمدة يوم واحد بس, حياتك كلها هاتتغير في اليوم ده

الخطوة التانية: حط خطة يومية لليوم بتاعك
==============
تو دو ليست يعني
– إنت أكيد سمعت النصيحة دي قبل كده كتير أوي …. ولسه هاتسمعها كتير أوي أوي أوي أوي
– مفيش انسان ناجح في تنظيم وادارة وقته في العالم كله, مش بيستخدم نوتة أو تودو ليست… علشان يحط خطة يومية لكل الحاجات اللي وراه
– كل دقيقة بتحطها في وضع خطتك اليومية… هاتوفر عليك أضعاف أضعاف وقت تنفيذ أي حاجة عندك في اليوم, لو ماعندكش خطة مكتوبة

هات نوتة صغيرة, وخليها في جيبك على طول, واكتب فيها أول اليوم, كل الحاجات اللي المفروض تخلصها في اليوم ده
وكل ما تخلص حاجة من الحاجات اللي وراك, طلع النوتة, واشطب على الحاجة اللي خلصتها

ممكن بدل النوتة, برنامج تودو على موبايلك… فيه آلاف برامج التودو لجميل أنواع الموبايلات, و معظمها ببلاش… بس نوتة صغيرة فعلا كفاية لو تحب.

علشان الخطوة دي مهمة جدا, والمفروض تفضل شغال بيها طول العمر, هانقول مثال لشكل الخطة اليومية لأكتر إنسان ممكن يكون عنده شغل في يوم,
وهو, أم… بتدير منزل… وكمان بتشتغل
– هاتي نوتة صغيرة, واكتبي فيها خطتك لبكرة… وخليها خطوات صغيرة… كل ما تخلصي خطوة, اشطبي عليها
== أصحي الأولاد من النوم
== أحضر الفطار
== أحط السندوتشات في شنط الأولاد
== أروح الشغل…
== تحضير الغدا
== عمل الواجب المدرسي مع الأولاد
== تمرين الأطفال
== قراءة صفحتين من كتاب عن تنظيم الوقت
……..
ونكمل خطة لليوم كله…
…. ممكن كمان يكون فيه خطة يومية للبيت…. وخطة تانية للشغل

كل واحد فينا, خطته اليومية هاتكون مختلفة… بس خلي النوتة دي دايما في جيبك
كل ما تخلص حاجة, طلعها واشطب على الحاجة دي
ولو جالك حاجة زيادة المفروض تعملها في اليوم… طلع النوتة … وزودها على خطتك اليومية

أكبر ميزة في الخطة اليومية دي, هي انك عمرك ما هاتنسى أي حاجة المفروض تعملها
وكمان, وانت بتكتب أي حاجة في خطتك, مخك بيستقبل اشارة واستعداد, إنه يتشجع ويعمل الخطة دي
جرب بنفسك… وشوف احساسك والتشجيع اللي هاتحس بيه… وانت بتشطب على كل حاجة لما تخلصها
انتاجيتك هاتزيد من أول يوم… وكمان تنظيم الوقت هايكون وقت مسلي وممتع smile emoticon

معلومة مهمة: معظم الأيام… مش هاتخلص كل الحاجات اللي في خطتك اليومية… ده طبيعي جدا… انقلهم في خطة اليوم اللي بعده وانت بتكتب خطة اليوم الجديد

الخطوة التالتة: فكر على ورق
==============
لم تيجي تفكر في أي حاجة, فكر على ورق… بنفس الطريقة اللي بنكتب ونرسم بيها في الفيديو ده smile emoticon
أفكارك وتركيزك هايكونوا أعلى بكتير جدا وانت بتفكر على ورق… وكمان هاتوفر وقت كتييير جدا

الخطوة الرابعة: اوعى تعمل حاجتين في نفس الوقت
==============
لو عندك حاجة مهمة, اوعى تعملها مع أي حاجة تانية… لأنك كده هاتضيع وقت كتيييير على الفاضي
لو بتذاكر… اوعى تضحك على نفسك وتذاكر أمام التليفيزون أو الفايس زفت
اوعى تعمل أي حاجة مهمة, مع أي حاجة تانية مهما كانت
لو عندك حاجات مش مهمة, ممكن تعملها مع بعض مفيش مشكلة… حتى توفر وقت
بس لو حاجة مهمة… انت عارف… ماتعملش حاجة مهمة مع أي حاجة تانية

الخطوة الخامسة: إحجز وقت للتركيز بدون أي تشتيت
==============
– إنت هاتحتاج يكون عندك كذا جزء من الوقت محجوزين للشغل بتركيز… ومن غير أي تشتيت
– الجزء ده من الوقت هايكون محدد بمدة, زي ٣٠ دقيقة مثلا… ولازم تلغي كل أنواع التشتيت… الغي الموبايل بتاعك… وانسى الفايسبوك والواتس أب والشات والمكالمات مع أصدقائك وكل حاجة في الدنيا
حدد ٣٠ دقيقة… إعمل فيهم حاجة مهمة وراك… وركز فيها جدا… وبعد ال٣٠ دقيقة دول… خد راحة وكافئ نفسك
لو عملت النقطة دي صح, هاتخلص حاجات مهمة كتير في ال٣٠ دقيقة دول … خاصة لو مذاكرة أو شغل محتاج تركيز
– كل ما يكون عندك فترات شغل أكتر بدون أي تشتيت… كل ما انتاجيتك هاتزيد… وهاتقدر تخلص حاجات أكتر بتكير جدا من أي حد تاني

الخطوة السادسة: إستثمر في تنظيم وإدارة وقتك
==============
تنظيم وإدارة وقتك… هي أكتر حاجة هاتخليك ناجح في كل مجالات حياتك
وإنت كا إنسان ناجح… لازم ماتوفرش أي وقت أو مجهود في إنك تتعلم حاجات جديدة عن تنظيم وإدارة الوقت
… هات كتاب عن فن ادارة الوقت… واقرأ فيه كل يوم
… دور على فيديوهات عن فن ادارة الوقت… واتفرج عليها
…. هات لنفسك نوتة يكون شكلها حلو… تشجعك على كتابة خطتك اليومية
…… شوف ايه أدوات ممكن تجيبها… تشجعك على إنك تنظم وقتك, وهات الأدوات دي

==============
إكتبلنا في كومنت, تجربتك عن تنظيم وقتك, واقتراحاتك لتنظيم وادارة الوقت
إعمل شير للحلقة دي, و خليك سبب في إن ناس كتير تستفاد من المعلومات اللي فيه

لو إنت استفدت حاجة من الحلقة دي, شجعنا بلايك للفيديوا

وبكده… نكون وصلنا للوقت اللي بنشحت في السابسكرايب من مشاهدينا الأعزاء

سابسكرايب لو سمحت… علشان هو ببلاش أصلا
سابسركايب من فضلك…. علشان كوكب الأرض الحزين

لو عندك مشكلة تساقط الشعر… إعملي سابسركايب… وإعملي شعرك بروتين
لو أصحابك بيضربوك في الشغل… إعمل سابسكرايب… وسيب الشغل
لو نفسك تشتري عربية… إعمل سابسكرايب… وحوش تمنها
لو نفسك تجيب مجموع أو تقدير عالي… إعمل سابسكرايب … وإتفرج عن حلقتنا اللي فاتت عن المذاكرة… وموت نفسك مذاكرة

خليك كريم… وانشر الحلقة دي… وكل الأفكار الإيجابية اللي تشوفها أدامك
خليك كريم… خليك حبوب

برنامج أفكار أسلوب - الحلقة الثانية: ٦ خطوات لتنظيم وقتك - مقدمة عن إدارة وتنظيم الوقت :

برنامج أفكار أسلوب – الحلقة الثانية: ٦ خطوات لتنظيم وقتك – مقدمة عن إدارة وتنظيم الوقت :