السهرة النهاردة فين؟
أين تذهب هذا المساء؟
أهلا بيكم في الحلقة رقم ٢٤ من برنامج أسلوب في رمضان

وحلقة بعنوان: أين تذهب هذا المساء

عندنا عروض للسهرة النهاردة… ومش النهاردة بس

إحنا جايين النهاردة, نبدأ نظام جديد خالص في تفكيرنا في تنظيم اليوم

هانبدأ مع بعض نظام الخروجات والسهرات … لأهم فترة في إنتاجياتنا اليومية… فترة المساء

هات ورقة وعلقها عندك على الحيطة, وإكتب فيها بخط كبييييييييير أوي:

أين تذهب هذا أسماء؟

طيب… إيه النظام الجديد ده؟ وإشمعنى المساء

كلنا بلا إستثناء, بيكون عندنا إلتزامات صباحية

اللي بيروح الشغل, واللي بيروح المدرسة, واللي بينام لبعد العصر

كلنا كلنا بيكون عندنا إلتزامات صباحية… ولغاية فترة المساء… بإختلاف ميعاد فترة المساء دي من شخص لآخر

المهم… كلنا… بيكون عندنا فترة مسائية… وهي دي اللي كلنا لازم يكون عندنا خطة حقيقية مكتوبة… تحت عنوان عرييييض جدا

أين تذهب هذا المساء

هات بسرعة كده, كراسة أسلوب في رمضان بتاعتك

وإكتب العنوان بتاع: أين تذهب هذا المساء

وشوف

وإحنا في العشر الآواخر في رمضان

إكتب: خطة المساء: صلاة العشاء في المسجد

صلاة التروايح وصلاة التهجد

وحط خطة كاملة للفترة المسائية

لما نكون بعد رمضان

ممكن تحط في خطة: أين تذهب هذا المساء

-> مذاكرة كورس أون لاين عن أي حاجة بتتعلمها

بس خلي بالك… إقفل يوتيوب وفايسبوك… لأن السهرة أكيد أكيد أكيد… هاتضيع لو فتحت تبص بصة ٥ دقايق بس… هايخلصوا اليوم زي ما إنت مجرب ١٠٠ مرة قبل كده

ممكن كمان تحط خطة الرياضة اليومية

– الأفضل إنك تشترك في جيم قريب من البيت, علشان تلتزم تروح غصب عنك, وتتشجع في الجيم

– أو لو إنت إنسان فاهم مصلحتك ومستقبلك, هاتلاقي فيديوهات تعليم رياضات كتيرة جدا على يوتيوب, إلتزم بقناة تكون متميزة في فيديوهات التمارين

بس إوعى تتفرج بس… تتفرج وتنفذ

وبالنسبة للأمهات… إنتي كمان كا أم, لازم تستقطعي لنفسك على الأقل ٦٠ دقيقة بطريقة أو بأخرى, تعملي حاجة ترفعي فيها من علمك وشطارتك وذكائك يوميا

إحنا فاهمين إن الأمهات اللي بتدير منزل وأسرة كاملة, مابيكونش عندها ٥ دقايق فاضية في اليوم

لكن برضه… ولو… دي مصلحتك إنتي… بكل ذكاء … حاولي بطريقة أو بأخرى, تحطي حاجة تكون مسلية وترفع من قيمتك, تعمليها كل مساء

الرياضة طبعا من أهم الأشياء اللي الأمهات لازم تلتزم بيها … أكتر من أي حد تاني

لأن الرياضة بتدي طاقة كبيرة جدا جدا … تخلي الواحد يعمل الشغل بتاع تاني يوم بقوة أكبر

وعلشان كمان ماتكونيش عرضة لزيادة الوزن, اللي بتسبب مشاكل نفسيه, ومشاكل صحية

وطبعا… مش هاننسى نحط في خطة السهرة المسائية, قراءة صفحتين أو تلاتة من كتاب

وإوعى تروح تشتري ٤ كتب مع بعض, وتقول هاتقرأهم… هاتحطهم كلهم على الرف

أيوة أيوة.. إحنا عارفين إنك جربت قبل كده كتير موضوع القراءة ده وفشل

ده علشان إنت كنت بتحاول تجمع مكتبة كبيييرة الأول… وعمرك ما هاتبدأ أبدا كده

لازم يكون عندك كتاب واحد بس صغير تبدأ فيه, وتحط خطة إنك تقرأ صفحتين أو ٣ صفحات فقط يوميا

لو قرأت أكتر من كده من نفسك… تبقى شاطر وممتاز

لكن في الخطة, حط صفحتين أو ٣ صفحات مش أكتر

في النهاية… في مليون حاجة نقدر نبني بيها نفسنا فعلا لما نحط خطة مسائية تحت عنوان: أين تذهب هذا المساء

نرمي بقى الفايسبوك, واليوتيوب, والشات بكل أنواعه, والمسلسلات الهندي والكوري والتوركي والمصري والبطيخي

مرة تانية… واجب النهاردة

– هات كراستك بتاعة أسلوب في رمضان

وإكتب عنوان كبييير جدا… أين تذهب هذا المساء

وحط خطة لليالي الباقي من شهر رمضان

ولما ترجع تاني تشوف الحلقة دي زي الشطور بعد رمضان… تحط خطة لكل يوم عندك تحت عنوان… أين تذهب هذا المساء

وإكتبلنا في كومنت دلوقتي, إنت إيه خطتك… لهذا المساء

وشجعنا بشير ولايك للحلقة… علشان تقوم بدورك في مساعدة مشروع أسلوب إنه يوصل لكل الناس

و رمضان …. كريييييم

إعمل متابعة\سابسكرايب لقناة أسلوب على يوتيوب, علشان توصلك حلقاتنا أول لما تنزل
http://bit.ly/osloop-sub
وكمان نزل برامج أسلوب للأيفون والأندرويد… علشان توصلك جميع حلقات أسلوب بالترتيب الصحيح
نزل أسلوب على #‏موبايلك #‏الأندرويد من هنا:
http://bit.ly/osloop-android
وأسلوب #‏أيفون من هنا:
http://bit.ly/osloop-iOS-eg
وده, #‏موقع أسلوب:
http://www.osloop.com
وده أسلوب على فايسبوك:
https://www.facebook.com/osloop.life/
وده أسلوب على انستاجرام:
https://www.instagram.com/osloop.life/
وأكيد أسلوب على تويتر:
https://twitter.com/OsloopLife